ສະມາຄົມໂຮງແຮມ-ຮ້ານອາຫານມີຄວາມພ້ອມເພື່ອຮອງຮັບນັກທ່ອງທ່ຽວ







ສະມາຄົມໂຮງແຮມ ແລະ ຮ້ານອາຫານແຂວງຈຳປາສັກ ມີຄວາມພ້ອມທັງສະຖານທ່ີພັກ ແລະ ຮ້ານອາຫານໃນແຕ່ຈຸດແຫຼ່ງທ່ອງທ່ຽວທີ່ສຳຄັນພາຍໃນແຂວງ ເພື່ອຕ້ອນຮັບນັກທ່ອງທ່ຽວເນື່ອງໃນປີທ່ອງທ່ຽວລາວ 2018 ບໍ່ຫຼຸດ 40.000 ຄົນຕໍ່ວັນ.







ທ່ານ ທຸຍ ເພັດສະຫວັນ ປະທານສະມາຄົມໂຮງແຮມ ແລະ ຮ້ານອາຫານແຂວງຈຳປາສັກໃຫ້ສຳພາດຕໍ່ນັກຂ່າວໜັງສືພິມຈຳປາໃໝ່ ໃນວັນທີ 28 ກຸມພາ 2018 ນີ້ວ່າ: ສະມາຄົມພວກເຮົາມີຄວາມພ້ອມທຸກເວລາເພື່ອຮອງຮັບນັກທ່ອງທ່ຽວທີ່ຈະເຂົ້າມາທ່ຽວແຂວງຈຳປາສັກໃນໂອກາດທີ່ ສປປ ລາວເປີດປີທ່ອງທ່ຽວ 2018 ໂດຍສະເພາະແມ່ນພື້ນຖານໂຄງລ່າງແຂວງຈໍາປາສັກມີໂຮງແຮມ 67 ແຫ່ງ, ມີຣີສອດ 9 ແຫ່ງ, ມີເຮືອນພັກ 165 ແຫ່ງ ແລະ ມີຮ້ານອາຫານ 34 ແຫ່ງ ໂດຍສະເພາະໃນຕົວເມືອງທີ່ມີການທ່ອງທ່ຽວຂະຫຍາຍຕົວເຊັ່ນ: ເມືອງໂຂງ, ເມືອງປາກເຊ, ເມືອງປາກຊ່ອງ ແລະ ເມືອງຈຳປາສັກ ຖ້າສະເລ່ຍແລ້ວແຂວງຈຳປາສັກສາມາດຮອງຮັບນັກທ່ອງທ່ຽວໄດ້ເຖິງ 40.00 ຄົນຕໍ່ມື້.
ທ່ານ ທຸຍ ເພັດສະຫວັນ ໃຫ້ຮູ້ຕື່ມວ່າ: ນັບແຕ່ ສປປ ລາວ ເວົ້າລວມເວົ້າສະເພາະແຂວງຈຳປາສັກໄດ້ເປີດປີທ່ອງທ່ຽວໃນຕົ້ນປີ 2018 ມາເຖິງປັດຈຸບັນເຫັນວ່າບັນຍາກາດນັກທ່ອງທ່ຽວເຂົ້າມາຈັບຈ່ອງທີ່ພັກແຮມແມ່ນດີຂຶ້ນ ໂດຍສະເພາະແມ່ນເຂດການທ່ອງທ່ຽວບ້ານຄອນ-ດອນເດດ ເມືອງໂຂງ ແຕ່ສະເພາະໃນຕົວເມືອງປາກເຊ ນັກທ່ອງທ່ຽວຖືວ່າຍັງປົກກະຕິບໍ່ພົ້ນເດັ່ນເທົ່າທີ່ຄວນ ອາດຈະຍ້ອນໃນຕົວເມືອງບໍ່ມີກິດຈະກຳທີ່ຈະດຶງດູດເຂົາເຈົ້າເຊັ່ນ: ຕະຫຼາດກາງຄືນ ແລະ ກິດຈະກຳການທ່ອງທ່ຽວຕ່າງໆ ດີເທົ່າທີ່ຄວນ. 


ແຕ່ແນວໃດກໍ່ຕາມໃນສະມາຄົມພວກເຮົາກໍ່ໄດ້ສືບຕໍ່ບຳລຸງ ແລະ ຝຶກອົບຮົມດ້ານການບໍລິການໂຮງແຮມ,ເຮືອນພັກ,ຮ້ານອາຫານ ເພື່ອຍົກສູງຄຸນນະພາບໃຫ້ໄດ້ມາດຕະຖານສາກົນ.ປັດຈຸບັນສະມາຄົມເຮົາໄດ້ຮັບທຶນຊ່ວຍເຫຼືອຈາກໂຄງການສົ່ງເສີມໂຄງລ່າງພື້ນຖານການທ່ອງທ່ຽວ ໃນການຝຶກອົບຮົມຄູຝຶກການບໍລິການໃນໂຮງແຮມ,ຮ້ານອາຫານເຊັ່ນ: ແມ່ບ້ານ, ແຕ່ງກິນ, ມາລະຍາດໃນການຕ້ອນຮັບແຂກຄົນ ແລະ ອື່ນໆ.


ຂ່າວ-ພາບ: ຄຳຫຼ້າ ໜັງສືພິມຈໍາປາໃໝ່ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments