ຊົມເຊີຍພິທີເປີດການໃຊ້ສາລາບ່ອນນັ່ງລໍຖ້າລົດ ແລະ ງານສະໜັບສະໜູນປີທ່ອງທ່ຽວລາວ 2018



ງານເປີດການນໍາໃຊ້ສາລາບ່ອນນັ່ງລໍຖ້າລົດເມ ແລະ ງານສະໜັບສະໜູນ ປີທ່ອງທ່ຽວລາວ 2018 ໄດ້ຈັດຂຶ້ນເຊົ້າວັນທີ 28/03/2018 ທີ່ຫ້ອງການນະຄອນຫຼວງວຽງຈັນ ຊັ້ນ III ໂດຍການເປັນປະທານຂອງ ທ່ານ ແກ້ວພິລາວັນ ອາໄພລາດ, ຮອງເຈົ້າຄອງນະຄອນຫຼວງວຽງຈັນ ແລະມີແຂກກິດຕິມາສັກ ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ແລະ ທ່ານ ສະຫວັນຄອນ ຮາຊມົນຕີ, ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ພ້ອມດ້ວຍ ແຂກຜູ້ມີກຽດຈາກພາກສ່ວນທີ່ກ່ຽວຂ້ອງ.

ຄວາມເປັນມາຂອງໂຄງການກໍ່ສ້າງບ່ອນນັ່ງລໍຖ້າລົດເມ ໄດ້ເລີ່ມເຮັດການສໍາຫຼວດຈຸດທີ່ຕັ້ງ ແລະ ດຳເນີນການກໍ່ສ້າງສາລາບ່ອນນັ່ງລໍຖ້າລົດເມ ຕັ້ງແຕ່ຕົ້ນປີ 2017 ໂດຍ ບໍລິສັດ ບລູກຣາດສ໌ ດີຊາຍ ກຣຸບ ຈໍາກັດຜູ້ດຽວ (BlueGrass Design Group Sole Co., Ltd) ເປັນຜູ້ຮັບຜິດຊອບຄ່າໃຊ້ຈ່າຍທັງໝົດໃນການກໍ່ສ້າງ ແລະ ເປັນການຊ່ວຍເຫຼືອຫຼ້າໃຫ້ແກ່ລັດຖະບານ ໂດຍໂຄງການດັ່ງກ່າວໄດ້ຖືກຕິດຕາມ ແລະ ກວດກາ ຈາກອົງການປົກຄອງນະຄອນຫຼວງວຽງຈັນ, ພະແນກ ໂຍທາທິການ ແລະ ຂົນສົ່ງນະຄອນຫຼວງວຽງຈັນ, ລັດວິສາຫະກິດລົດເມນະຄອນຫຼວງວຽງຈັນ, ອົງການ JICA ແລະ ຄະນະກໍາມະການຜູ້ຮັບຜິດຊອບ.



ສໍາລັບການອອກແບບສາລາບ່ອນນັ່ງລໍຖ້າລົດເມ ແມ່ນອອກແບບໂດຍບໍລິສັດ ບລູກຣາດສ໌ ດີຊາຍ ກຣຸບ ຈໍາກັດຜູ້ດຽວ ໂດຍມີການດັດແປງຫຼາຍຄັ້ງໂດຍຄະນະກຳມະການຜູ້ຮັບຜິດຊອບ ເພື່ອໃຫ້ມີຮູບຮ່າງທີ່ເໝາະສົມ, ແຂງແຮງ, ມີເອກະລັກສະເພາະຂອງລາວ, ມີການຈັດແບ່ງພື້ນທີ່ໄວ້ສໍາລັບສະແດງເສັ້ນທາງເດີນລົດເມ ກັບ ພື້ນທີ່ເພື່ອການໂຄສະນາປະຊາສຳພັນໂດຍສະເພາະ ແລະອອກແບບມາໃຫ້ມີຕູ້ໄຟເພື່ອໃຫ້ແສງສະຫວ່າງໃນຍາມກາງຄືນ.

ຈຸດປະສົງຂອງງານ ຂອງໂຄງການກໍ່ສ້າງສາລາບ່ອນນັ່ງລໍຖ້າລົດເມຈຸດປະສົງ ເພື່ອລົງທຶນພັດທະນາກໍ່ສ້າງບ່ອນນັ່ງລໍຖ້າລົດເມຂອງຜູ້ໂດຍສານຕາມເສັ້ນທາງຫຼວງ ພາຍໃນນະຄອນຫຼວງວຽງຈັນ; ໂດຍສະເພາະ ເພື່ອສ້າງຄວາມສະດວກໃຫ້ແກ່ຜູ້ໃຊ້ບໍລິການລົດເມຕາມເສັ້ນທາງຫຼວງພາຍໃນນະຄອນຫຼວງວຽງຈັນ ໄດ້ມີບ່ອນນັ່ງລໍຖ້າທີ່ເປັນລະບຽບຮຽບຮ້ອຍ - ຈົບງາມ ແລະ ສ້າງໂສມໜ້າໃໝ່ໃຫ້ແກ່ຕົວເມືອງນະຄອນຫຼວງວຽງຈັນ.




ພາຍໃນງານ ທ່ານ ປຣະເສີດ ບັນຈົງພັກດີ ໄດ້ກ່າວລາຍງານຄວາມເປັນມາຂອງໂຄງການວ່າ: ພາຍໃນປີ 2017 ທີ່ຜ່ານມາໄດ້ນໍາເຂົ້າ ສາລາບ່ອນນັ່ງລໍຖ້າລົດເມທັງໝົດ 60 ຊຸດ ແລະປ້າຍຈອດລົດເມ 100 ປ້າຍ. ປັດຈຸບັນໄດ້ກໍ່ສ້າງສາລາບ່ອນນັ່ງລໍຖ້າລົດເມ ສໍາເລັດໄປແລ້ວ 60 ຈຸດ ຕາມເສັ້ນທາງຕະຫຼາດເຊົ້າ - ວັດໄຕ, ຕະຫຼາດເຊົ້າ - ດົງໂດກ, ຕະຫຼາດເຊົ້າ - ທ່າເດື່ອ ແລະ ເສັ້ນທາງອື່ນໆ ພາຍໃນນະຄອນຫຼວງວຽງຈັນ. ເຊິ່ງລວມມູນຄ່າການລົງທຶນໃນປີທຳອິດແມ່ນປະມານ 4,165,000,000 ກີບ (ສີ່ຕື້ກວ່າກີບ) ແລະ ໃນອານາຄົດແມ່ນຈະສືບດຳເນີນການຕິດຕັ້ງສາລາບ່ອນນັ່ງລໍຖ້າລົດເມ ໃຫ້ຄົບ 150 ຈຸດ ແລະປ້າຍຈອດລົດເມ 100 ປ້າຍ ຕາມຄໍາແນະນໍາຂອງອົງການ JICA ຄາດວ່າມູນຄ່າການລົງທຶນຈະເພື່ອຂຶ້ນເລື້ອຍໆໃນປີຕໍ່ໄປ.




ພາຍໃນງານ ທ່ານ ກິຣິຍາ ບັນຈົງພັກດີ, ຮອງປະທານບໍລິສັດ ບລູກຣາດສ໌ ດີຊາຍ ກຣຸບ ຈໍາກັດຜູ້ດຽວ ຍັງໄດ້ມອບການສະໜັບສະໜູນປີທ່ອງທ່ຽວລາວ 2018 ດ້ວຍເຮັດການໂຄສະນາປະຊາສຳພັນໃສ່ສາລາບ່ອນນັ່ງລໍຖ້າລົດເມ ຈໍານວນ 60 ຈຸດ ແລະ ພາຍນອກລົດເມ ຈໍານວນ 05 ຄັນ ລວມມູນຄ່າທັງໝົດ 2,000,000,000 (ສອງຕື້ກີບ) ຮັບໂດຍ ທ່ານ ສະຫວັນຄອນ ຣາຊມົນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເພື່ອເປັນການປະກອບສ່ວນໃນການໂຄສະນາສະຖານທີ່ທ່ອງທ່ຽວຂອງລາວ.

ຜູ້ກ່າວບົດລາຍງານ ແມ່ນ ທ່ານ ປຣະເສີດ ບັນຈົງພັກດີ ປະທານບໍລິສັດ ບລູກຣາດສ໌ ດີຊາຍ ກຣຸບ ຈຳກັດຜູ້ດຽວ

ຜູ້ມອບເງິນສະຫນັບສະຫນູນປີທ່ອງທ່ຽວລາວ 2018 ແມ່ນ ທ່ານ ກິຣິຍາ ບັນຈົງພັກດີ, ຮອງປະທານບໍລິສັດ ບລູກຣາດສ໌ ຈໍາກັດຜູ້ດຽວ ຜູ້ຮັບເງິນແມ່ນ ທ່ານ ສະຫວັນຄອນ ຣາຊມົນຕີ ຮອງລັດຖະມົນຕີກະຊວງ ຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments