ພິທີເຊັນອະນຸມັດສ້າງເຂື່ອນ 3 ແຫ່ງໃສ່ຫ້ວຍເຢີງເມືອງດາກຈຶງ



ແຂວງເຊກອງ,ວັນທີ 20/02/2018 :  ອົງການປົກຄອງແຂວງເຊກອງ ຕາງໜ້າໂດຍພະແນກແຜນການ ແລະ ການລົງທຶນແຂວງໄດ້ອະນຸຍາດໃຫ້ບໍລິສັດ ເອັມພີ (MP) ກໍ່ສ້າງຈໍາກັດຜູ້ດຽວເປັນຜູ້ສືບຕໍ່ພັດທະນາໂຄງການກໍ່ສ້າງເຂື່ອນໄຟຟ້ານໍ້າຕົກຂະໜາດນ້ອຍ 3 ແຫ່ງໃສ່ນໍ້າເຢີງ ໂດຍມີທີ່ຕັ້ງຢູ່ເມືອງດາກຈຶງ.




ພິທີເຊັນສັນຍາອະນຸຍາດໂຄງການ ມີຂຶ້ນໃນວັນທີ 19 ກຸມພາ 2018 ທີ່ຫ້ອງປະຊຸມພະແນກແຜນການ ແລະການລົງທຶນແຂວງລະຫວ່າງທ່ານ ທອງຄຳ ມະນີວົງ ຫົວໜ້າພະແນກແຜນການ ແລະການລົງທຶນແຂວງເຊກອງ ກັບທ່ານ ມະໂນທຳ ເພັດສີລິແສງ ອຳນວຍການບໍລິສັດ ເອັມພີ (MP) ກໍ່ສ້າງຈໍາກັດຜູ້ດຽວ ໂດຍມີທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງ, ພ້ອມນີ້ກໍມີທ່ານເຈົ້າເມືອງໆດາກຈຶງ, ພະແນກການທີ່ກ່ຽວຂ້ອງຂອງແຂວງ-ເມືອງ ແລະພະນັກງານວິຊາການເຂົ້າຮ່ວມ.

ທ່ານ ມະໂນທຳ ເພັດສີລິແສງ ກ່າວວ່າ: ໂຄງການດັ່ງກ່າວ ແມ່ນໄດ້ດຳເນີນການສຶກສາສຳຫຼວດຄວາມເປັນໄປໄດ້ມາແຕ່ເດືອນກໍລະກົດ (7) ປີ 2014 ແລ້ວເຫັນວ່າໄດ້ຜົນໃນທິດທາງທີ່ເພິ່ງພໍໃຈ ສະນັ້ນ ບໍລິສັດຈຶ່ງຂໍອະນຸຍາດສືບຕໍ່ພັດທະນານຳພາກລັດຂອງແຂວງ ໂດຍໂຄງການກໍ່ສ້າງເຂື່ອນໄຟຟ້ານ້ຳຕົກຂະໜາດນ້ອຍນ້ຳເຢີງທັງ 3 ແຫ່ງມີກຳລັງຕິດຕັ້ງລວມ 33 ເມກາວັດ ແລະສາມາດຜະລິດກະແສໄຟຟ້າໄດ້ທັງໝົດ 136,39 ກິກກາວັດໂມງຕໍ່ປີ, ໃນນີ້ຫ້ວຍເຢີງ 3 ມີກຳລັງຕິດຕັ້ງ 9 ເມກາວັດ,ສາມາດຜະລິດກະແສໄຟຟ້າໄດ້ 34,7 ກິກກາວັດໂມງຕໍ່ປີ; ຫ້ວຍເຢີງ 5 ມີກຳລັງຕິດຕັ້ງ 10 ເມກາວັດ,ສາມາດຜະລິດກະແສໄຟຟ້າໄດ້ 36,19 ກິກກາວັດໂມງຕໍ່ປີ ແລະຫ້ວຍເຢີງ 7 ມີກຳລັງຕິດຕັ້ງ 14 ເມກາວັດ,ສາມາດຜະລິດກະແສໄຟຟ້າໄດ້ 63,5 ກິກກາວັດໂມງຕໍ່ປີ ຊຶ່ງທັງ 3 ແຫ່ງຄາດຈະໃຊ້ເວລາໃນການກໍ່ສ້າງ 3 ປີຈິ່ງສຳເລັດ.

ທ່ານອຳນວຍການບໍລິສັດກ່າວອີກວ່າ: ໂດຍກະແສໄຟຟ້າທີ່ຜະລິດໄດ້ທັງໝົດ ແມ່ນຈະຂາຍໃຫ້ບໍລິສັດລັດວິສາຫະກິດໄຟຟ້າລາວ ເພື່ອຕອບສະໜອງກະແສໄຟຟ້າໃຫ້ປະຊາຊົນລາວບັນດາເຜົ່າ ໂດຍສະເພາະປະຊາຊົນແຂວງເຊກອງໄດ້ຮັບປະໂຫຍດໂດຍກົງຈາກໂຄງການ, ພ້ອມນີ້ ບໍລິສັດຮັບປະກັນວ່າຈະພະຍາຍາມທີ່ສຸດແນໃສ່ປົກປັກຮັກສາຜົນປະໂຫຍດຕ່າງໆ ແລະສິ່ງແວດລ້ອມເພື່ອປະຊາຊົນທ້ອງຖິ່ນ.ແນວໃດກໍດີ ຖ້າຫາກວ່າໂຄງການດັ່ງກ່າວ ກໍ່ສ້າງສຳເລັດຕາມແຜນການຈະເປັນການປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງເມືອງແຂວງເຊກອງ ໂດຍສະເພາະແມ່ນການສ້າງວຽກເຮັດງານທຳໃຫ້ປະຊາ ຊົນພາຍໃນທ້ອງຖິ່ນ. ທັງນີ້ ກໍເພື່ອແນໃສ່ແກ້ໄຂຄວາມຄວາມທຸກຍາກຂອງປະຊາຊົນໃຫ້ຫຼຸດລົງເປັນກ້າວໆ.

ຂ່າວ-ພາບ : ສັນຍາ (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments