ເສດຖະກິດ ເມືອງທ່າແຕງ ພັດທະນາດີຂຶ້ນຕໍ່ເນື່ອງ ຍອດຜະລິດຕະພັນພາຍໃນ GDP ບັນລຸ 684,4 ຕື້ກີບ




ແຂວງ ເຊກອງ ວັນທີ 19/02/2018  :  ດ້ວຍຈັ່ງຫວະການເພີ່ມຂຶ້ນຂອງຂະແໜງກະສິກໍາ, ອຸດສາຫະກໍາ ແລະການບໍລິການນັບມື້ກວ້າງຂວາງ ຊຶ່ງເຮັດໃຫ້ປີ 2017 ຜ່ານມານີ້ ການພັດທະນາເສດຖະກິດ-ສັງຄົມບັນລຸຜົນສຳເລັດ, ພ້ອມທັງມີຫຼາຍດ້ານທີ່ພົ້ນເດັ່ນ ໂດຍສະເພາະດ້ານເສດຖະກິດເຕີບໂຕ 9,14% ລວມຍອດຜະລິດຕະພັນພາຍໃນ ຫຼື GDP ບັນລຸ 684,4 ຕື້ກີບ.



ທ່ານ ຄຳສອນ ກອນເຍີ ເຈົ້າເມືອງໆທ່າແຕງໃຫ້ຮູ້ເມື່ອບໍ່ດົນນີ້ວ່າ: ຜ່ານການຈັດຕັ້ງປະຕິບັດແຜນພັດທະນາເສດ-ຖະກິດ-ສັງຄົມໃນ 1 ປີຜ່ານມາ ໂດຍລວມແລ້ວ ເມືອງທ່າແຕງສາມາດຍາດໄດ້ຜົນສຳເລັດຫຼາຍດ້ານ ແລະບັນດາຄາດໝາຍຕົ້ນຕໍແມ່ນບັນລຸຕາມແຜນການ, ການຜະລິດເປັນສິນຄ້ານັບມື້ຂະຫຍາຍຕົວຢ່າງກວ້າງຂວາງ, ຂະແໜງອຸດສາຫະກໍາລວມທັງຂົງເຂດການບໍລິການໄດ້ຮັບການປັບປຸງ ແລະພັດທະນາດີຂຶ້ນເປັນກ້າວໆ ຊຶ່ງເຮັດໃຫ້ພື້ນຖານເສດຖະກິດນັບມື້ຂະຫຍາຍຕົວເພີ່ມຂຶ້ນ, ລວມຍອດຜະ¬ລິດຕະພັນພາຍໃນ ຫຼື GDP ບັນລຸໄດ້ 684,4 ຕື້ກີບທຽບໃສ່ປີ 2016 ເພີ່ມຂຶ້ນ 9,14%.

ໃນນັ້ນໄດ້ຈາກຂະ¬ແໜງກະສິກຳ 257,35 ຕື້ກີບເພີ່ມຂຶ້ນ 2,38% ກວມເອົາ 37,60% ຂະແໜງອຸດສາຫະກຳ 211,76 ຕື້ກີບເພີ່ມຂຶ້ນ 16,5% ກວມເອົາ 30,94% ແລະຂົງເຂດການບໍລິການ 215 ຕື້ກວ່າກີບເພີ່ມຂຶ້ນ 11,4% ກວມເອົາ 31,45%, ສ່ວນການເກັບລາຍຮັບເຂົ້າງົບປະມານ (ພູດຂອງເມືອງ) ສາມາດປະຕິບັດໄດ້ 4,36 ຕື້ກີບເທົ່າກັບ 106% ແລະເອົາໃຈໃສ່ຄຸ້ມຄອງລາຍຈ່າຍໃຫ້ຖືກຕ້ອງຕາມລະບຽບກົດໝາຍ.



ຂະນະທີ່ການຈັດຕັ້ງປະຕິບັດວຽກງານ 3 ສ້າງ ທ່ານເຈົ້າເມືອງລະບຸວ່າ: ໄດ້ສຸມໃສ່ຈັດຕັ້ງປະຕິບັດຢ່າງຈິງຈັງ ແລະຕໍ່ເນື່ອງ ໂດຍຖືເອົາການພັດທະນາຕາມ 4 ເນື້ອໃນ 4 ຄາດໝາຍ, ການສ້າງບ້ານໃຫຍ່ເປັນຕົວເມືອງນ້ອຍຢູ່ຊົນນະບົດຕິດພັນກັບການຈັດສັນທີ່ຢູ່ຖາວອນ ແລະອາຊີບຄົງທີ່, ປັບປຸງ-ກໍ່ສ້າງພື້ນຖານໂຄງລ່າງ, ຊຸກຍູ້ສົ່ງເສີມການຜະລິດກະສິກຳ-ອຸດສາຫະກຳປຸງແຕ່ງ ແລະການບໍລິການກັບທີ່ ເພື່ອເປັນການສ້າງລາຍຮັບທີ່ໝັ້ນຄົງໃຫ້ປະຊາຊົນ ໂດຍປັດຈຸບັນ ທົ່ວເມືອງມີຄອບຄົວພົ້ນທຸກ 7.819 ຄອບຄົວເທົ່າກັບ 96,44% ຂອງຄອບຄົວທັງໝົດທົ່ວເມືອງ ແລະອັນທີ່ພົ້ນເດັ່ນແມ່ນສາມາດປະກາດຮັບບ້ານພົ້ນທຸກໄດ້ 47 ບ້ານເທົ່າກັບ 100%.
ສ່ວນຄາດໝາຍປີ 2018 ທ່ານ ຄຳສອນ ກອນເຍີ ກ່າວວ່າ: ເມືອງຖືເອົາການພັດທະນາເສດຖະກິດເປັນໃຈກາງ ໂດຍສຸມໃສ່ຂະບວນການຜະລິດເປັນສິນຄ້າ ແລະການບໍລິການດ້ານຕ່າງໆໄປພ້ອມໆກັບການປັບປຸງ-ກໍ່ສ້າງພື້ນຖານໂຄງລ່າງ ເພື່ອອຳນວຍຄວາມສະດວກແກ່ການພັດທະນາ, ຂຸດຄົ້ນນຳໃຊ້ທ່າແຮງຂອງທ້ອງຖິ່ນ, ຍາດແຍ່ງດຶງດູດການລົງທຶນຈາກພາກສ່ວນຕ່າງໆໃນທົ່ວສັງຄົມ ເພື່ອພັດທະນາເມືອງໃນຂົງເຂດວຽກງານຕ່າງໆໃຫ້ມີການພັດທະນາກ້າວຂຶ້ນຢ່າງບໍ່ຢຸດຢັ້ງ.


ຂ່າວ: ສັນຍາ (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments