ຮອງນາຍົກລັດຖະມົນຕີ ໂອ້ລົມພະນັກງານຫລັກແຫລ່ງ ກະຊວງພະລັງງານ ແລະ ບໍ່ແຮ່



ໃນ​ໂອກາດ​ສຳ​ເລັດ ກອງປະຊຸມປະຈຳປີ 2017 ຂອງກະຊວງ ພະລັງງານ ແລະ ບໍ່ແຮ່ ​ໃນ ວັນທີ 30 ມີນານີ້ ຢູ່ຫໍປະຊຸມແຫ່ງຊາດ, ທ່ານ ສອນໄຊ ສີພັນດອນ ຮອງ ນາຍົກລັດຖະມົນຕີ ໄດ້​ໃຫ້ກຽດ​ໂອ້​ລົມ  ພະນັກງານ​ຫລັກ​ແຫ​ລ່ງ ຂອງ ​ກະຊວງ​ດັ່ງກ່າວ ​ໂດຍສະ​ແດງ​ ຄວາມຊົມ​ເຊີຍ ​ແລະ ຕີລາຄາສູງ ຕໍ່ຜົນງານທີ່​ຍາດ​ມາ​ໄດ້ ຂະແຫນງການພະລັງງານ ແລະ ບໍ່ແຮ່ ​ໃນ​ໄລຍະ​ຜ່ານ​ມາ  ເຊິ່ງເປັນ ຂະແຫນງການຫນຶ່ງ ທີ່ສຳຄັນ ຢູ່ໃນໂຄງປະກອບ ຂອງເສດຖະກິດແຫ່ງຊາດ ​ແລະ ​ເປັນ​ຂະ​ແໜງການ  ທີ່ມີຄວາມສຳຄັນຫລາຍ ໃນຂະບວນການພັດທະນາ ປະເທດຊາດ ໃຫ້ຈະເລີນຮຸ່ງເຮືອງ ແລະ ມັ່ງຄັ່ງ ເຂັ້ມແຂງ.



ທ່ານ ຮອງ​ນາຍົກລັດຖະມົນຕີ ຍັງ​ໄດ້​ສະ​ແດງ​ຄວາມຊົມເຊີຍ ບັນດາພະນັກງານການ​ນຳ ທີ່ໄດ້ ເອົາໃຈໃສ່ນຳພາ, ປຸກລະດົມ ທາງດ້ານແນວຄິດ ຕິດພັນກັບການ ບຳລຸງກໍ່ສ້າງ, ການນຳໃຊ້ ແລະ ການຝຶກອົບຮົມ ພະນັກງານລັດຖະກອນ, ນາຍຊ່າງກຳມະກອນໄຟຟ້າ ແລະ ບໍ່ແຮ່ ໃຫ້ເຕີບໃຫຍ່ ຂະຫຍາຍຕົວ ສາມາດຕອບສະຫນອງ ຕໍ່ຄວາມ ຮຽກຮ້ອງຕ້ອງການ ໃນການປະຕິບັດຫນ້າທີ່ ວຽກງານໄດ້ເປັນຢ່າງດີ. ມາຮອດປັດຈຸບັນ, ສປປ ລາວ ​ໄດ້​ສຸມ​ໃສ່​ຍົກລະດັບ ການພັດທະນາດ້ານ  ພະ ລັງງານ ແລະ ບໍ່ແຮ່ ໂດຍສະເພາະ  ແມ່ນການກໍ່ສ້າງ ແຫລ່ງຜະລິດ ພະລັງງານໄຟຟ້າ, ລະບົບຕາຫນ່າງ ໄຟຟ້າ, ການຂຸດຄົ້ນ ແລະ ຄຸ້ມຄອງແຮ່ທາດ ນັບທັງ ການຄົ້ນຄວ້າ, ຍາດແຍ່ງຊອກຫາ ແຫລ່ງທຶນ ຈາກ ພາຍໃນ ແລະ ຕ່າງປະເທດ ແລະ ອື່ນໆ ​ໄດ້​ຮັບໝາກຜົນ​ດີ ​ສົມຄວນ. ຄຽງຄູ່ກັບຜົນງານ ແລະ ຜົນສຳເລັດ ທີ່ຍາດມາໄດ້ ໃນໄລຍະ ຜ່ານມານັ້ນ, ຍັງ​ເຫັນ​ວ່າ ຄວາມ ຫຍຸ້ງຍາກ ແລະ ບັນຫາທີ່ຍັງ ຄົງຄ້າງ ​ເຊິ່ງຍັງມີຫລາຍດ້ານທີ່ ຕ້ອງເອົາໃຈໃສ່ ແກ້ໄຂ ເປັນຕົ້ນ ແມ່ນຍັງມີບາງດ້ານ ເຮັດບໍ່ໄດ້ຕາມ ແຜນງານ-ໂຄງການ ທີ່ວາງອອກ, ການຄຸ້ມຄອງບໍລິຫານ ໃນເງື່ອນໄຂໃຫມ່ ຍັງບໍ່ທັນໄດ້ດີ, ມີບາງດ້ານ ກໍຍັງບໍ່ຖ່ວງທັນ ກັບສະພາບການ ແລະ ຄວາມຮຽກຮ້ອງຕ້ອງການ, ອັນພາໃຫ້ ເກີດ ການສູນເສຍກາ ລະໂອກາດ ທີ່ຄວນໄດ້ ແລະ ອື່ນໆ.

ທ່ານ ຮອງນາຍົກລັດຖະມົນຕີ ​ໄດ້ຮຽກຮ້ອງ ມາຍັງຄະນະພັກ, ຄະນະນຳກະຊວງ ຕະຫລອດ ຮອດພະນັກງານ-ລັດຖະກອນ ຈົ່ງໄດ້ເພີ່ມທະວີ ຄວາມຮັບຜິດຊອບໜ້າທີ່ ການເມືອງຂອງຕົນ ໃຫ້ສູງ ຂຶ້ນກ່າວເກົ່າ ເພື່ອເຮັດໃຫ້ຂະແຫນງການ ພະລັງງານ ແລະ ບໍ່​ແຮ່ ກ້າວຂຶ້ນຢ່າງບໍ່ຢຸດຢັ້ງ, ເພື່ອເຮັດໃຫ້ ຄຸນນະພາບ ການຕິດຕາມ, ກວດກາ, ຄຸ້ມຄອງ ແລະ ການພັດທະນາ ໃຫ້ມີຜົນ ສຳເລັດດີຂຶ້ນ ກວ່າ ເກົ່າໃນເງື່ອນໄຂໃຫມ່, ປະກອບສ່ວນເຂົ້າ ໃນການຈັດຕັ້ງຜັນຂະຫຍາຍ ແນວທາງ ການປ່ຽນແປງໃຫມ່ ຂອງພັກ ກໍ​ຄື​ການຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ ໃຫ້ປະກົດຜົນເປັນຈິງ.


ຂ່າວ:ສຸກ​ສະຫວັດ-​ພາບ:​ເກດ (ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments