ສະພາປະຊາຊົນແຂວງພາກໃຕ້ແລະສະພາປະຊົນນະຄອນໂຮ່ຈິມິນຈັດກອງປະຊຸມແລກປ່ຽນບົດຮຽນ





ກອງປະຊຸມສໍາມະນາແລກປ່ຽນບົດຮຽນລະຫວ່າງສະພາປະຊາຊົນແຂວງພາກໃຕ້ຂອງ ສປປ ລາວ ແລະ ສະພາປະຊາຊົນນະຄອນໂຮ່ຈິມິນ ສສ ຫວຽດນາມ ໄດ້ຈັດຂຶ້ນໃນວັນທີ 23 ມີນາ 2018 ຢູ່ທີໂຮງແຮມຈໍາປາສັກແກຣນ ໂດຍໃຫ້ກຽດເຂົ້າຮ່ວມຂອງທ່ານ ພົງສະເໜ່ ຍຸຕິທໍາ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ສະພາແຫ່ງຊາດລາວ, ທ່ານ ເມກສະຫວັນ ພົມພິທັກ ຮອງເລຂາພັກແຂວງ ປະທານສະພາປະຊາຊົນແຂວງຈໍາປາສັກ, ທ່ານ ນາງ ຫງວຽນ ທິ ກວຽດ ເຕິມ ຮອງເລຂາຄະນະພັກນະຄອນ ປະທານສະພາປະຊາຊົນນະຄອນ ໂຮ່ຈິມິນ. ມີປະທານສະພາ, ຮອງປະທານສະພາ ແລະ ສະມາຊິກສະພາປະຊາຊົນຂັ້ນແຂວງ ຈາກ 5 ແຂວງພາກໃຕ້ເຂົ້າຮ່ວມຄື: ແຂວງສະຫວັນນະເຂດ, ແຂວງຈໍາປາສັກ, ແຂວງສາລະວັນ, ແຂວງເຊກອງ, ແຂວງອັດຕະປື.

ທ່ານ ພົງສະເໜ່ ຍຸຕິທໍາ ໃຫ້ຮູ້ວ່າ: ກອງປະຊຸມສໍາມະນາຄັ້ງນີ້ ແມ່ນມີຄວາມໝາຍສໍາຄັນຫຼາຍດ້ານ ເພາະປັດຈຸບັນ ສະພາແຫ່ງຊາດ, ສະພາປະຊາຊົນຂັ້ນແຂວງ ກໍາລັງສຸມໃສ່ສ້າງ ແລະ ປັບປຸງບັນດານິຕິກໍາ, ກົນໄກ, ລະບອບ, ລະບຽບການ ກໍ່ຄືແບບແຜນວິທີເຮັດວຽກຂອງກົງຈັກການຈັດຕັ້ງຕ່າງໆ ທັງຂັ້ນສູນກາງ-ຂັ້ນທ້ອງຖິ່ນ ໃຫ້ໄດ້ດໍາເນີນການຈັດຕັ້ງປະຕິບັດຢ່າງມີຜົນສໍາເລັດ. ພ້ອມນີ້ກອງປະຊຸມດັ່ງກ່າວຍັງເປັນບົດຮຽນໃນການຈັດຕັ້ງປະຕິບັດ ພາລະບົດບາດ, ສິດ-ໜ້າທີ່ຂອງສະພາໃຫ້ມີຄວາມເຂັ້ມແຂງ ແລະ ເປັນການຍົກລະດັບຄວາມຮູ້ຄວາມສາມາດໃຫ້ແກ່ສະມາຊິກສະພາປະຊາຊົນຂັ້ນແຂວງອີກດ້ວຍ.


ກອງປະຊຸມໄດ້ສະເໜີຜ່ານເນື້ອໃນຂອງບົດ ພາຍໃຕ້ຫົວຂໍ້ “ ກອງປະຊຸມສະພາປະຊາຊົນ ”, ສະເໜີບາງບົດຮຽນ ແລະ ປະສົບການຂອງສະພາປະຊາຊົນ, ບົດພາຍໃຕ້ຫົວຂໍ້: ປະສົບການໃນການເຄື່ອນໄຫວ ຂອງຄະນະກໍາມະການເສດຖະກິດ-ງົບປະມານ, ບົດພາຍໃຕ້ຫົວຂໍ້: ປະສົບການໃນການເຄື່ອນໄຫວ ຂອງຄະນະກໍາມະການກົດໝາຍ, ບົດພາຍໃຕ້ຫົວຂໍ້: ປະສົບການໃນການເຄື່ອນໄຫວ ຂອງຄະນະກໍາມະການ ຕົວເມືອງ, ບົດພາຍໃຕ້ຫົວຂໍ້: ປະສົບການໃນການເຄື່ອນໄຫວ ຂອງຄະນະກໍາມະການ ວັດທະນະທໍາ-ສັງຄົມ.


ກອງປະຊຸມຄັ້ງນີ້ຍັງໄດ້ມີການສົນທະນາ ແລກປ່ຽນຄໍາຄິດຄໍາເຫັນ ເຊິ່ງກັນ ແລະ ກັນ ທັງນີ້ກໍ່ເພື່ອແນໃສ່ເຮັດໃຫ້ການຮ່ວມມືແຕ່ລະດ້ານ ຂອງສະພາປະຊາຊົນບັນດາແຂວງດັ່ງກ່າວໄດ້ຮັບການພັດທະນາກ້າວຂຶ້ນເລື້ອຍໆ.ໃນອາທິດດຽວກັນ ສະພາປະຊາຊົນແຂວງຈໍາປາສັກ ນໍາໂດຍທ່ານ ຄໍາສີ ປ່ຽງວໍລະວົງ ກໍາມະການພັກແຂວງ, ຮອງປະທານສະພາປະຊາຊົນແຂວງຈໍາປາສັກ ພ້ອມຄະນະ ໄດ້ໃຫ້ກຽດຕ້ອນຮັບຄະນະຜູ້ແທນຂັ້ນສູງ ຂອງສະພາປະຊາຊົນແຂວງ ກອນຕູມ ແຫ່ງ ສສ ຫວຽດນາມ ນໍາໂດຍທ່ານ ຫງວຽນ ເຖ໋ ຮາຍ ກໍາມະການພັກແຂວງ ຮອງປະທານສະພາປະຊາຊົນ ແຂວງກອນຕູມ ພ້ອມຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ.


ຂ່າວ-ພາບ: ຈັນທະວີສັກ ໜັງສືພິມຈໍາປາໃໝ່ 

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments