ຄະນະສານອາຍາ ສານປະຊາຊົນຂັ້ນຕົ້ນ ແຂວງອຸດົມໄຊ ຕັດສິນ 2 ປີ ແຕ່ໃຫ້ປະຕິບັດໂທດ 1 ເດືອນ 22 ວັນ ໃນສະຖານລະເມີດກົດຈະລາຈອນ ເຮັດໃຫ້ຄົນອື່ນເສຍຊີວິດ



ໃນທ້າຍອາທິດຜ່ານມາ, ຄະນະສານອາຍາ ສານປະຊາຊົນຂັ້ນຕົ້ນ ແຂວງອຸດົມໄຊ ໄດ້ນຳເອົາຄະດີລະເມີດການສັນຈອນ ເຮັດໃຫ້ເກີດອຸບັດຕິເຫດ ແລ້ວພາໃຫ້ຄົນອື່ນເສຍຊີວິດ ໂດຍມີຈໍາເລີຍຊື່ ທ້າວ ເຢີວາງ ອາຍຸ 30 ປີ ຢູ່ບ້ານນໍ້າຖ້ວມໃຕ້ ເມືອງນໍ້າບາກ ແຂວງຫຼວງພະບາງ ຂຶ້ນມາພິຈາລະນາຕັດສິນໂດຍສານຕັດສິນຕັດອິດສາລະພາບ 2 ປີ ໃຫ້ປະຕິບັດໂທດໜຶ່ງເດືອນ ກັບ 22 ວັນ. ສ່ວນໂທດທີ່ເຫຼືອແມ່ນຝາກໂທດໄວ້ ແລະ ປັບໃໝ 150.000 ກີບ.   



ຄະດີດັ່ງກ່າວ, ຈໍາເລີຍຖືກກັກຕົວໃນວັນທີ 1 ມັງກອນ 2018 ຜ່ານການວິນິດໄສຂອງຄະນະສານອາຍາ ຈຶ່ງໄດ້ຕັດສິນຈຳເລີຍມີຄວາມຜິດທາງອາຍາ, ລົງໂທດຕັດອິດສາລະພາບ 2 ປີ, ໃຫ້ປະຕິບັດໂທດໜຶ່ງເດືອນ ກັບ22 ວັນ. ສ່ວນໂທດທີ່ເຫຼືອ 1 ປີ 10 ເດືອນ ກັບ 8 ວັນ ແມ່ນຝາກໂທດໄວ້ ແລະ ປັບໃໝເປັນເງິນ 150.000 ກີບ ແມ່ນໃຫ້ຝາກໂທດໄວ້. ຖ້າພາຍໃນກຳນົດເວລາດັ່ງກ່າວ ຈຳເລີຍຫາກບໍ່ໄດ້ກະທຳຜິດໂດຍເຈດ ຕະນາອີກ ໂທດທີ່ຝາກໄວ້ນັ້ນກໍຈະໝົດ, ແຕ່ຖ້າຈຳເລີຍຫາກໄດ້ກະທຳຜິດເທື່ອໃໝ່. ສານຈະໄດ້ໃຫ້ຕັດອິດສະຫຼະພາບ ປະຕິບັດໂທດໃໝ່ ລວມທັງໂທດເກົ່າທີ່ຝາກໄວ້ຕື່ມອີກ.


ໃນວັນດຽວກັນນີ້, ຄະນະສານອາຍາ ສານປະຊາຊົນຂັ້ນຕົ້ນ ແຂວງອຸດົມໄຊ ໄດ້ຕັດສິນຈຳເລີຍຊື່ ທ້າວ ຊາຍເຊີ ຫຼື ໄຊເຊີ ວື ອາຍຸ 58 ປີ ຢູ່ບ້ານໂຮມສຸກ ເມືອງໄຊ ແຂວງອຸດົມໄຊ ໃນສະຖານຄ້າຂາຍຢາເສບຕິດ ແລະ ມີຢາເສບຕິດໄວ້ໃນຄອບຄອງ, ໂດຍຕັດອິດສາລະພາບ 10 ປີ ແລະ ປັບໃໝ 100 ລ້ານກີບ, ພ້ອມທັງຮິບຢາເສບຕິດປະເພດຢາບ້າ ຈຳນວນ 9 ຖົງ ລວມມີຢາ 1.533 ເມັດ, ໜັກ 143 ກຼາມ, ແປ້ງຝຸ່ນສີຂາວ 4 ຖົງ ໜັກ 3,1 ກິໂລກຼາມ, ແປ້ງຝຸ່ນສີຂາວ 1 ຖົງ ໜັກ 300 ກຼາມ, ແປ້ງຝຸ່ນສີແດງ 2 ຖົງ ໜັກ 183,8 ກຼາມ, ແປ້ງຝຸ່ນສີບົວ 1 ຖົງ ໜັກ 65,9 ກຼາມ, ແປ້ງຝຸ່ນສີຂຽວ 1 ຖົງ ໜັກ 95,5 ກຼາມ, ແປ້ງຝຸ່ນສີກາເຟ 2 ຖົງ ໜັກ 280 ກຼາມ, ຖົງຢາງໃສ່ຢາບ້າເປົ່າ ໜັກ 1,5 ກິໂລກຼາມ, ເຫຼັກອັດຢາບ້າ 12 ລູກ ໄປທຳລາຍຖິ້ມ. ຄະດີດັ່ງກ່າວນີ້ ເຈົ້າໜ້າທີ່ ປກສ ແຂວງອຸດົມໄຊ ມ້າງໄດ້ໃນວັນທີ 7 ທັນວາ 2017 ຜ່ານມາ.ພາບ-ຂ່າວ : ປກສ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments