4 ແຂວງພາກໃຕ້ ແລກປ່ຽນບົດຮຽນວຽກງານວິທະຍາສາດ-ເຕັກໂນໂລຊີ




ແຂວງເຊກອງ,ວັນທີ 19/03/2018 :  ວັນທີ 16 ມີນາ 2018 ຜ່ານມາ ທີ່ແຂວງເຊກອງໄດ້ເປີດກອງປະຊຸມພົບປະແລກປ່ຽນບົດຮຽນຄັ້ງທີ IV ລະຫວ່າງພະແນກວິທະຍາສາດ ແລະເຕັກໂນໂລຊີ 4 ແຂວງພາກໃຕ້ ໂດຍມີທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງ, ຕະຫຼອດຫົວໜ້າ-ຮອງຫົວໜ້າພະແນກ ແລະພະນັກງານວິຊາການຈາກຂະແໜງວິທະຍາສາດ ແລະເຕັກໂນໂລຊີ 4 ແຂວງພາກໃຕ້ຄື: ແຂວງເຊກອງ, ສາລະວັນ, ອັດຕະປື ແລະຈຳປາສັກເຂົ້າຮ່ວມ.

ທ່ານ ລຳພັນ ແກ້ວມະຫາໄຊ ຮອງຫົວໜ້າພະແນກວິທະຍາສາດ ແລະເຕັກໂນໂລຊີແຂວງເຊກອງ ໄດ້ສະພາບ ລວມການຮ່ວມມືວຽກງານວິທະຍາສາດ ແລະເຕັກໂນໂລຊີ 4 ແຂວງພາກໃຕ້ໃນປີ 2017 ເປັນຕົ້ນແມ່ນວຽກງານປັບປຸງກົງຈັກການຈັດຕັ້ງ, ວຽກງານຄຸ້ມຄອງການບໍລິຫານ, ວຽກງານກວດກາສິນຄ້ານຳເຂົ້າ-ສົ່ງອອກ, ວຽກງານກວດທຽບຄຸນນະພາບມາດຖານໝໍ໊ນັບໄຟຟ້າ, ໝໍ້ແທກນ້ຳປະປາ, ກວດຢັ້ງຢືນຄຸນນະພາບນ້ຳມັນ ແລະເຄື່ອງວັດສະດຸກໍ່ສ້າງການບໍລິຫານວຽກງານມາດຕະຖານ ແລະຄຸ້ມຄອງວຽກງານຊັບສິນທາງປັນຍາ ໂດຍສະເພາະການກວດກາສິນຄ້າປອມແປງ, ລະເມີດເຄື່ອງໝາຍການຄ້າ ເພື່ອໃຫ້ມີຄວາມຮັບປະກັນ ແລະຄວາມຍຸຕິທຳແກ່ສັງຄົມ.

ຕະຫຼອດໄລຍະຜ່ານມາ ພະແນກວິທະຍາສາດ ແລະເຕັກໂນໂລຊີ 4 ແຂວງພາກໃຕ້ໄດ້ເປັນເຈົ້າການໃນການຢຶດໝັ້ນແນວທາງການເມືອງຂອງພັກ-ລັດຖະບານ, ມີຄວາມຈົງຮັກພັກດີ, ຊື່ສັດ, ມີຄວາມຕື່ນຕົວເປັນເຈົ້າການປະຕິບັດມະຕິກອງປະຊຸມໃຫຍ່ຄັ້ງທີ II ຂອງວຽກງານວິທະຍາສາດ ແລະເຕັກໂນໂລຊີໃນການຕັ້ງໜ້າປະຕິບັດວຽກງານການພັດທະນາເສດຖະກິດ-ສັງຄົມ, ກຳແໜ້ນມະຕິ, ຄຳສັ່ງ, ກົດລະບຽບ ແລະກົດໝາຍຂອງພັກ, ຕິດຕາມກວດກາການປະຕິບັດພາລະບົດບາດຂອງຕົນ, ດ້ວຍການເປີດກອງປະຊຸມຖອດຖອນບົດຮຽນໝູນວຽນໃນແຕ່ລະແຂວງ, ທັງນີ້ ກໍເພື່ອແນໃສ່ຍົກລະດັບຄວາມຮູ້ຄວາມສາມາດຂອງພະນັກງານ, ສະມາຊິກພັກໃນຂົງເຂດວິທະຍາສາດ ແລະເຕັກໂນໂລຊີ 4 ແຂວງພາກໃຕ້, ທັງເປັນການຮ່ວມມືຊ່ວຍເຫຼືອເຊິ່ງກັນ ແລະກັນຕາມທ່າແຮງ ແລະຄວາມສາມາດຂອງແຕ່ລະແຂວງ.



ໃນກອງປະຊຸມພົບປະແລກປ່ຽນບົດຮຽນຄັ້ງນີ້ ຕາງໜ້າພະແນກວິທະຍາສາດ ແລະເຕັກໂນໂລຊີແຕ່ລະແຂວງ ຍັງໄດ້ຂຶ້ນລາຍງານສະພາບການເຄື່ອນໄຫວ ແລະການຈັດຕັ້ງປະຕິບັດວຽກງານວິທະຍາສາດ ແລະເຕັກໂນໂລຊີໃນໜຶ່ງປີຜ່ານມາ ໃນນີ້ໄດ້ຕີລາຄາຊຸກຍູ້ສົ່ງເສີມດ້ານດີ ແລະແກ້ໄຂດ້ານອ່ອນ, ຂໍ້ຄົງຄ້າງ, ທັງເສີມຂະຫຍາຍການພົວພັນຮ່ວມມືລະຫວ່າງພະແນກວິທະຍາສາດ ແລະເຕັກໂນໂລຊີ 4 ແຂວງພາກໃຕ້ໃນຕໍ່ໜ້າທຕື່ມອີກ.


ຂ່າວ-ພາບ : ສັນຍາ  (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments