ຄອບຄົວຫັດຖະກຳຕໍ່າຫູກ ກຸ່ມບ້ານໂພວາສ້າງລາຍຮັບໄດ້ເກືອບ 20 ລ້ານກີບຕໍ່ປີ




ການປະກອບອາຊີບໃດໜຶ່ງໃນການສ້າງລາຍຮັບເຂົ້າສູ່ຄອບຄົວ ເພື່ອນຳພາຄອບຄົວຕົນຫຼຸດພົ້ນອອກຈາກຄວາມທຸກຍາກ ແລະ ມີຊີວິດການເປັນຢູ່ທີ່ດີ ກ້າວໄປສູ່ການສ້າງລາຍຮັບທີ່ໝັ້ນຄົງ ຕາມແນວທາງນະໂຍບາຍຂອງພັກ ແລະ ເປົ້າໝາຍຂອງລັດວາງອອກ. ຢາກເຮັດໄດ້ຄືແນວນັ້ນແມ່ນຕ້ອງມີຄວາມດຸໝັ່ນ, ຫ້າວຫັນ, ອົດທົນ ແລະ ເຮັດແບບຕໍ່ເນື່ອງ ດັ່ງກຸ່ມຫັດຖະກຳຕໍ່າຫູກບ້ານໂພວາ ເມືອງມະຫາໄຊ ແຂວງຄຳມ່ວນ ທີ່ຢຶດຖືການຕໍ່າຫູກແຜ່ນແພ ທີ່ມີມູນເຊື້ອສືບຕໍ່ກັນມາຈາກຮຸ່ນສູ່ຮຸ່ນ ຈົນເຖິງປະຈຸບັນ.



ທ່ານ ນາງ ສີພະສຽນ ພັນໂພທິລາດ ເຊິ່ງເປັນຫົວໜ້າກຸ່ມຕໍ່າຫູກ ບ້ານໂພວາ ກ່າວໃຫ້ຮູ້ວ່າ: ອາຊີບການຕໍ່າຫູກຂອງປະຊາຊົນພາຍໃນບ້ານແມ່ນມີມູນເຊື້ອມາແຕ່ຮຸ່ນພໍ່ແມ່, ຕາຍາຍ ສືບຕໍ່ກັນມາ. ເຊິ່ງໃນເມື່ອກ່ອນການຕໍ່າແຜ່ນແພຍັງມີລັກສະ ນະແບບກະແຈກກະຈາຍ ແລະ ຍັງບໍ່ເປັນຂະບວນເທົ່າທີ່ຄວນ ໂດຍອາໃສຍາມຜັກຜ່ອນຈາກການເຮັດໄຮ່ເຮັດນາ ແລະ ເວລາຫວ່າງຈາກວຽກງານອື່ນໆເທົ່ານັ້ນ ຍັງບໍ່ທັນເປັນອາຊີບທີ່ສ້າງລາຍຮັບໄດ້ແບບຖາວອນ. ຍ້ອນເຫັນໄດ້ຄວາມໝາຍຄວາມສຳຄັນຂອງວຽກງານດັ່ງກ່າວ ບວກກັບການຊຸກຍູ້, ສົ່ງເສີມໃຫ້ປະຊາຊົນມີວຽກເຮັດງານທຳ ເພື່ອສ້າງຊີວິດທີ່ດີໃຫ້ແກ່ຄອບຄົວ ປະຊາ ຊົນທີ່ຖືອາຊີບຕໍ່າແຜ່ນແພບ້ານໂພວາ ໄດ້ຮັບການຝຶກອົບຮົມທາງດ້ານຄວາມຮູ້ ແລະ ເຕັກນິກຕ່າງໆ ໂດຍບໍລິສັດໄຟຟ້ານ້ຳເທີນສອງເປັນຜູ້ສະໜັບສະໜູນ ແລະ ໄດ້ສ້າງຕັ້ງກຸ່ມຂຶ້ນໃນປີ 2006 ຈາກນັ້ນມາກຸ່ມຫັດຖະກຳຕໍ່າຫູກກໍ່ເລີ່ມເປັນຂະບວນ, ມີຫຼາກຫຼາຍຜະລິດຕະພັນອອກມາຈຳໜ່າຍ ແລະ ເລີ່ມໄດ້ຮັບຄວາມສົນໃຈ ເປັນທີ່ນິຍົມຊົມຊອບຂອງສັງຄົມຫຼາຍຂຶ້ນ.



ປະຈຸບັນກຸ່ມຫັດຖະກຳຕໍ່າຫູກບ້ານໂພວາ ມີສະມາຊິກກຸ່ມຈຳນວນ 12 ຄົນ ແລະ ການຕໍ່າແຜ່ນແພຂອງສະມາຊິກ ແຕ່ລະຄົນແມ່ນຍັງມີລັກຊະນະທີ່ແຕກຕ່າງກັນໄປຕາມທີ່ລູກຄ້າຕ້ອງການ ເນື່ອງຈາກຍັງບໍ່ມີຕະຫຼາດຖາວອນ ໂດຍຍັງອາໃສການຈຳໜ່າຍໃຫ້ແກ່ປະຊາຊົນໃນເຂດບໍລິເວນໃກ້ຄຽງ ແລະ ຕໍ່າຕາມທີ່ລູກຄ້າສັ່ງຈອງ, ແຕ່ກໍ່ຍັງສາມາດສ້າງລາຍຮັບໄດ້  ໂດຍສະເລ່ຍແລ້ວສະມາຊິກພາຍໃນກຸ່ມຈະມີລາຍຮັບເກືອບ 20 ລ້ານກີບຕໍ່ຄົນຕໍ່ປີ.



ທ່ານ ນາງ ສີລາວັນ ອິນທິລາດ ໜຶ່ງໃນສະມາຊິກກຸ່ມທີ່ມີຄວາມຫ້າວຫັນ ແລະ ກະຕືລືລົ້ນໃນອາຊີບດັ່ງກ່າວ ລາວໄດ້ກ່າວວ່າ: ຕົນເອງໄດ້ປະກອບອາຊີບນີ້ມາໄດ້ເກືອບ 20 ປີແລ້ວ ໃນເມື່ອກ່ອນແມ່ນໄດ້ຕໍ່າແຜ່ນແພຢູ່ທີ່ນະຄອນຫຼວງວຽງຈັນ. ຫຼັງຈາກຕົນເອງສ້າງຄອບຄົວກໍ່ໄດ້ຍ້າຍມາຢູ່ນຳຄອບຄົວທີ່ ບ້ານໂພວາ ເມືອງມະຫາໄຊ ແລະ ໄດ້ຖືອາຊີບຕໍ່າຫູກນີ້ເປັນອາຊີບຫຼັກຂອງຕົນເອງເລີຍ. ຍ້ອນຄວາມມັກຮັກ, ຫ້າວຫັນ, ພາກພຽນ ແລະ ອົດທົນ ຕົນເອງຮຽນຮູ້ໄດ້ຫຼາຍໆຢ່າງ ແລະ ຕໍ່າແພໄດ້ຫຼາຍໆປະເພດ ເປັນຕົ້ນແມ່ນ: ຕໍ່າແພສິ້ນ, ເສື້ອ, ຜ້າໄໝ, ແພຂະມ້າ, ຜ້າແພທີ່ຖັກແສ່ວດ້ວຍມື ລວມເຖິງການເກັບລວດລາຍແພຕ່າງໆ ອີກຫຼາຍສະນິດ ສາມາດເຮັດໄດ້ຕາມທີ່ລູກຄ້າຕ້ອງການ. ເຊິ່ງໃນມື້ໜຶ່ງຕົນເອງແມ່ນສາມາດຕໍ່າໄດ້ປະມານ 3 ແມັດ (ແຜ່ນແພຕັດເສື້ອທົ່ວໄປ) ແລະ ຂາຍໃນລາຄາແມັດລະ 30.000 ກີບ, ສ່ວນແຜ່ນແພອື່ນໆແມ່ນຂຶ້ນກັບລວດລາຍງ່າຍ-ຍາກ ແລະ ລາຄາກໍ່ຈະແຕກຕ່າງກັນໄປ. ໂດຍສະເລ່ຍແລ້ວລາຍຮັບຈາກການຕໍ່າຫູກຂອງນາງ ສີລາວັນ ປະມານ 32 ລ້ານກວ່າກີບຕໍ່ປີ.



ຫົວໜ້າກຸ່ມຕໍ່າຫູກກ່າວຕື່ມວ່າ: ໃນອະນາຄົດຖ້າມີຕະຫຼາດຮອງຮັບທີ່ຖາວອນ ຫຼືມີໂຄງການໃດໜຶ່ງເຂົ້າມາຊຸກຍູ້, ສົ່ງເສີມ ຈະຂະຫຍາຍ ແລະ ຖ່າຍທອດບົດຮຽນດັ່ງກ່າວໃຫ້ແກ່ຊາວໜຸ່ມ ກໍ່ຄືຄົນຮຸ່ນຫຼັງໄດ້ສືບທອດ ເພື່ອຮັກສາວັດທະນະທຳ ກໍ່ຄືມູນເຊື້ອດັ່ງກ່າວໄວ້ໃຫ້ສັງຄົມໄດ້ເຫັນເຖິງຜະລິດຕະພັນທີ່ສ້າງດ້ວຍສະຕິປັນຍາ ແລະ ເຫື່ອແຮງຂອງຊາວບ້ານໂພວາ ເພື່ອພ້ອມກັນສົ່ງເສີມໃຫ້ກາຍເປັນທີ່ນິຍົມຊົມຊອບ ແລະ ມີຊື່ສຽງໃນສັງຄົມຕະຫຼອດໄປ.


ພາບ ແລະ ຂ່າວ: ຂ່າວແຂວງຄໍາມ່ວນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments