3 ກະຊວງ ຮ່ວມກັນ ປືກສາຫາລື ການປັບສະຖານະພາບແຮງງານລາວທີ່ເຮັດວຽກແບບບໍ່ຖືກຕ້ອງຕາມກົດໝາຍຢູ່ປະເທດໄທ



ເພື່ອເຮັດໃຫ້ແຮງງານລາວທີ່ໄປເຮັດວຽກຢູ່ປະເທດໄທ ໄດ້ຮັບການຄຸ້ມຄອງ, ຕາມລະກອບ MOU, ຫລີລຽ້ງການຖືກກົດຂີ້ຂູດຮີດ ເອົາປຽບຈາກນາຍຈ້າງ, ເມື່ອວັນທີ 20 ກຸມພາ 2018ນີ້,ທີ່ ກະຊວງແຮງງານ ແລະ ສະຫວັດດີການສັງຄົມ (ຮສສ) ຈັດກອງປະຊຸມຂຶ້ນທີ່ຫ້ອງປະຊຸມໃຫຍ່ ຂອງກະຊວງດັ່ງກ່າວ, ພາຍໃຕ້ການເປັນປະທານຂອງ ທ່ານ ປອ. ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ມີຮອງລັດຖະມົນຕີ ກະຊວງການຕ່າງປະເທດ, ຮອງລັດຖະມົນຕີກະຊວງປ້ອງກັນຄວາມສະຫງົບ, ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.



ທີ່ປະຊຸມໄດ້ເຜີຍໃຫ້ຮູ້ວ່າ: ຫຼັງຈາກທາງການລາວໄດ້ສົ່ງພະນັກງານເຂົ້າໄປປັບສະຖານະພາບໃຫ້ແກ່ແຮງງານລາວ (ກຸ່ມບັດສີຊົມພູ) ທີ່ຍັງເຫຼືອ ຈຳນວນ 71 ພັນກວ່າຄົນ, ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 448/ຫສນຍ,ກສວ, ລົງວັນທີ 23 ມີນາ 2017 ຊຶ່ງໜ່ວຍງານປັບສະຖານະພາບແຮງງານລາວໄດ້ຕັ້ງຢູ່ຫ້າງ IT Square ເຂດຫຼັກ 4, ກຸງເທບມະຫານະຄອນ, ປະເທດໄທ. ຜ່ານການຈັດຕັ້ງປະຕິບັດວຽງານ ແຕ່ວັນທີ 28 ສິງຫາ 2017 ຮອດວັນທີ 31 ມັງກອນ 2018 (5 ເດືອນ) ສາມາດອອກໜັງສືຢັ້ງຢືນສະຖານະພາບບຸກຄົນ (CI) ແລະ ບັດອະນຸຍາດເຮັດວຽກໃຫ້ແຮງງານຜູ້ທີ່ມີບັດສີບົວ ໄດ້ຈຳນວນທັງໝົດ 24,684 ຄົນ, ໃນນັ້ນ ເປັນແຮງງານ ຈຳນວນ 22,422 ຄົນ, ຍິງ 11,525 ຄົນ, ຜູ້ຕິດຕາມ 2,262 ຄົນ, ຍິງ 1,062 ຄົນ, ຍັງອີກຈໍານວນ 46 ພັນກວ່າຄົນທີ່ຕ້ອງໄດ້ປະຕິບັດໃຫ້ສຳເລັດພາຍໃນວັນທີ 31 ມີນາ 2018.

ທ່ານ ປອ ຄຳແພງ ໄຊສົມແພງ ກ່າວວ່າ: ອີງໃສ່ຂໍ້ມູນ ປີ 2016 ທີ່ຝ່າຍໄທໄດ້ແຈ້ງໃຫ້ຝ່າຍລາວຮູ້ວ່າ ມີແຮງງານທີ່ມີບັດສີຊົມພູປະມານ 71 ພັນກວ່າຄົນ, ຊຶ່ງຈະໝົດອາຍຸ ວັນທີ 31 ມີນາ 2018 ໃຫ້ຝ່າຍລາວ ຮີບຮ້ອນເຂົ້າມາດຳເນີນການປັບສະຖານະພາບໃຫ້ຖືກຕ້ອງ, ດ້ວຍເຫດຜົນນັ້ນ ລັດຖະບານ ໄດ້ມອບໝາຍໃຫ້ ກະຊວງ ຮສສ ເປັນໃຈກາງຮັບຜິດຊອບວຽກງານປັບສະຖານະພາບແຮງງານລາວທີ່ເຮັດວຽກແບບບໍ່ຖືກຕ້ອງຕາມກົດໝາຍຢູ່ປະເທດໄທ ໂດຍ ກະຊວງ ຮສສ ໄດ້ອອກຂໍ້ຕົກລົງແຕ່ງຕັ້ງຄະນະກຳມະການຊີ້ນຳລວມ ແລະ ຄະນະປະຕິບັດງານ ຫຼື ເອີ້ນວ່າໜ່ວຍງານປັບສະຖານນະພາບແຮງງານລາວ ຊຶ່ງຄະນະກໍາມະການຊີ້ນໍາລວມ ປະກອບມີ 15 ທ່ານ ແລະ ໜ່ວຍງານປະຕິບັດງານ ປະກອບມີ 32 ທ່ານ, ໃນນີ້ ເປັນພະນັກງານລັດ 18 ທ່ານ ທີ່ມາຈາກ 5 ພາກສ່ວນ: ກະຊວງ ຮສສ, ກະຊວງການຕ່າງປະເທດ, ກະຊວງປ້ອງກັນຄວາມສະຫງົບ, ກະຊວງການເງິນ ແລະ ຫ້ອງການວ່າການສຳນັກງານນາຍົກລັດຖະມົນຕີ. 

ນອກນາກນີ້, ຍັງມີພະນັກງານເອກະຊົນຈາກກຸ່ມບໍລິສັດຈັດຫາງານ ຈຳນວນ 14 ທ່ານ ເປັນໄລຍະ 6 ເດືອນ ແລະ ປະຕິບັດແລ້ວ 5 ເດືອນ ສາມາດປັບສະຖານະພາບໄດ້ 24,684 ຄົນ, ຍັງອີກຈໍານວນ 46 ພັນກວ່າຄົນ ທີ່ຕ້ອງປະຕິບັດໃຫ້ສໍາເລັດພາຍໃນວັນທີ 31 ມີນາ 2018 ແລະ ພ້ອມນີ້, ລັດຖະບານໄທ ໄດ້ອອກຂໍ້ກຳນົດການບໍລິຫານຈັດການການເຮັດວຽກຂອງຄົນຕ່າງດ້າວປີ 2017 ຊຶ່ງໄດ້ຕັ້ງສູນຮັບແຈ້ງແຮງງານຕ່າງດ້າວ 3 ສັນຊາດ, ກຳນົດ 15 ວັນ ໃຫ້ຂຶ້ນທະບຽນ ມີແຮງງານລາວມາຂຶ້ນທະບຽນຈັບຄູ່ ນາຍຈ້າງກັບລູກຈ້າງ ມີທັງໝົດ 100,740 ຄົນ, ໃນນັ້ນ ແຮງງານລາວທີ່ໄດ້ຮັບການຢັ້ງຢືນວ່າເປັນຄົນລາວ ທີ່ທາງການໄທອອກໃບຈັບຄູ່ໃຫ້ຈຳນວນ 87,442 ຄົນ ມີກຳນົດຮອດວັນທີ 31 ທັນວາ 2017 ຊຶ່ງບໍ່ສາມາດຈັດຕັ້ງປະຕິບັດຕາມກຳນົດເວລາໄດ້, ສະນັ້ນ ມີແຮງງານລາວສອງກຸ່ມນີ້ຕົກຄ້າງປະມານ 130,000 ພັນກວ່າຄົນ. ເພື່ອແກ້ໄຂບັນຫາສະເພາະໜ້າລັດຖະບານໄທ ຈຶ່ງມີນະໂຍບາຍຜ່ອນຜັນແຮງງານລາວກຸ່ມທີ່ມີບັດສີຊົມພູ ແລະ ກຸ່ມທີ່ມີໃບຈັບຄູ່ ໃຫ້ມາຂຶ້ນທະບຽນໃໝ່ ກຳນົດຮອດວັນທີ 30 ມີນາ 2018 ໃຫ້ສຳເລັດຕາມຈຳນວນດັ່ງກ່າວ, ທາງການໄທ ຈຶ່ງໄດ້ເຮັດໜັງສືຂໍຄວາມຮ່ວມມືກັບທາງການລາວ ເພື່ອໃຫ້ແຮງງານລາວກຸ່ມທີ່ມີບັດສີຊົມພູ ແລະ ກຸ່ມທີ່ມີໃບຈັບຄູ່ (ກຸ່ມໃໝ່) ໃຫ້ໄປດຳເນີນການພິສູດສັນຊາດຢູ່ໜ່ວຍງານປັນສະຖານະພາບແຮງງານລາວ ຢູ່ໜ້າຫ້າງ IT Square ເຂດຫຼັກ 4, ກຸງເທບມະຫານະຄອນ, ປະເທດໄທ ທີ່ກຳລັງດໍາເນີນການປັບສະຖານະພາບຢູ່ໃນປະຈຸບັນ.
ພາບ-ຂ່າວ: ເພັດສະໄໝ ພິມມະສອນ  
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments