ກອງປະຊຸມຄົບຄະນະບໍລິຫານງານພັກເມືອງ-ເມືອງເງິນ ຄັ້ງທີ 10 ສະໄຫມທີ IV


ກອງປະຊຸມຄົບຄະນະບໍລິຫານງານພັກເມືອງ-ເມືອງເງິນ ຄັ້ງທີ 10  ສະໄຫມທີ IV  ໄດ້ໄຂຂຶ້ນຢ່າງເປັນທາງການ ໃນລະຫວ່າງວັນທີ 9-10ມີນາ ປີ 2018  ຢູ່ທີ່ສະໂມສອນເມືອງເງິນ ແຂວງໄຊຍະບູລີ  ພາຍໃຕ້ການເປັນປະທານ ຂອງສະຫາຍ ບຸນມີ ຈັນທິບ ກໍາມະການພັກແຂວງ,  ເລຂາພັກເມືອງ-ເຈົ້າເມືອງມີຄະນະບໍລິຫານງານພັກເມືອງ,  ຫົວໜ້າ  - ຮອງຫົວໜ້າຫ້ອງການ,  ກົມກອງ,  ອົງການ,  ພະນັກງານຫຼັກແຫຼ່ງຂອງເມືອງເລຂາຄະນະພັກຮາກຖານກຸ່ມບ້ານ,  ຕາງໜ້າລັດວິສາຫະກິດ ແລະ ເລຂາໜ່ວຍພັກບ້ານພາຍໃນ ເມືອງເຂົ້າຮ່ວມ.

 ກອງປະຊຸມໄດ້ສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນປີ 2017 ເຊີ່ງເປັນປີທີ 3 ຂອງການຈັດຕັ້ງຜັນຂະຫຍາຍ ແລະ ປະຕິບັດເນື້ອໃນມະຕິ IV ກໍ່ຄືແຜນພັດທະນາເສດຖະກິດ-ສັງຄົມ 5 ປີ ຂອງເມືອງວາງອອກ, ໂດຍລວມແມ່ນມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ ແລະ ມີຄວາມສະຫງົບໂດຍພື້ນຖານ.

ເສດຖະກິດຂອງເມືອງມີການຂະຫຍາຍຕົວຢ່າງຕໍ່ເນື່ອງຢູ່ໃນລະດັບ 10,65% ລວມຍອດມູນຄ່າລາຍຮັບຈາກການຜະລິດບັນລຸໄດ້ 356,71 ຕື້ກີບ. ສະເລ່ຍໃສ່ຫົວຄົນໜຶ່ງໄດ້ 18,2 ລ້ານກີບຕໍ່ຄົນຕໍ່ປີ ຫຼື ເທົ່າກັບ 2,277 ໂດລາສະຫະລັດ,ບັນດາພື້ນຖານໂຄງລ່າງຈໍານວນໜຶ່ງໄດ້ຮັບການປັບປຸງດີຂຶ້ນ, ຂົງເຂດວັດທະນະທຳສັງຄົມໄດ້ຮັບການພັດທະ

ນາດີຂຶ້ນ, ຮາກຖານພັກໄດ້ມີການປັບປຸງໃຫ້ໜັກແໜ້ນເຂັ້ມແຂງເທື່ອລະກ້າວ

 ກອງປະຊຸມໄດ້ເປັນເອກະສັນ ແລະ ຮັບຮອງເອົາບັນດາຄາດໝາຍສູ້ຊົນທາງດ້ານເສດຖະກິດມະຫາພາກໃນ ປີ 2018 ເຮັດໃຫ້ເສດຖະກິດຂອງເມືອງຂະຫຍາຍຕົວຢູ່ໃນລະດັບ 11,69% ລວມຍອດມູນຄ່າລາຍຮັບຈາກການຜະຜິດໃຫ້ບັນລຸ 411,22 ຕື້ກີບ ສະເລ່ຍໃສ່ຫົວຄົນໜຶ່ງໄດ້ 22,11 ລ້ານກີບຕໍ່ຄົນຕໍ່ປີ ຫຼື ເທົ່າກັບ 2,601 ໂດລາສະຫະລັດ.  ຂົງເຂດວັດທະນະທຳສັງຄົມສືບຕໍ່ພັດທະນາຢ່າງແຂງແຮງ ທາງດ້ານປະລິມານ ແລະ ຄຸນນະພາບ, ສືບຕໍ່ເຮັດໃຫ້ເມືອງເງິນ  ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ຍຸຕິທໍາ ສະກັດກັ້ນທຸກປະກົດການຫຍໍ້ທໍ້ໃນສັງຄົມໃຫ້ໄດ້ໂດຍພື້ນຖານ.

 

ໂດຍ: ອິນແປງ ແຫວນຄໍາ


Post a Comment

0 Comments