ໂຮມຊຸມນຸມໃຫຍ່ ສະຫລອງວັນສ້າງຕັ້ງ ແຂວງບໍ່ແກ້ວ ຄົບຮອບ 35 ປີ



ພິ​ທີ​ ໂຮມ​ຊຸມ​ນຸມ​ໃຫຍ່ ສະ​ເຫລີມ​ສະ​ຫລອງ ວັນ​ສ້າງ​ຕັ້ງ​ແຂ​ວງບໍ່​ແກ້ວ ຄົບ​ຮອບ 35 ປີ (26 ມີ​ນາ 1983-26 ມີ​ນາ 2018), ໄດ້​ ມີ​ຂຶ້ນ ​ໃນ​ວັນ​ທີ 26 ມີ​ນາ 2018 ຢູ່​ສະ​ໜາມ​ກິ​ລາ ປ່າ​​ອ້ອຍ ເມືອງ​ຫ້ວຍ​ຊາຍ ​ແຂວງບໍ່​ແກ້ວ ໃຫ້​ກຽດ​ເຂົ້າ​ຮ່ວມ ມີ​ທ່ານ ພັນ​ຄຳ ວິ​ພາ​ວັນ ຮອງ​ ປະ​ທານ​ປະ​ເທດ ພ້​ອມ​ດ້ວຍ​ພັນ​ລະ​ຍາ, ທ່ານ ຄຳພັນ ເຜີຍຍະວົງ ເຈົ້າ ແຂວງບໍ່ແກ້ວ, ບັ​ນ​ດາ​ ການ​ນຳ​ພັກ, ລັດ, ພະ​ນັກ​ງານ, ທະ​ຫານ-ຕຳ​ຫລວດ, ນັກ​ຮຽນ-ນັກ​ສຶກ​ສາ, ພ້ອມ​ດ້ວຍ ມວນ​ຊົນຊາວ​ແຂວງບໍ່​ແກ້ວ ເຂົ້າ​ຮ່ວມ​ຢ່າງ​ຫລວງ​ຫລາຍ.



ໃນ​ພິ​ທີ​ ໂຮມ​ຊຸມ​ນຸມ​ດັ່ງ​ກ່າວ, ທ່ານ ຄຳພັນ ເຜີຍຍະວົງ ໄດ້ ​ຂຶ້ນ​ກ່າວ​ຄຳ​ປາ​ໄສ, ໂດຍ​ມີ​ບາງ​ຕອນ ສຳຄັນໃຫ້​ຮູ້​ວ່າ: ຕະ​ຫລອດ​ໄລ​ຍະ 35 ປີ​ຜ່ານ​ມາ ພາຍ​ໃຕ້​ການ​ນຳ​ພາ​ ຂອງ​ອົງ​ຄະ​ນະ​ພັກ​ແຕ່​ລະ​ຮຸ້ນ ພວກ​ເຮົາ ​ໄດ້​ຜ່ານ​ຜ່າ​ທຸກ​ອຸ​ປະ​ສັກ, ຄວາມ​ຫຍຸ້ງ​ຍາກ ​ນາໆ​ປະ​ການ ເພື່ອ​ນຳ​ເອົາ ​ຄວາມ​ສະ​ຫງົບ, ຄວາມ​ເປັນ​ລະ​ບຽບ​ຮຽບ​ຮ້ອຍ ແລະ ຄວາມ​ເປັນ​ຢູ່​ທີ່​ດີ ​​ມາ​ສູ່​ປະ​ຊາ​ຊົນ. ​ແຂວງບໍ່​ແກ້ວ ໄດ້​ຮັບ​ການ​ສ້າງ​ຕັ້ງ​ຂຶ້ນ ໃນ​ວັນ​ທີ 26 ມີ​ນາ 1983 ໃນ​ເວ​ລາ​ນັ້ນ ແຂວງ ບໍ່​ແກ້ວ ​ປະ​ກ​ອບ​ມີ 3 ເມືອງ​ຂຶ້ນ​ກັບ, ເຊິ່ງ​ໄດ້​ແຍກ​ອອກ​ຈາກ​ແຂວງ​ ຫລວງ​ນ້ຳ​ທາ ຄື: ເມືອງ​ຫ້ວຍ​ຊາຍ, ເມືອງ​ຕົ້ນ​ຜິ້ງ ແລະ ເມືອງ​ເມິງ, ມີ​ພົນ​ລະ​ເມືອງ ​ທັງ​ໝົດ 54.441 ຄົນ, ມາ​ຮອດ​ວັນ​ທີ 5 ກໍ​ລະ​ກົດ 1992 ສູນ​ກາງ​ພັກ ໄດ້​ຕົກ​ລົງ ໂອນມອບ​ເມືອງ​ປາກ​ທາ ແລະ ເມືອງ​ຜາ​ອຸ​ດົມ ແຂວງ ​ອຸ​ດົມ​ໄຊ ໃຫ້​ແຂວງບໍ່​ແກ້ວ ຈົນ​ເຖິງ​ປັດ​ຈຸ​ບັນ. ແຂວງບໍ່​ແກ້ວ​ ປະ​ກອບ​ມີ 5 ເມືອງ, 1 ເຂດ​ເສດ​ຖະ​ກິດ​ພິ​ເສດ ​ສາມ​ຫລ່ຽມ​ຄຳ, ມີ​ພົນ​ລະ​ເມືອງ​ທັງ​ໝົດ 183.126 ຄົນ. ນັບ​ແຕ່ ​ໄດ້​ຮັບ​ການ​ສ້າງ​ຕັ້ງ​ຂຶ້ນ ຄະ​ນະ​ນ ຳ​ຂອງ​ແຂວງບໍ່​ແກ້ວ ໄດ້​ອອກ​ແຮງ​ເຄື່ອນ​ໄຫວ​ຊີ້​ນຳ-ນຳ​ພາ ໃນ​ທຸກ​ຂົງ​ເຂດ​ວຽກ​ງານ ໂດຍ​ສະ​ເພາະ ໄດ້​ຫັນ​ລົງ​ກໍ່​ສ້າງ​ຮາກ​ຖານ ການ​ເມືອງ ຖື​ເອົາ​ວຽກ​ງານ ປກ​ສ-ປກ​ຊ, ກໍ່​ສ້າງ​ປັບ​ປຸງ​ພັກ, ອຳ​ນາດ​ການ​ປົກ​ຄອງ​ ໃຫ້​ເຂັ້ມ​ແຂງ​ໜັກ​ແໜ້ນ ຕິດ​ພັນ​ກັບ​ການ​ພັດ​ທະ​ນາ​ ເສດ​ຖະ​ກິດ-ສັງ​ຄົ​ມ ແລະ ແກ້​ໄຂ​ຊີ​ວິດ​ການ​ເປັນ​ຢູ່​ ຂອງ​ພະ​ນັກ​ງານ, ທະ​ຫານ, ຕຳ​ຫລວດ ຕະ​ຫລອດ​ຮອດ​ ປະ​ຊາ​ຊົນ​ບັນ​ດາ​ເຜົ່າ, ກໍ່​ສ້າງ ແລະ ປັບ​ປຸງ ​ກຳ​ລັງ​ຫລວງ, ກຳ​ລັງ​ທ້ອງ​ຖິ່ນ ອັນ​ໄດ້​ເຮັດ​ໃຫ້ ແຂວງບໍ່​ແກ້ວ ມີ​ຄວາມ​ສະ​ຫງົບ ​ໂດຍ​ພື້ນ​ຖານ, ການ​ພັດ​ທະ​ນາ​ຊີ​ວິດ​ ການ​ເປັນ​ຢູ່​ຂອງ​ປະ​ຊາ​ຊົນດີ​ຂຶ້ນ​ເປັນ​ກ້າວໆ.



ໂອ​ກາດ​ດັ່ງ​ກ່າວ, ທ່ານ ພັນ​ຄຳ ວິ​ພາ​ວັນ ຮອງ ປະ​ທານ​​ປະ​ເທດ ແຫ່ງ ສ​ປ​ປ ລາວ ໄດ້​​ ມີ​ຄຳ​ເຫັນ,  ໂດຍ​ໄດ້​ສະ​ແດງ ​ຄວາມ​ຍ້ອງ​ຍໍ​ຊົມ​ເຊີຍ​ ຕໍ່​ຄະ​ນະພັກ, ຄະ​ນະ​ນ ຳ​ຂອງ​ແຂວງ, ເມື​ອງ ຕະ​ຫລອດ​ຮອດ​ປະ​ຊາ​ຊົນ​ ບັນ​ດາ​ເຜົ່າ ຊາວ​ແຂວງບໍ່​ແກ້ວ ທີ່​ໄດ້​ປະ​ກອບ​ສ່ວນ ​ຢ່າງ​ຕັ້ງ​ໜ້າ ເຂົ້າ​ໃນ​ພາ​ລະ​ກິດ​ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ ປະ​ເທດ​ຊາດ ກໍ​ຄື ​ແຂວງບໍ່​ແກ້ວ ຕະ​ຫລອດ​ໄລ​ຍະ 35 ປີຜ່ານ​ມາ, ເຊິ່ງ​ສາ​ມາດ​ຍາດ​ໄດ້​ຜົນ​ສຳ​ເລັດ​ ໃນ​ຫລາຍ​ດ້ານ ເປັນ​ຕົ້ນ ມີ​ສະ​ຖຽນ​ລະ​ພາບ​ທາງ​ດ້ານ​ການ​ເມືອງ ​ໜັກ​ແໜ້ນ, ທົ່ວ​ສັງ​ຄົມ​ມີ​ຄວາມ​ສະ​ຫງົບ, ປອດ​ໄພ ແລະ ເປັນ​ລະ​ບຽບ​ຮຽບ​ຮ້ອຍ, ​ຊີ​ວິດ​ການ​ເປັນ​ຢູ່​ ຂອງ​ປະ​ຊາ​ຊົນ ໄດ້​ຮັບ​ການ​ພັດ​ທະ​ນາ​ ດີ​ຂຶ້ນ​ເປັນ​ກ້າວໆ. ພ້ອມ​ດຽວ​ກັນ​ນັ້ນ, ທ່ານ​ ຮອງ​ປະ​ທານ​ປະ​ເທດ ຍັງ​ໄດ້​ເນັ້ນ​ໃຫ້ ຄະ​ນະ​ພັກ, ຄະ​ນະ​ນຳ​ຂອງ​ ແຂວງ ສືບ​ຕໍ່​ສູ້​ຊົນ​ສ້າງ​ທຸກ​ເງື່ອນ​ໄຂ ​ເຮັດ​ໃຫ້​ເສດ​ຖະ​ກິດຂອງ​ແຂວງ ​ຂະ​ຫຍາຍ​ຕົວ ​ຢ່າງ​ຕໍ່​ເນື່ອງ, ໝັ້ນ​ທ່ຽງ, ຖື​ກ​ທິດ ແລະ ແກ້​ໄຂ​ຄວາມ​ທຸກ​ຍາກ ຂອງ​ປະ​ຊາ​ຊົນໃນ​ທົ່ວ​ແຂວງ ໃຫ້​ໄດ້​ໂດຍ​ພື້ນ​ຖານ, ສ້າງ​ແຂວງບໍ່​ແກ້ວ​ ໃຫ້​ມີ​ພື້ນ​ຖານ​ໂຄງ​ລ່າງ ​ເສດ​ຖະ​ກິດ-ເຕັກ​ນິກ, ວັດ​ທະ​ນະ​ທຳ, ວິ​ທະ​ຍາ​ສາດ ແລະ ບຸກ​ຄະ​ລາ​ກອນ ເພື່ອ​ຮອງ​ຮັບ​ການ​ຊຸກ​ຍູ້​ ພາ​ລະ​ກິດ​ ການ​ຫັນ​ເປັນ​ອຸດ​ສາ​ຫະ​ກຳ ແລະ ທັນ​ສະ​ໄໝ​ໃນ​ອະ​ນາ​ຄົດ.


ຂ່າວ-ພາບ: ທະ​ນູ​ທອງ (ຂປລ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments