ຮອງປະທານປະເທດ ເນັ້ນໃຫ້ການນຳແຂວງບໍ່ແກ້ວ ສືບຕໍ່ສ້າງທຸກເງື່ອນໄຂ ເຮັດໃຫ້ເສດຖະກິດ ຂອງແຂວງ ຂະຫຍາຍຕົວ



ໃນ​ພິ​ທີ​ໂຮມ​ຊຸມ​ນຸມ ສະ​ເຫລີມ​ສະຫລອງ ແຂວງບໍ່​ແກ້ວ ຄົບ​ຮອບ 35 ປີ ​ທີ່ໄດ້ຈັດ​ຂຶ້ນ ໃນ​ວັນ​ທີ 26 ມີ​ນາ 2018, ທ່ານ​ ພັນ​ຄຳ ວິ​ພາ​ວັນ ຮອງ​ປະ​ທານ​ປະ​ເທດ ແຫ່ງ ສ​ປ​ປ ລາວ ໄດ້​ມີ​ຄຳ​ເຫັນ​ໂອ​ລົມ, ໂດຍໄດ້​ສະ​ແດງ​ຄວາມ​ຊົມ​ເຊີຍ ​ຕໍ່​ຜົນ​ສຳ​ເລັດ ທີ່​ແຂວງບໍ່​ແກ້ວ ຍາດ​ມາ​ໄດ້ ​ຕະ​ຫລອດ​ໄລ​ຍະ​ຜ່ານ​ມາ ພ້ອມ​ທັງ ​ເນັ້ນ ​ໃຫ້ຄະ​ນະ​ພັກ, ຄະ​ນະ​ນຳ​ຂອງ ​ແຂວງ ສືບ​ຕໍ່​ສູ້​ຊົນ​ສ້າງ​ທຸກ​ເງື່ອນ​ໄຂ ​ ເຮັດ​ໃຫ້​ເສດ​ຖະ​ກິດຂອງ​ແຂວງ  ​ຂະ​ຫຍາຍ​ຕົວ​ຢ່າງ​ຕໍ່​ເນື່ອງ, ໝັ້ນ​ທ່ຽງ, ຖື​ກ​ທິດ ແລະ ແກ້​ໄຂ​ຄວາມ​ທຸກ​ຍາກ ຂອງ​ປະ​ຊາ​ຊົນ ໃນ​ທົ່ວ​ແຂວງ ໃຫ້​ໄດ້​ໂດຍ​ພື້ນ​ຖານ,  ສ້າງ​ແຂວງບໍ່​ແກ້ວ​ ໃຫ້​ມີ​ພື້ນ​ຖານ​ໂຄງ​ລ່າງ ​ເສດ​ຖະ​ກິດ-ເຕັກ​ນິກ, ວັດ​ທະ​ນະ​ທຳ, ວິ​ທະ​ຍາ​ສາດ ແລະ ບຸກ​ຄະ​ລາ​ກອນ ເພື່ອ​ຮອງ​ຮັບ ​ການ​ຊຸກ​ຍູ້​ພາ​ລະ​ກິດ​ ການ​ຫັນ​ເປັນ​ອຸດ​ສາ​ຫະ​ກຳ ແລະ ທັນ​ສະ​ໄໝ​ ໃນ​ອະ​ນາ​ຄົດ.



ທ່ານ​ ພັນ​ຄຳ ວິ​ພາ​ວັນ ເນັ້ນ​ ໃຫ້ຄະ​ນະ​ພັກ, ອຳ​ນາດ​ການ​ປົກ​ຄອງ  ຕະ​ຫລອດ​ຮອດປະ​ຊາ​ຊົນ​ບັນ​ດາເຜົ່າ ສືບ​ຕໍ່ເພີ່ມ​ທະ​ວີ​ຄວາມ​ສາ​ມັກ​ຄີ ​ເປັນ​ເອ​ກະ​ພາບ​ໃຫ້​ແໜ້ນ​ແຟ້ນ, ປະ​ຕິ​ບັດ​ໜ້າ​ທີ່​ ຍຸດ​ທະ​ສາດ ກໍ​ຄື ປົກ​ປັກ​ຮັກ​ສາ ແລະ ສ້າງ​ສາ​ ແຂວງບໍ່​ແກ້ວ ຕາມ​ແນວ​ທາງ​ປ່ຽນ​ແປງ​ໃໝ່ ​ຢ່າງ​ຕັ້ງ​ໜ້າ, ເພີ່ມ​ທ​ະ​ວີ​ຊີ້​ນຳ-ນຳ​ພາ ວຽກ​ງານ ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ,  ຮັບ​ປະ​ກັນ​ສະ​ຖຽນ​ລະ​ພາບ ແລະ ຄວາມ​ໝັ້ນ​ຄົງ​ ຂອງ​ແຂວງ ກໍ​ຄື​ ຂອງ​ປະ​ເທ​ດ​ຊາດ, ບັນ​ຫາອັນ​ຮີບ​ດ່ວນ ແລະ ໜ້າ​ເປັນ​ຫ່ວງ​ທີ່​ສຸດ  ທີ່​ຈະ​ຕ້ອງ​ໄດ້​ຮີບ​ຮ້ອນ ປັບ​ປຸງ​ແກ້​ໄຂ ແມ່ນ​ບັນ​ຫາ​ຢາ​ເສບ​ຕິດ, ການ​ປຸ້ນ​ຈີ້, ຂີ້​ລັກ, ການ​ຄ້າ​ມະ​ນຸດ, ການ​ເຂົ້າ​ເມືອງ​ຜິດ​ກົດ​ໝາຍ, ແຮງ​ງານ​ຕ່າງ​ດ້າວ ​ທີ່ບໍ່​ຖືກ​ຕ້ອງ, ການ​ເຄື່ອນ​ຍ້າຍຖິ່ນ​ຖານ ​ຕັ້ງ​ພູມ​ລຳ​ເນົາ​ແບບ​ຊະ​ຊາຍ. ພ້ອມ​ດຽວ​ກັນ​ນັ້ນ, ໃຫ້​ເພີ່ມ​ທະ​ວີ  ຊີ້​ນຳ​-ນຳ​ພາ ວຽກ​ງານ​ສ້າງ​ພັກ-ພະ​ນັກ​ງານ ໃຫ້​ປອດ​ໃສ, ເຂັ້ມ​ແຂງ ແລະ ໜັກ​ແໜ້ນ, ຕັ້ງ​ໜ້າ​ຈັດ​ຕັ້ງ​ຜັນ​ຂະ​ຫຍາຍ​ທິດ​ນຳ ​ ກ່ຽວ​ກັບ​ການ​ປັບ​ປຸງ​ກົນ​ຈັກ  ກໍ​ຄື​ ວຽກ​ງານ 3 ສ້າງ​ ໃຫ້​ເຂົ້າ​ສູ່​ການ​ຈັດ​ຕັ້ງ ​ປະ​ຕິ​ບັດ​ຕົວ​ຈິງ ແລະ ມີ​ປະ​ສິດ​ທິ​ພາບ, ເພີ່ມ​ທະ​ວີ​ຄວາມ​ສັກ​ສິດ ໃນ​ການ​ຄຸ້ມ​ຄອງ​ລັດ, ຄຸ້ມ​ຄອງ​ເສດ​ຖະ​ກິດ-ສັງ​ຄົມ​ ດ້ວຍ ​ກົດ​ໝາຍ ແລະ ອື່ນໆ.



 ປັດ​ຈຸບັນ ການ​ພັດ​ທະ​ນາ ​ເສດ​ຖະ​ກິດ-ສັງ​ຄົ​ມ ຂອງ​ ແຂວງບໍ່​ແກ້ວ ໄດ້​ມີ​ການ​ຂະ​ຫຍາຍ​ຕົວ ​ຢ່າງ​ຕໍ່​ເນື່ອງ ລວມຍອດ​ຜະ​ລິດ​ຕະ​ພັນ ​ພາຍ​ໃນ GDP ບັນ​ລຸ​ໄດ້ 2.770,33 ຕື້​ກີບ, ເສດ​ຖະ​ກິດ​ຂະ​ຫຍາຍ​ຕົວ​ ໃນ​ລະ​ດັບ 7,7%, ສະ​ເລ່ຍ​ລາຍ ​ຮັບ​ຕໍ່​ຫົວ​ຄົນ​ໄດ້ 1.776,21 ໂດ​ລາ​ ສະ​ຫະ​ລັດ ຕໍ່​ຄົນ​ຕໍ່​ປີ. ໃນ​ນັ້ນ, ລວມຍອດ ​ຜະ​ລິດ​ຕະ​ພັນ​ກະ​ສິ​ກຳ ແລະ ປ່າ​ໄມ້ 1.067,03 ຕື້​ກີບ ກວມ​ເອົາ 38,52% ຂອງ GDP, ດ້ານ​ ອຸດ​ສາ​ຫະ​ກຳ 571,67 ຕື້​ກີບ ກວມ​ເອົາ 20,63% ຂອງ GDP ແລະ ດ້ານ ບໍ​ລິ​ການ 1.131,64 ຕື້​ກີບ ກວມ​ເອົາ 40,85% ຂອງ GDP.




ຂ່າວ-ພາບ: ທະ​ນູ​ທອງ (ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments