ກອງປະຊຸມສະຫຼຸບຕີລາຄາວຽກງານກະສິກຳ ແລະ ປ່າໄມ້ ປະຈຳປີ 2017 ຂອງເມືອງເງິນ




ເພື່ອເປັນການສະຫຼຸບຕີລາຄາ ການຈັດຕັ້ງປະຕິບັດວຽກງານ ໃນໄລຍະ 1 ປີຜ່ານມາ. ມາໃນວັນທີ 14 ມີນາ 2018 ນີ້ ຢູ່ທີ ສະໂມສອນ ເມືອງເງິນ ແຂວງ ໄຊຍະບູລີ ໄດ້ເປີດກອງປະຊຸມສະຫຼຸບຕີລາຄາວຽກງານກະສິກຳ ແລະ ປ່າໄມ້ ປະຈຳປີ2017 ພາຍໃຕ້ການເປັນປະທານຂອງ ທ່ານ ທະວີສັກ ໄຊຍະວົງ ຄະນະປະຈໍາພັກເມືອງ ຮອງເຈົ້າເມືອງ, ມີທ່ານ ຄຳພຸດ ອິນທະວົງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີຫົວໜ້າຫ້ອງການກະສິກຳ ແລະ ປ່າໄມ້ເມືອງ, ມີກຳມະການພັກເມືອງ, ຫົວໜ້າຫ້ອງການ, ກົມກອງ, ຕ່າງໜ້າພະແນກ, ທະນະຄານ, ດ່ານສາກົນນ້ຳເງິນ, ບັນດານັກທຸລະກິດ ຜູ້ປະກອບການ, ເລຂາໜ່ວຍພັກນາຍບ້ານ, ພະນັກງານວິຊາການ, ແລະ ກະສິກຳບ້ານ ເຂົ້າຮ່ວມ.




ທ່ານ ອຸດອນ ສະກຸນທອງ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງ ກໍ່ໄດ້ຂື້ນ ຜ່ານບົດສະຫຼຸບຕີລາຄາວຽກງານກະສິກຳ ແລະ ປ່າໄມ້ ປະຈຳປີ 2017. ໄລຍະຜ່ານມາ ການພັດທະນາວຽກງານກະສິກຳ ໄດ້ມີບາດກ້າວຂະຫຍາຍຕົວຢ່າງໜັກແໜ້ນ, ພື້ນຖານໂຄ່ງລ່າງທາງດ້ານກະສິກຳໄດ້ຮັບການພັດທະນາ ເປັນຕົ້ນແມ່ນ ຊົນລະປະທານ, ເສັ້ນທາງ ເຂົ້າຫາເຂດ ກະສິກຳ ເຊີ່ງສາມາດຍູ້ແຮງການຜະລິດກະສິກຳ ສາມາດຜະລິດກຸ້ມຕົນເອງທາງດ້ານສະບຽງອາຫານ ໂດຍສະເພາະ ແມ່ນເຂົ້າ, ຊີ້ນ, ປາ. 



ໃນຊຸມປີຜ່ານມາ ການຂະຫຍາຍຕົວຂອງຂະແໜງກະສິກຳ ແລະ ປ່າໄມ້ ຢູ່ໃນລະດັບ 5,4 % ລວມຍອດຜະລິດຕະພັນພາຍໃນ (GDP) ໄດ້ 34,88%, ທົ່ວເມືອງ ມີເນີ້ອທີນາທັງໝົດ 702,29 ຮຕ ຜົນຜະລິດໄດ້ 3.792 ໂຕນ, ເຂົ້າເນີນສູງ 1.426,5 ຮຕ ຜົນຜະລິດໄດ້ 3.281 ໂຕນ, ການລ້ຽງສັດ ແມ່ນໄດ້ຊຸກຍູ້ໃຫ້ຊາວກະສິກອນ ຫັນມາລ້ຽງສັດ ແບບເປັນກຸ່ມເປັນຝາມ ປະຈຸບັນທົ່ວເມືອງມີສັດລ້ຽງທັງໝົດ 252.074 ໂຕ, ວຽກງານຄຸ້ມຄອງປ່າໄມ້ ແມ່ນໄດ້ເອົາໃຈໃສ່ຄຸ້ມຄອງກວດກາ ປ່າໄມ້ 3 ປະເພດຄື: ປ່າສະຫງວນ 27 ແຫ່ງ, ປ່າປ້ອງກັນ 28 ແຫ່ງ, ປ່າ ຜະລິດ 27 ແຫ່ງ ມີເນື້ອທີທັງໝົດ 52.936,42 ຮຕ.


ຄາດໝາຍສູ້ຊົນ ປີ 2018 ສູ້ຊົນເຮັດໃຫ້ການຂະຫຍາຍຕົວຂອງຂະແໜງກະສິກຳ ແລະ ປ່າໄມ້ ໃນລະດັບ 5,3%, ສູ້ຊົນຜະລິດເຂົ້າໃຫ້ໄດ້ 7.866,12 ໂຕນ ໃນເນື້ອທີ 2.208,29 ຮຕ, ຜະລິດສະບຽງອາຫານໃຫ້ໄດ້ 3.575 ໂຕນ, ຜະລິດພືດເປັນສີ້ນຄ້າ 26.250 ໂຕນ. ນີ້ກໍ່ເພື່ອເປັນການ ຜະລິດກະສິກຳໄປສູ່ຄວາມໝັ້ນຄົງ, ຄວາມຍືນຍົງ, ທັງເປັນກະສິກຳສະອາດ, ແລະ ທັນສະໄໝ.



ກອງປະຊຸມ ແຕ່ລະພາກສ່ວນກໍ່ໄດ້ພ້ອມກັນປະກອບຄຳຄິດເຫັນ ຢ່າງກົງໄປກົງມາ ເພື່ອຊອກໃຫ້ເຫັນຈຸດດີ, ຂໍ້ຄົງຄ້າງ ແລະ ຊອກຫາວິທີແກ້ໄຂ ໃນຕໍ່ໜ້າ.


ໂດຍ: ອິນແປງ ແຫວນຄຳ 







Post a Comment

0 Comments