ເປີດງານ ບຸນນິທັດສະການປື້ມ ຄັ້ງທີ 15 ປະຈໍາປີ 2018 ຢູ່ທີ່ ຫໍສະໝຸດແຫ່ງຊາດ ນະຄອນຫຼວງວຽງຈັນ




ຫໍສະຫມຸດແຫ່ງຊາດ ຮ່ວມກັບ ພະແນກສຶກສາທິການ ແລະ ກິລາ ນະຄອນຫລວງວຽງຈັນ, ສະມາຄົມຮ່ວມນໍາໃຈເດັກນ້ອຍລາວ ແລະ ພາກສ່ວນກ່ຽວຂອງ ໄດ້ຈັດງານ ບຸນນິທັດສະການປືມ ປະຈໍາປີ 2018 ລະຫວ່າງວັນທີ 23 ແລະ 24 ມີນາ 2018 ຂື້ນ ຢູ່ທີ່ ຫໍສະໝຸດແຫ່ງຊາດ ນະຄອນຫຼວງວຽງຈັນ. ເຊີ່ງໃນພິທີເປີດເຂົ້າຮ່ວມເປັນປະທານໂດຍມີ ພະອາຈານໃຫຍ່ ປະລີນຍາເອກ ມະຫາເວດ ມະເສໄນ ຮອງປະທານສູນກາງ ອົງການພຸດທະສາດສະໜາສໍາພັນລາວ, ມີ ທ່ານ ບົວເງີນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ພ້ອມດ້ວຍບັນດາຫົວຫນ້າກົມ, ຫົວຫນ້າພະແນກ, ບັນດານັກຂຽນ-ນັກປະພັນ, ຫລາຍທ່ານທີ່ມີຊື່ສຽງ ທັງເກົ່າ ແລະ ໃຫມ່ ລວມທັງລຸ້ນຫນຸ່ມນ້ອຍ, ແຂກທີ່ຖືກເຊີນ, ຄູ-ອາຈານ ແລະ ນັກຮຽນ-ນັກສຶກສາ ທີ່ມາຈາກໂຮງຮຽນແຫ່ງຕ່າງໆເຂົ້າຮ່ວມເປັນຈໍານວນຫລວງຫລາຍ.





ໃນງານ ທ່ານນາງ ຂັນທະມາລີ ຍັງນຸວົງ ອໍານວຍການຫໍສະໝຸດແຫ່ງຊາດ ໄດ້ຂື້ນກ່າວລາຍງານໃຫ້ຮູ້ວ່າ: ງານບຸນນິທັດສະການປື້ມແມ່ນໄດ້ມີການຈັດຂື້ນໃນທຸກໆປີ ເພື່ອເປັນການສົ່ງເສີມການອ່ານ ແລະ ເຮັດໃຫ້ເດັກ, ພໍ່ແມ່, ພະສົງສາມະເນນ ແລະ ທຸກຄົນໃນທົ່ວສັງຄົມ ໄດ້ຮັບຮູ້ເຖິງວຽກງານສົ່ງເສີມການອ່ານ ແລະ ການຈັດພີມປື້ມສໍາລັບເດັກ, ປື້ມທໍາມະ ແລະ ປືມອ່ານທົ່ວໄປ ໃຫ້ທຸກຄົນຫັນມາສົນໃຈ ແລະ ເຫັນເຖິງຄວາມຈໍາເປັນຂອງການອ່ານ ໃຫ້ທຸກຄົນໄດ້ມີໂອກາດສໍາພັດ ແລະ ຊຶມຊັບເອົາຄວາມມ່ວນ ອອນຊອນ, ຄະຕິທໍາ ແລະ ສາລະຄວາມຮູ້ ເພື່ອສົ່ງເສີມໃຫ້ທຸກຄົນ ໃນຄອບຄົວ, ໃນໂຮງຮຽນ, ໃນວັດ ແລະ ໃນທົ່ວສັງຄົມ ມີຄວາມສົນໃຈ ແລະ ມັກໃນການອ່ານຫຼາຍຂື້ນ ທັງເປັນການຊຸກຍູ້ ແລະ ເສີມຂະຫຍາຍຜົນງານ ແລະ ສື່ສິ່ງພີມ ທີ່ເປັນມູນເຊື້ອ ແລະ ພູມປັນຍາຂອງຄົນລາວ.


ງານດັ່ງກ່າວແມ່ນຈັດຂື້ນເປັນເວລາ 2 ວັນ ໃນວັນທີ 23-24 ມີນາ 2018 ທີ່ຫໍສະໝຸດແຫ່ງຊາດ, ເມືອງໄຊທານີ ນະຄອນຫຼວງວຽງຈັນ, ພາຍໃຕ້ຫົວຂໍ້ ເປີດໂລກ ເປີດໃຈ ເປີດປື້ມອ່ານ ເປີດຈີນຕະນາການ, ເພື່ອເປັນການສົ່ງເສີມການອ່ານ, ການຂຽນ, ການພີມຈໍາໜ່າຍ ສື່ສິ່ງພີມພາຍໃນປະເທດ , ເຮັດໃຫ້ງານເປັນເວທີສົນທະນາ ການພົບປະແລກປ່ຽນ ລະຫວ່າງ ຜູ້ອ່ານ ແລະ ຜູ້ຂຽນ ເພື່ອສ້າງກິດຈະກໍາຕ່າງໆ ກ່ຽວກັບການອ່ານ, ການຂຽນ ການແຕ້ມຮູບ ໂດຍໃຫ້ມວນຊົນໄດ້ມີສ່ວນຮ່ວມ ແລະ ໄດ້ມີຄວາມຮູ້ ຄວາມເຂົ້າໃຈກ່ຽວກັບປື້ມອ່ານ ພາຍໃນງານຍັງປະກອບມີ ກິດຈະກໍາຕ່າງໆ ທີ່ເຮັດໃຫ້ງານມີສີສັນ, ເປັນເວທີໃຫ້ແກ່ການພົບປະແລກປ່ຽນ ຜູ້ອ່ານ - ຜູ້ຂຽນ ພ້ອມທັງເປັນການປູກຈິດສໍານຶກໃຫ້ແກ່ນ້ອງນຸ່ງ - ລູກຫຼານ ໃຫ້ມີຈິດໃຈມັກຮັກໃນການສຶກສາ ຄົ້ນຄົ້ວ-ຮໍ່າຮຽນ ແລະ ສ້າງແຮງບັນດາໃຈໃຫ້ແກ່ຜູ້ທີ່ເຂົ້າມາທ່ຽວຊົມພາຍໃນງານອີກດ້ວຍ.



ພາຍໃນງານມີການວາງສະແດງ ແລະ ຈໍາໜາຍປື້ມຈາກຫລາຍພາກສ່ວນ ເຂົ້າຮ່ວມໃນງານ ແລະ ມີການສາທິດຈານໃບລານທີ່ຫາເບິ່ງໄດ້ຍາກ, ການນໍາສະເໜີປື້ມ, ການສະແດງລະຄອນຈາກປື້ມ, ການແຂ່ງຂັນອ່ານກາບກອນ, ເລົ່ານິທານ ແລະ ສະແດງລະຄອນ, ການສະແດງລະຄອນຄໍາກອນ ສັງສີນໄຊ, ສູດສາລະພັນ, ເທດ, ລໍາແຫຼ່ ແລະ ອື່ນໆ. ພາບ ແລະ ຂ່າວ : ໂຊກດີ 



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments