ໂຄງການຊ່ວຍເຫຼືອດ້ານມະນຸດສະທຳແຂວງກວາງນາມເຄື່ອນໄຫວກວດພະຍາດ ແລະຜ່າຕັດຕາ ບໍ່ໄດ້ເສຍຄ່າ ຢູ່ທີ່ໂຮງໝໍແຂວງເຊກອງ



ໃນລະຫວ່າງວັນທີ 6-7 ມີນາ 2018 ນີ້ ມູນນິທິຊ່ວຍເຫຼືອດ້ານມະນຸດສະທຳ ແຂວງກວາງນາມ ສສ ຫວຽດນາມພ້ອມຄະນະ ເຊິ່ງປະກອບມີໂຮງໝໍປາຊິຟິກແຂວງກວາງນາມ, ຊ່ຽວຊານຜ່າຕັດຕາ ມາຈາກນະຄອນຫຼວງໂຮ່ຈີມິນ ແລະນັກທຸລະກິດປະກອບການ ນຳໂດຍທ່ານ ຮວາງເຈົາສິນ, ອາດີດຮອງເລຂາພັກແຂວງກວາງນາມ , ຮອງປະທານສະມາຄົມມິດຕະພາບຫວຽດນາມ-ລາວ ແຂວງກວາງນາມ ສສ ຫວຽດນາມ ພ້ອມດ້ວຍຊ່ຽວຊານດ້ານການຜ່າຕັດຕາ,ພະນັກງານແພດ ແລະຕາງໜ້ານັກທຸລະກິດປະກອບການ ມີທັງໝົດ 22 ຄົນ ໄດ້ເຄື່ອນໄຫວກວດພະຍາດທົ່ວໄປ ແລະຜ່າຕັດຕາ ແບບບໍ່ໄດ້ເສຍຄ່າ ຢູ່ທີ່ໂຮງໝໍແຂວງເຊກອງ ເຊິ່ງມີປະຊາຊົນໃນ 6 ບ້ານເທສະບານແຂວງເຂົ້າຮ່ວມກວດພະຍາດດັ່ງກ່າວ.
ທັງນີ້ກໍເພື່ອປະຕິບັດຕາມເນື້ອໃນເອກະສານໃນການປະສານສົມທົບການເຄື່ອນໄຫວລະຫວ່າງສະມາຄົມມິດຕະພາບ ຫວຽດນາມ-ລາວແຂວງກວາງນາມ ແລະ ສະມາຄົມມິດຕະພາບລາວ-ຫວຽດນາມ ແຂວງເຊກອງ ທີ່ໄດ້ເຊັນສັນຍາໃນວັນທີ 21 ພະຈິກ 2013 ແລະຄວາມຮຽກຮ້ອງຕ້ອງການຂອງສະມາຄົມມິດຕະພາບລາວ-ຫວຽດນາມແຂວງເຊກອງ ໃນເດືອນ ມີນາ ປີ 2017 ສະນັ້ນສະຫະພັນອົງການຈັດຕັ້ງມິດຕະພາບ ແລະສະມາຄົມມິດຕະພາບລາວ-ຫວຽດນາມ ແຂວງກວາງນາມ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ເຄື່ອນໄຫວຈັດຕັ້ງປະຕິບັດກ່ຽວກັບໂຄງການກວດພະຍາດທົ່ວໄປ ແລະ ຜ່າຕັດຕາ ແບບບໍ່ເສຍຄ່າ ເຊິ່ງມີປະຊາຊົນມາກວດພະຍາດທັງໝົດ 449 ຄົນ, ຜ່າຕັດ-ລອກຕາ 31 ຄົນ ພ້ອມທັງແຈກຢາຍຢາ ແລະມອບຂອງຂັວນ ( ອາຫານແຫ້ງ-ອາຫານສຳເລັດຮູບ ) ໃຫ້ແກ່ປະຊາຊົນທີ່ເຂົ້າມາກວດພະຍາດດັ່ງກ່າວຕື່ມອີກ; ເຊິ່ງໃນໄລຍະຜ່ານມາ ໂຄງການຊ່ວຍເຫຼືອດ້ານມະນຸດສະທໍາຢູ່ແຂວງເຊກອງ ໄດ້ປະກອບສ່ວນ ແລະຊຸກຍູ້ການພົວພັນມິດຕະພາບພິເສດ ແລະ ການຮ່ວມມືຮອບດ້ານ ລະຫວ່າງສອງແຂວງແຮກສ່ຽວ ແຂວງເຊກອງ-ກວາງນາມ ນັບມື້ພັດທະນາເຂົ້າສູ່ລວງເລິກ ແລະປະຕິບັດວຽກງານໃຫ້ໄດ້ຮັບຜົນສໍາເລັດສູງ.



ໃນຂະນະດຽວກັນ ໄດ້ມີກອງປະຊຸມສະຫຼຸບຫຍໍ້ 5 ປີ ໃນການປະຕິບັດບົດບັນທຶກສັນຍາຮ່ວມມືເຄື່ອນໄຫວວຽກງານການຕ່າງປະເທດມວນຊົນ ລະຫວ່າງ ສະມາຄົມມິດຕະພາບລາວ-ຫວຽດນາມ ແຂວງເຊກອງ ແລະ ສະມາຄົມຫວຽດນາມ-ລາວ ແຂວງກວາງນາມ ຝ່າຍລາວ ນຳໂດຍ ທ່ານ ປອ ຄຳພຽມ ບົວລະພາ ຮອງເລຂາພັກແຂວງ,ປະທານສະມາຄົມມິດຕະພາບລາວ-ຫວຽດນາມ ແຂວງເຊກອງ ພ້ອມຄະນະ ຝ່າຍ ສສ ຫວຽດນາມ ນຳໂດຍທ່ານ ຮວາງເຈົາສິນ ຮອງປະທານສະມາຄົມມິດຕະພາບຫວຽດນາມ-ລາວ ແຂວງກວາງນາມ ພ້ອມດ້ວຍຄະນະ, ໃນວາລະກອງປະຊຸມ ທັງສອງຝ່າຍໄດ້ຜັດປ່ຽນກັນລາຍງານການເຄື່ອນໄຫວວຽກງານຂອງສະມາຄົມ ເຊິ່ງແຕ່ລະຝ່າຍໄດ້ຕີລາຄາສູງຕໍ່ຜົນສໍາເລັດການຮ່ວມມືສອງຝ່າຍ, ກອງປະຊຸມໄດ້ຈັດຂຶ້ນໃນຕອນເຊົ້າວັນທີ 7 ມີນາ ນີ້ ຢູ່ທີ່ຫ້ອງປະຊຸມຊັ້ນ 3 ຫ້ອງວ່າກາປົກຄອງແຂວງເຊກອງ




ພາບ-ຂ່າວ: ພຸດທະສອນ (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments