ອົງການອາຫານໂລກ ປະຈຳສ.ປ.ປ.ລາວ ໄດ້ມອບສາງນາຂ້ອຍສາວຄືນໃຫ້ແກ່ແຂວງສາລະວັນພາຍຫຼັງໄດ້ຍົກຍ້າຍສາງໄປຢູ່ ເມືອງປາກເຊ ແຂວງຈຳປາສັກ



ຕົ້ນເດືອນກຸມພາ 2018 ຢູ່ທີ່ພະແນກສຶກສາທິການ ແລະກິລາແຂວງສາລະວັນ ໄດ້ມີພິທີມອບສາງອາຫານ ໂດຍແມ່ນ ອົງການອາຫານໂລກ ປະຈຳ ສປປ ລາວ ໄດ້ມອບສາງນາຂ້ອຍສາວຄືນໃຫ້ແກ່ແຂວງສາລະວັນ ພາຍຫຼັງໄດ້ມີການຍົກຍ້າຍສາງໄປທີ່ເມືອງປາກເຊ ແຂວງຈຳປາສັກ. ສາງດັ່ງກ່າວນຳໃຊ້ມາເປັນເວລາ 9 ປີ ເລີ່ມແຕ່ປີ 2008-2017, ມອບໂດຍ ທ່ານ ເຄວິນ ຜູ້ຕາງໜ້າອົງການອາຫານໂລກ ປະຈຳ ສປປ ລາວ, ຮັບໂດຍ ທ່ານ ຫຼິນທອງ ດວງທອງພະຈັນ ຮອງຫົວໜ້າຫ້ອງການຈັດຕັ້ງພະແນກການເງິນແຂວງ ໂດຍຊ້ອງໜ້າ ທ່ານ ສົມຈິດ ເພັງສຸວັນ ຮອງຫົວໜ້າພະແນກສຶກສາທິການ ແລະກິລາແຂວງ, ມີພະນັກງານການນຳຫຼັກແຫຼ່ງ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ. 


ທ່ານ ສົມຈິດ ເພັງສຸວັນ ຮອງຫົວໜ້າພະແນກ ສຶກສາທິການ ແລະກິລາແຂວງ ໄດ້ລາຍງານການເຄື່ອນໄຫວວຽກງານການຈັດຕັ້ງປະຕິບັດຈາກອົງການອາຫານໂລກ ໂດຍພາຍໄຕ້ການປະສານງານກັບບັນດາຂະແໜງງານທີ່ກ່ຽວຂ້ອງ ຊື່ງໄດ້ຈັດຕັ້ງປະຕິບັດກິດຈະກຳການຊ່ວຍເຫຼືອຢູ່ໃນ 3 ແຂວງພາກໃຕ້ມີ: ແຂວງສາລະວັນ, ເຊກອງ ແລະແຂວງອັດຕະປື ໂດຍນຳໃຊ້ສາງດັ່ງກ່າວເປັນຈຸດເກັບມ້ຽນອາຫານ ແລະອຸປະກອນທີ່ກ່ຽວຂ້ອງກັບກິດຈະກຳເພື່ອແຈກຢາຍອາຫານ ແລະອຸປະກອນໄປໃນ 3 ແຂວງ. ມີໂຮງຮຽນເປົ້າໝາຍ 356 ໂຮງຮຽນ ໃນ 356 ບ້ານ ທີ່ໄດ້ຮັບສະເພາະແຕ່ອາຫານທ່ຽງ, ໃນນັ້ນມີ 103 ບ້ານ (ແຂວງເຊກອງ) ໄດ້ຮັບທັງອາຫານທ່ຽງໃນໂຮງຮຽນ ແລະອາຫານເສີມສຳລັບເດັກນ້ອຍອາຍຸ 6 ຫາ 23 ເດືອນ ແລະແມ່ມານ. ນອກນັ້ນຍັງມີບ້ານເປົ້າໝາຍຈຳນວນ 124 ບ້ານ(ແຂວງເຊກອງ) ທີ່ໄດ້ຮັບສະເພາະແຕ່ອາຫານເສີມເພື່ອແມ່ແລະເດັກ (ໃນປີ 2018 ແມ່ມານບໍ່ໄດ້ຮັບອາຫານເສີມແລ້ວ ແຕ່ຍັງຄົງສືບຕໍ່ແຈກຢາຍສະເພາະເດັກນ້ອຍເທົ່ານັ້ນ)
ເວົ້າລວມແລ້ວ ມີ 480 ບ້ານທີ່ໄດ້ຮັບຜົນປະໂຫຍດຈາກການຊ່ວຍເຫຼືອຈາກອົງການອາຫານໂລກ. 


ທັງນີ້ກໍ່ເພື່ອເພີ່ມການເຂົ້າຮຽນຂອງນັກຮຽນໃນຊັ້ນປະຖົມ, ເພີ່ມອັດຕາການເຂົ້າຮຽນຂອງເດັກນ້ອຍ ໂດຍສະເພາະແມ່ນເດັກຍິງໃຫ້ຫຼາຍຂື້ນກວ່າເກົ່າ, ເພີ່ມຈຳນວນເກນອາຍຸເຂົ້າຮຽນຂອງເດັກໃຫ້ຫຼາຍຂື້ນ ແລະບໍ່ໃຫ້ເດັກນັກຮຽນອິດເມື່ອຍ ແລະຫິວອາຫານໃນເວລາຮຽນໜງສື ທັງຫຼຸດຜ່ອນອັດຕາການຄ້າງຫ້ອງແລະປະລະການການຮຽນຂອງເດັກ, ພ້ອມສ້າງໃຫ້ເດັກມີຄວາມດຸໝັ່ນຂະຫຍັນຮໍ່າຮຽນ.

ພາບ-ຂ່າວ: ທິດລານີ ໂຄດໂຍທາ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments