ການຮ່ວມມື 2 ຝ່າຍ ຈັດພິທີວາງສີລາລືກໂຄງການແກ້ໄຂຄວາມທຸກຍາກຢູ່ເມືອງລ້ອງຊານ




ໃນວັນທີ 26 ມີນາ 2018 ສູນກາງແນວລາວສ້າງຊາດ ຮ່ວມກັບ ກຸ່ມບໍລິສັດ ພົງສະຫວັນ ໄດ້ຈັດພິທີວາງສີລາລືກໂຄງການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຂຶ້ນທີ່ກຸ່ມບ້ານໂພນສະຫວາດ ເມືອງລ້ອງຊານ ແຂວງໄຊສົມບູນ ໂດຍການເຂົ້າຮ່ວມຂອງ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ທ່ານ ອ໋ອດ ພົງສະຫວັນ ປະທານ ກຸ່ມບໍລິສັດ ພົງສະຫວັນ, ທ່ານ ພອຍຄຳ ຮຸ່ງບຸນຍວງ ຮອງເຈົ້າແຂວງໆໄຊສົມບູນ ພ້ອມດ້ວຍບັນດາຄະນະຈາກສູນກາງ ແລະ ທ້ອງຖິ່ນເຂົ້າຮ່ວມ.
ທ່ານ ບຸນເອັ້ງ ກວ້າງມະນີວັນ ຮອງປະທານ ກຸ່ມບໍລິສັດ ພົງສະຫວັນ ຈຳກັດ ກ່າວວ່າ: ສູນກາງແນວລາວສ້າງຊາດ ແລະ ກຸ່ມບໍລິສັດ ພົງສະຫວັນ ຈຳກັດ ໄດ້ມີການລິເລີ່ມສ້າງໂຄງການນັບແຕ່ເດືອນຕຸລາ 2017 ເປັນຕົ້ນມາ ແລະ ໄດ້ເຊັນບົດບັນທຶກຊ່ວຍຈຳໂຄງການດັ່ງກ່າວໃນວັນທີ 26 ທັນວາ 2017 ລະຫວ່າງສູນກາງແນວລາວສ້າງຊາດ ກັບ ກຸ່ມບໍລິສັດ ພົງສະຫວັນ ແລະ ແນວລາວສ້າງຊາດ ແຂວງໄຊສົມບູນ, ຜ່ານການຈັດຕັ້ງປະຕິບັດຕົວຈິງໄດ້ມີຜົນສຳເລັດຈຳນວນໜຶ່ງ ເປັນຕົ້ນແມ່ນໄດ້ລົງເກັບກຳຂໍ້ມູນຕົວແບບຢູ່ບ້ານນາຈະເລີນ ເມືອງສັງທອງ ນະຄອນຫຼວງ ແລະ ເມືອງຮົ່ມ ແຂວງໄຊ, ເຂດຈຸດສຸມໂພນສະຫວາດ ເມືອງລ້ອງຊານ ແລະ ຕົກລົງເອົາໂພນສະຫວາດ ເມືອງລ້ອງຊານ ໄຊສົມບູນ ເປັນເຂດທົດລອງຂອງໂຄງການ.

ເຂດຈຸດສຸມດັ່ງກ່າວມີທັງໝົດ 8 ບ້ານ 1.338 ຄອບຄົວ ແລະ ມີພົນລະເມືອງ 8.098 ຄົນ, ມີ 165 ຄອບຄົວທຸກຍາກ ແລະ ມີຄອບຄົວຕ້ອງການທີ່ຈະລ້ຽງງົວ 339 ຄອບຄົວ, ລ້ຽງໝູ 32 ຄອບຄົວ, ລ້ຽງປາ 75 ຄອບຄົວ ແລະ ຕ້ອງການປູກໄມ້ກິນໝາກ 15 ຄອບຄົວ, ຕ່ຳຫູກ 22 ຄອບຄົວ, ມີຄວາມຕ້ອງການທຶນໃນເບື້ອງຕົ້ນ 20 ຕື້ກີບ, ຜ່ານການຈັດຕັ້ງປະຕິບັດແມ່ນພວກເຮົາບັນລຸການສ້າງເຮືອນໃຫ້ປະຊາຊົນຜູ້ທຸກຍາກ ຈຳນວນ 5 ຫຼັງ ເກືອບສຳເລັດ 100% ແລະ ຊື້ງົວ 9 ໂຕ, ເບ້ຍໄມ້ກິນໝາກ 600 ເບ້ຍ ພ້ອມດ້ວຍວັດຖຸ ແລະ ເຄື່ອງໃຊ້ຄອບຄົວຈຳນວນໜຶ່ງ.

ທ່ານ ໄຊສົມພອນ ພົມວິຫານ ກ່າວວ່າ: ເພື່ອເຮັດໃຫ້ໂຄງການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຢູ່ເມືອງລ້ອງຊານ ແຂວງໄຊສົມບູນ ໄດ້ຮັບການຈັດຕັ້ງປະຕິບັດ ແລະ ດຳເນີນໄປຢ່າງມີປະສິດທິຜົນ ແລະ ມີຄວາມຍືນຍົງ ຢາກໃຫ້ເນັ້ນບາງບັນຫາ ດັ່ງນີ້: ໃຫ້ຄະນະປະຈຳພັກແຂວງ, ອຳນາດການປົກຄອງເມືອງລ້ອງຊານ ເອົາໃຈໃສ່ໃຫ້ການສະໜັບສະໜູນບັນດາກິດຈະກຳຂອງໂຄງການ ພ້ອມທັງເອົາໃຈໃສ່ວຽກງານໄກ່ເກ່ຍທີ່ດິນ ແລະ ຈັດສັນທີ່ດິນເພື່ອອຳນວຍຄວາມສະດວກໃຫ້ແກ່ໂຄງການ. ນອກນັ້ນ, ຍັງສືບຕໍ່ປຸກລະດົມສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ເຊິ່ງແມ່ນໜຶ່ງໃນມາດຕະຖານຄອບຄົວພັດທະນາ ແລະ ບ້ານພັດທະນາຂອງລັດຖະບານ ຕິດພັນກັບຂະບວນແຂ່ງຂັນຮັກຊາດ ແລະ ພັດທະນາຕາມທິດສາມສ້າງ ພ້ອມທັງສຶກສາອົບຮົມການເມືອງແນວຄິດ ແລະ ອະທິບາຍໃຫ້ປະຊາຊົນເຂົ້າໃຈເຖິງຄວາມສຳຄັນຂອງໂຄງການ ເພື່ອໃຫ້ເຂົາເຈົ້າມີຄວາມຕື່ນຕົວ ແລະ ສະໝັກໃຈເຂົ້າຮ່ວມໂຄງການ, ໃຫ້ ກຸ່ມບໍລິສັດ ພົງສະຫວັນ ສືບຕໍ່ຈັດຕັ້ງບັນດາກິດຈະກຳທີ່ໄດ້ກຳນົດໄວ້ໃນແຜນການ ແລະ ຝຶກອົບຮົມໃຫ້ຄວາມຮູ້ດ້ານເຕັກນິກການປູກ, ການລ້ຽງ, ການສ້າງໂຮງງານ ເພື່ອເກັບຮັກສາຄຸນນະພາບຂອງການຜະລິດ; ພັດທະນາໂຄງການໃຫ້ເປັນສູນຕົວແບບກາຍເປັນແຫຼ່ງທ່ອງທ່ຽວ ແລະ ອື່ນໆທີ່ຈະນຳເອົາຜົນປະໂຫຍດມາສູ່ຊຸມຊົນ; ຮຽກຮ້ອງໃຫ້ປະຊາຊົນທັງ 8 ບ້ານ ເອົາໃຈໃສ່ໃຫ້ການຮ່ວມມືເຂົ້າຮ່ວມພັດທະນາໂຄງການຮ່ວມກັນ .ສຳລັບຄອບຄົວທີ່ໄດ້ຮັບເຮືອນ, ງົວ ແລະ ຕົ້ນໄມ້ແມ່ນໃຫ້ເອົາໃຈໃສ່ໃນການປົກປັກຮັກສາ, ນຳໃຊ້ໃຫ້ເກີດປະໂຫຍດ ແລະ ຍືນຍົງ.

ທ່ານ ອ່ອນຈັນ ສຸວັນນະລິດ ບ້ານສັນປາຕອງ ເປັນໜຶ່ງໃນຄອບຄົວທຸກຍາກທີ່ໄດ້ຮັບການຊ່ວຍເຫຼືອສ້າງເຮືອນ ໄດ້ກ່າວວ່າ: ສຳລັບຄອບຄົວຂ້າພະເຈົ້າທຸກຍາກຍ້ອນມີລູກຫຼາຍຄົນ ( 5 ຄົນ ) ແລະ ອາຊີບກໍ່ແມ່ນເຮັດໄຮ່ ເຊິ່ງແຕ່ລະປີກໍ່ບໍ່ກຸ້ມກິນ ເນື່ອງຈາກຜົນຜະລິດກໍ່ບໍ່ໄດ້ຫຼາຍເທົ່າກັບເນື້ອທີ່ໆເຮັດ ອັນເປັນສາເຫດເຮັດໃຫ້ຄອບຄົວຂ້າພະເຈົ້າທຸກຍາກ, ແຕ່ຍ້ອນໄດ້ຮັບການຊ່ວຍເຫຼືອຈາກພາກລັດໃນການມາຊ່ວຍສ້າງເຮືອນໃໝ່ໃຫ້, ຂ້າພະເຈົ້າມີຄວາມດີໃຈທີ່ສຸດ ເພາະວ່າບໍ່ເຄີຍຄິດມາກ່ອນວ່າຈະໄດ້ເຮືອນໃໝ່. ດັ່ງນັ້ນ, ເມື່ອເພິ່ນມາຊ່ວຍເຫຼືອແບບນີ້ ແລະ ໄດ້ມີໂຄງການສົ່ງເສີມການປູກ – ການລ້ຽງຂອງປະຊາຊົນຢູ່ກຸ່ມບ້ານຈຸດສຸມ ກຸ່ມບ້ານໂພນສະຫວາດນີ້ ຄອບຄົວຂ້າພະເຈົ້າແມ່ນຈະຕັ້ງໃຈເຂົ້າຮ່ວມເພື່ອເປັນການສ້າງອາຊີບ ແລະ ສ້າງລາຍຮັບມາສູ່ຄອບຄົວ ເພື່ອໃຫ້ຄອບຄົວຂ້າພະເຈົ້າມີຊີວິດການເປັນຢູ່ທີ່ດີຂຶ້ນ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments