ກອງປະຊຸມຄົບຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງຫຼວງນ້ຳທາປະຈຳປີ 2018




ໃນວັນທີ 16 ກຸມພາ 2018 ນີ້ພະແນກແຮງງານ ແລະ ສະຫວັດດີການສັງຄົມແຂວງຫຼວງນໍ້າທາ ຈັດກອງປະຊຸມຄົບຄະນະກຳມະການປ້ອງກັນ ແລະ ຄວບຄຸມໄພພິບັດຂື້ນຢູ່ທີຫ້ອງການພະແນກແຮງງານ ແລະ ສະຫວັດດີການສັງຄົມແຂວງ ໂດຍການເປັນປະທານຂອງທ່ານ ເມຶອງສະຫວັນ ເມກອ່ອນສີ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ມີບັນດາຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ-ຂັ້ນເມືອງເຂົ້າຮ່ວມ.



ທ່ານ ອຳຄາ ທຳມະສິດ ຮອງຫົວໜ້າພະແນກແຮງງານ ແລະ ສະ ຫວັດດີການສັງຄົມແຂວງໃຫ້ຮູ້ວ່າ: ການເຄື່ອນໄຫວວຽກງານຂອງພະແນກແຮງງານ ແລະ ສະຫວັດດີການສັງຄົມແຂວງຫຼວງນໍ້າທາ ໃນປີ 2017 ຜ່ານມານີ້, ເຊີ່ງແຂວງຫຼວງນໍ້າທາ ເປັນແຂວງໜຶ່ງທີ່ມີປະຊາຊົນບາງເຜົ່າມີຖີ່ນຖານຢູ່ຫ່າງໄກສອກຫຼີກ ແລະ ມີທີຢູ່ອາໄສແບບປະຖົມປະຖານ,ພື້ນຖານທຳການຜະລິດ ຢູ່ເຂດພື້ນທີຕໍ່າຢູ່ລຽບຕາມແຄມຫ້ວຍ, ແຄມນ້ຳ, ເນີນພູເປັນສ່ວນໃຫຍ່ ຫຼາຍບ້ານມີຄວາມສ່ຽງສູງຕໍ່ເຫດການໄພພິບັດດັ່ງນັ້ນທຸກໆປີຜ່ານມາປະຊາຊົນໄດ້ປະສົບພົບພໍ້ກັບໄພນ້ຳຖ້ວມ,ໄພແຫ້ງແລ້ງ,ພະຍຸ,ອັກຄີໄພ ນອກນັ້ນຍັງມີສັດຕູພືດທຳລາຍຜົນລະປູກຢ່າງຮ້າຍແຮງສົ່ງຜົນກະທົບຕໍ່ປະຊາກອນບັນດາເຜົ່າເປັນຕົ້ນແມ່ນໄດ້ຮັບຜົນກະທົບຈາກອັກຄີໄພມີ 5 ເມືອງ 17 ບ້ານ, 34 ຄອບຄົວ, ມູນຄ່າການເສຍຫາຍ 2 ຕື້ 450 ລ້ານກວ່າກີບ, ຈາກລົມພະຍຸມີ 1 ເມືອງ 9 ບ້ານ 30 ຄອບຄົວ ມູນຄ່າເສຍຫາຍ 451 ລ້ານກວ່າກີບເຂົ້າ ແລະ ພືດຖືກກະ ທົບຈາກໄພນ້ຳຖ້ວມ,ດີນເຊາະເຈື່ອນ ແລະ ສັດຕູພືດທຳລາຍລວມເນື້ອທີ່ເສຍຫາຍ 430 ກວ່າເຮັກຕ່າ ແລະ ໄດ້ຮັບເຂົ້າຊ່ວຍເຫຼືອຜູ້ປະສົບໄພພິບັດຈຳນວນ 85 ພັນກວ່າກິໂລ ມູນຄ່າ 612 ລ້ານກວ່າກີບໃນນັ້ນເມືອງຫຼວງນ້ຳທາ 4.536 ກິໂລ,ເມືອງລອງ 38 ພັນ 412 ກິໂລ, ເມືອງສີງ 42 ພັນ 84 ກິໂລ.



ນອກຈາກນັ້ນເມືອງລອງໄດ້ມອບເຄືອງນຸງຫົ່ມ ແລະ ສັງກາສີໃຫ້ຜູ້ປະສົບໄພພິບັດຕ່າງໆ ຈຳນວນ 30 ບ້ານ 341 ຄອບ ຄົວລວມມູນຄ່າ 71 ລ້ານ 2 ແສນກວ່າກີບ, ເມືອງວຽງພູຄາມອບເຂົ້າສານໜຽວ ແລະ ຜ້າຫົ່ມໃຫ້ 3 ບ້ານ 38 ຄອບຄົວ, ເຂົ້າສານໜຽວ ຈຳນວນ 1050 ກິໂລ ແລະ ຜ້າຫົ່ມ 10 ຜືນ, ເມືອງນາແລໄດ້ຮັບເຂົ້າສານຊ່ວຍເຫຼືອຈາກສະພາແຫ່ງຊາດຈຳນວນ 5 ໂຕນ ເພື່ອນຳໄປແຈກຢາຍໃຫ້ປະຊາຊົນທີ່ຖືກຜົນກະທົບຈາກໄພພິບັດຕ່າງໆຈຳນວນ 5 ບ້ານ 423 ຄອບຄົວ ຜ້າຫົ່ມ 250 ຜືນ ມູນຄ່າ 33 ລ້ານ 5 ແສນກີບ, ພ້ອມນີ້ອົງການກາແດງໄດ້ຊ່ວຍເຫຼືອບັນເທົາທຸກໃຫ້ຜູ້ທີ່ໄດ້ຮັບຜົນກະທົບຈາກໄພພິບັດຕ່າງໆເຊັ່ນ: ມອບເຄື່ອງນຸ່ງຮົມຈຳນວນ 42 ເປົາ , ປະກອບມີໂສ້ງວອມ 197 ຜືນ, ຜ້າຫົ່ມ 30 ຜືນ, ຜ້າເຊັດໂຕ 24 ຜືນ, ເຄື່ອງນຸ່ງຮົ່ມເດັກນ້ອຍເກີດໃໝ່ 10 ຊຸດ ລວມມູນຄ່າການຊ່ວຍເຫຼືອ 19 ລ້ານ 8 ແສນກວ່າກີບ.


ໃນຕໍ່ໜ້າພະແນກແຮງງານ ແລະ ສະຫວັດດີການສັງຄົມແຂວງຫຼວງນ້ຳທາຈະໄດ້ເພີ່ມທະວີປຸກຈິດສຳນຶກຊຸມຊົນໃຫ້ມີສະຕິລະວັງຕົວກຽມຮັບມືກັບໄພພິບັດອາດເກິດຂື້ນເພື່ອເຮັດໃຫ້ຜົນກະທົບໜ້ອຍ, ສ້າງໃຫ້ຄະນະແຕ່ລະຂັ້ນເປັນເຈົ້າການດ້ວຍຄວາມຮັບຜິດຊອບສູງ, ມີການເຄື່ອນໄຫວວຽກງານຢ່າງຕໍ່ເນື່ອງ ແລະ ມີປະສິດທິຜົນ , ຕິດຕາມສະພາບການປ່ຽນແປງຂອງອາກາດເພື່ອແຈ້ງຂ່າວໄປຍັງເຂດທີ່ເກີດມີໄພພິບັດ, ກຽມພ້ອມຮັບມືໃຫ້ທັນການ ແລະ ຈັດງົບປະມານຈຳນວນໜື່ງແຮໄວ້ສຳລັບຄະນະກຳມະການລົງພື້ນທີ່, ທີ່ພວມຖືກໄພພິບັດເພື່ອປະຕິບັດການກູ້ໄພ ແລະ ຊ່ວຍເຫຼືອສຸກເສີນແກ່ຜູ້ປະສົບໄພ ແລະ ບັນຫາອື່ນໆ


ພາບ ແລະ ຂ່າວ:ຂ່າວແຂວງຫຼວງນໍ້າທາ (ມີເດຍລາວ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments