ເມືອງແກ່ນທ້າວ ແຂວງໄຊຍະບູລີ ສອບເສັງນັກຮຽນເກັ່ງ ແລະ ຖາມ-ຕອບຄວາມຮູ້ວິທະຍາສາດຂັ້ນເມືອງ




ປະຕິບັດຕາມແຜນພັດທະນາການສຶກສາ ແລະ ກິລາ ສົກຮຽນ 2017-2018 ແລະ ຄໍາສັ່ງແນະນໍາຂອງພະແນກສຶກສາທິການ ແລະ ກິລາແຂວງ ກ່ຽວກັບການຈັດຕັ້ງປະຕິບັດຫຼັກສູດການຮຽນ-ການສອນ, ການສອບເສັງນັກຮຽນເກັ່ງ, ການສອບເສັງເລື່ອນຂັ້ນ-ຈົບຊັ້ນມັດທະຍົມສຶກສານັ້ນ. ເມືອງແກ່ນທ້າວແຂວງໄຊຍະບູລີ ໄດ້ຈັດການສອບເສັງນັກຮຽນເກັ່ງ ແລະ ຖາມ-ຕອບຄວາມຮູ້ວິທະຍາສາດ ສົກຮຽນ 2017-2018 ຂຶ້ນໃນວັນວັນທີ 28 ກຸມພາ - 1 ມີນາ 2018 ນີ້, ຢູ່ທີ່ສະໂມສອນຂອງເມືອງ.



ການສອບເສັງຄັ້ງ, ໄດ້ຈັດຂຶ້້ນເປັນ3 ລະດັບຄື: ຊັ້ນປະຖົມສຶກສາ ປ.5 ຊັ້ນມັດທະຍົມສຶກສາຕອນຕົ້ນ ມ.4 ແລະ ຊັ້ນມັດທະຍົມສຶກສາຕອນປາຍ ມ.7. ເຊິ່ງຊັ້ນປະຖົມສຶກສາມີ 3 ວິຊາຄື: ພາສາລາວ, ຄະນິດສາດ ແລະ ໂລກອ້ອມຕົວ, ຊັ້ນມັດທະຍົມຕອນຕົ້ນ ແລະ ຕອນປາຍມີ 4 ວິຊາຄື: ພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ເຄມີສາດ ມີນັກຮຽນເກັ່ງເຂົ້າສອບເສັງທັງໝົດ 77 ນ້ອງ, ຍິງ 59 ນ້ອງ. ຊັ້ນປະຖົມສຶກສາ ມີ 21 ນ້ອງ, ຍິງ 17 ນ້ອງ, ມັດທະຍົມຕອນຕົ້ນ 40 ນ້ອງ, ຍິງ 32 ນ້ອງ ແລະ ມັດທະຍົມຕອນປາຍ 16 ນ້ອງ, ຍິງ 10 ນ້ອງ, ຖາມ-ຕອບຄວາມຮູ້ວິທະຍາສາດແບ່ງອອກເປັນ 2 ສາຍຄື: ປະຖົມສຶກສາ 7 ທີມ ແລະ ມັດທະຍົມສຶກສາ 4 ທີມ.



ຜ່ານການສອບເສັງ ສາມາດຄັດເລືອກໄດ້ ຕົວແທນນັກຮຽນເກັ່ງ 11 ນ້ອງ ເພື່ອສົ່ງເຂົ້າຮ່ວມສອບເສັງນັກຮຽນເກັ່ງຂັ້ນແຂວງຕໍ່ໄປ.ຖາມ-ຕອບຄວາມຮູ້ວິທະຍາສາດ ຊັ້ນປະຖົມສຶກສາທີມອັນດັບທີ 1ໄດ້ແກ່ກຸ່ມໂຮງຮຽນປະຖົມເທດສະບານ, ທີ 2 ທີມກຸ່ມໂຮງຮຽນປະຖົມດອນເມນ, ຊັ້ນມັດທະຍົມຕອນຕົ້ນ ທີມອັນດັບທີ 1 ໂຮງຮຽນ ມສ ເມືອງໝໍ, ທີ 2 ທີມໂຮງຮຽນ ມສ ແກ່ນທ້າວ, ຊັ້ນມັດທະຍົມຕອນປາຍ ທີມອັນດັບທີ 1 ໂຮງຮຽນມສ ແກ່ນທ້າວ ແລະ ທີ 2 ທີມໂຮງຮຽນ ມສ ຫ້ວຍເລິກ.


ທັງນີ້, ເພື່ອເປັນການປະເມີນຜົນທາງດ້ານຄຸນະພາບຂອງການຮຽນ-ການສອນຂອງຄູ ແລະ ນັກຮຽນ ໃນຊັ້ນປະຖົມສຶກສາ ແລະ ມັດທະຍົມສຶກສາໃນທົ່ວເມືອງ. ທັງເປັນການສົ່ງເສີມນັກຮຽນທີ່ມີພອນສະຫວັນ, ຊຸກຍູ້ຂະບວນການຮຽນ-ການສອນ ແລະ ຄູ ໃຫ້ມີຄຸນະພາບ ເພື່ອເຂົ້າຮ່ວມການສອບເສັງໃນລະດັບແຂວງ. ທີ່ມາ: ມີເດຍລາວ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments