ອຍກ ເລື່ອນສະມາຊິກພັກສຳຮອງຂຶ້ນສົມບູນ





ໃນຕອນເຊົ້າວັນທີ 13 ມີນາ ນີ້ ໜ່ວຍພັກຮາກຖານອົງການໄອຍະການແຂວງເຊກອງ ໄດ້ຈັດພິທີເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກປະຊາຊົນປະຕິວັດລາວສະໄໝສຳຮອງຂຶ້ນສົມບູນຈຳນວນ 2 ສະຫາຍ, ຍິງ 2 ສະຫາຍ, ຢູ່ທີ່ຫ້ອງປະຊຸມອົງການໄອຍະການ ໂດຍການເຂົ້າຮ່ວມຂອງສະຫາຍ ປອ ສົມນິດ ສີລິບຸນລ້ຽງ ກໍາມະການພັກແຂວງ,ເລຂາໜ່ວຍພັກຮາກຖານ, ຫົວໜ້າອົງການໄອຍະການແຂວງ, ມີຕາງໜ້າຄະນະຈັດຕັ້ງແຂວງ, ຕາງໜ້າຈາກຄະນະໜ່ວຍພັກອ້ອມຂ້າງ, ມີຄະນະພັກ ຕະຫຼອດສະມາຊິກພັກສົມບູນ ແລະສໍາຮອງອົງການໄອຍະການເຂົ້າຮ່ວມ.





ໃນພິທີ ສະຫາຍ ກາວິນ ແກ້ວຈັນທະວົງ ຮອງຫົວໜ້າຂະແໜງກໍ່ສ້າງພັກ ໄດ້ຜ່ານມະຕິຕົກລົງ ຂອງຄະນະປະຈໍາພັກແຂວງ ເລກທີ 428,429/ຄຈພຂ ວ່າດ້ວຍເລື່ອນສະມາຊິກພັກສໍາຮອງ ຂຶ້ນເປັນສະມາຊິກພັກສົມບູນ ເຊິ່ງມີ 2 ສະຫາຍຄື: ສະຫາຍ ນ. ເພັດສະໝອນ ມະນີວົງ ອາຍຸ 29 ປີ ແລະ ສະຫາຍ ນ. ຄຳໃບ ແສງວົງສາ ອາຍຸ 33 ປີ ຫຼັງຈາກນັ້ນ ສະຫາຍ ສົມນິດ ສີລິບຸນລ້ຽງ ເລຂາໜ່ວຍພັກຮາກຖານ, ຫົວໜ້າອົງການໄອຍະການແຂວງກໍຂຶ້ນຮັບຮອງເອົາທັງ 2 ສະຫາຍ; ນອກຈາກນີ້ ຍັງໄດ້ຈັດພິທີມອບບັດໃຫ້ສະມາຊິກພັກສົມບູນ ຜູ້ທີ່ມີມາດຖານເງື່ອນໄຂຄົບຖ້ວນ ມີທັງໝົດ 2 ສະຫາຍຄື: ສະຫາຍ ຫວັນ ສີວົງດາວ ແລະ ສະຫາຍ ນ.ຄໍາແພງ ຊາດກຸນ ,ເຊິ່ງປັດຈຸບັນມີສະມາຊິກພັກທັງໝົດ 19 ສະຫາຍ, ຍິງ 6 ສະຫາຍ.




ໂອກາດດັ່ງກ່າວ ສະຫາຍ ປອ ສົມນິດ ສີລິບຸນລ້ຽງ ກໍໃຫ້ກຽດມີຄຳເຫັນ ແລະໂອ້ລົມສະມາຊິກພັກສົມບູນ ໃໝ່ ກໍຄືສະມາຊິກພັກທີ່ໄດ້ຮັບບັດ ຈົ່ງເອົາໃຈໃສ່ປະຕິບັດຄຳປະຕິຍານຂອງຕົນຢ່າງເຂັ້ມງວດຄຽງຄູ່ກັບການປະຕິບັດສິດ, ໜ້າທີ່ ແລະຂໍ້ຫ້າມຂອງສະມາຊິກພັກ, ຍົກສູງດ້ານຄຸນທາດການເມືອງ,ຢຶດໝັ້ນອຸດົມການສັງຄົມນິຍົມຢ່າງໜັກແໜ້ນ, ມີຄວາມຈົ່ງຮັກພັກດີຕໍ່ປະເທດຊາດ,ບຸກບືນເຮັດວຽກໃຫ້ຫຼ້ອນໜ້າທີ່ຕາມທີ່ພັກ ແລະລັດ ກໍຄືການຈັດຕັ້ງຂັ້ນເທິງມອບໝາຍໃຫ້, ເພີ່ມທະວີຄວາມສາມັກຄີ, ຄວາມເປັນເອກະພາບ ເພື່ອພ້ອມກັນເສີມຂະຫຍາຍໝາກຜົນ, ຜົນງານ ແລະມູນເຊື້ອອັນດີງາມຂອງພັກທີ່ເປັນປະໂຫຍດແກ່ການຈັດຕັ້ງ, ສັງຄົມ ກໍຄືປະເທດຊາດ ທັງນີ້ ກໍເພື່ອເປັນກຳລັງແຮງໃນການສ້າງໜ່ວຍພັກທີ່ຕົນສັງກັດຢູ່ໃຫ້ມີຄວາມເຂັ້ມແຂງຂຶ້ນເລື້ອຍໆ.




ຕອນທ້າຍສະຫາຍເລຂາຄະນະພັກຮາກຖານ ໄດ້ເນັ້ນໃຫ້ສະມາຊິກພັກທຸກສະຫາຍເອົາໃຈໃສ່ຄົ້ນຄວ້າເຊື່ອມຊຶມແນວທາງນະໂຍບາຍ, ມະຕິຄຳສັ່ງຂອງພັກ, ລັດຖະທຳມະນູນ ແລະກົດໝາຍຂອງລັດ, ເພີ່ມທະວີຍົກສູງພາລະບົດບາດການນຳພາຂອງພັກເຂົ້າໃນທຸກຂົງເຂດວຽກງານ, ຕ້ານ ແລະສະກັດກັ້ນແນວຄິດເອກະຊົນ, ອາດຍາສິດ, ແນວຄິດທ້ອງຖິ່ນ, ສວຍໃຊ້ໜ້າທີ່ຕຳແໜ່ງສໍ້ລາດບັງຫຼວງ, ຫຼິ້ນກິນຟຸມເຟືອຍ ແລະອື່ນໆທີ່ສ້າງຄວາມເຊື່ອມເສຍແກ່ການຈັດຕັ້ງພັກ, ປະກອບສ່ວນເຂົ້າໃນການກໍສ້າງພັກເຮັດໃຫ້ພັກປອດໃສ, ໜັກແໜ້ນ, ເຂັ້ມແຂງທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ເຂັ້ມແຂງທາງດ້ານແບບແຜນວິທີນຳພາ, ດຳເນີນການຕຳນິຕິຊົມຕົນເອງ ແລະ ຕິຊົມໝູ່ເພື່ອນເປັນປະຈຳຢ່າງເຂັ້ມງວດ.


ພາບ-ຂ່າວ: ພຸດທະສອນ (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments