ສສຊ ເຂດ 16 ລົງພົບປະ ປະຊາຊົນ 2 ເມືອງພູດອຍ




ໃນລະຫວ່າງວັນທີ 27 ກຸມພາຫາ 5 ມີນາ 2018 ຜ່ານມາ, ທ່ານ ດົງເພັດ ພະຍົນ ແລະທ່ານ ນີສອນ ວືອິນຢາວ ຮອງປະທານສະພາປະຊາຊົນແຂວງເຊກອງ, ພ້ອມດ້ວຍບັນດາທ່ານສະມາຊິກສະພາແຫ່ງຊາດ (ສສຊ) ຊຸດທີ VIII ເຂດເລືອກຕັ້ງທີ 16 ແຂວງເຊກອງ ແລະສະມາຊິກສະພາປະຊາຊົນແຂວງ (ສສຂ) ໄດ້ເຄື່ອນໄຫວພົບປະຢ້ຽມຢາມອຳນາດການປົກຄອງ ແລະປະຊາຊົນຕາມຈຸດຕ່າງໆ 2 ເມືອງພູດອຍ (ກະລຶມ-ດາກຈຶງ) ໃນນີ້ເມືອງກະລຶມມີ: ບ້ານໂຣະໃຫຍ່, ວັງປະງໍ, ປາຕຣາງ, ຕະນຶງ ແລະເມືອງດາກຈຶງມີບ້ານດາກປອງ, ບ້ານປຣາວ, ດາກຕະອອກໃຫຍ່, ດາກຈາບົງ ແລະບ້ານດາກຣັນ. ພ້ອມທັງ ມອບເຄື່ອງຊ່ວຍເຫຼືອຈໍານວນໜຶ່ງໃຫ້ປະຊາຊົນທີ່ຍັງທຸກຍາກ ແລະໂຮງຮຽນໃນແຕ່ບ້ານເປັນຕົ້ນເຄື່ອງນຸ່ງຫົ່ມ, ຜ້າຫົ່ມ, ເກີບ, ປຶ້ມອ່ານ-ຂຽນ ແລະອຸປະກອນກີລາ. 





ການລົງເຄື່ອນໄຫວຄັ້ງນີ້ ກໍເພື່ອເປັນການຈັດຕັ້ງຜັນຂະຫຍາຍເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ແລະກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງເຊກອງຊຸດທີ I ທັງນີ້ ກໍເພື່ອແນໃສ່ເຮັດໃຫ້ອົງການຈັດຕັ້ງພັດ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນທຸກຂັ້ນ, ພະ ນັກງານ-ລັດຖະກອນ, ທະຫານ-ຕຳຫຼວດ ແລະປະຊາຊົນລາວບັນດາເຜົ່າໄດ້ຮັບຮູ້ເຊື່ອມຊຶມ ແລະກໍາໄດ້ບັນດາເນື້ອໃນວຽກງານທີ່ສຳຄັນຕ່າງໆຂອງຊາດເຊິ່ງໄດ້ພິຈາລະນາຮັບຮອງເອົາໃນກອງປະຊຸມ ແລະພ້ອມກັນຈັດຕັ້ງປະຕິບັດໃຫ້ບັນລຸຜົນສຳເລັດຕາມຈຸດປະສົງລະດັບຄາດໝາຍທີ່ວາງໄວ້.




ພ້ອມດຽວກັນນີ້, ຍັງເປັນການເປີດໂອກາດໃຫ້ອໍານາດການປົກຄອງທ້ອງຖິ່ນ ໂດຍສະເພາະແມ່ນກຸ່ມບ້ານ, ບ້ານ ແລະປະຊາຊົນບັນດາເຜົ່າໄດ້ປະກອບຄໍາຄິດຄໍາເຫັນເຫັນຄຳສະເໜີຕ່າງໆ ເພື່ອສົນທະນາປຶກສາຫາລືຮ່ວມກັນ. ຫຼັງຈາກນັ້ນ, ບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະສະມາຊິກສະພາປະຊາຊົນແຂວງ ກໍໄດ້ຜັດ ປ່ຽນກັນຂຶ້ນອະທິບາຍ, ຊີ້ແຈງ ແລະໃຫ້ທິດຊີ້ນຳຕໍ່ບັນດາຄຳສະເໜີ ຫຼື ຄຳຊັກຖາມຂອງພໍ່ແມ່ປະຊາຊົນບາງບັນຫາທີ່ຢູ່ໃນຄວາມຮັບຜິດຊອບຂອງຕົນ, ພ້ອມທັງເກັບກຳ ແລະບັນທຶກເອົາຄຳສະເໜີຕ່າງໆຂອງປະຊາຊົນ ເພື່ອນຳໄປສະເໜີຕໍ່ພາກສ່ວນທີ່ກ່ຽວຂ້ອງຢູ່ຂັ້ນສູນກາງ, ຂັ້ນແຂວງ ແລະຂັ້ນເມືອງຄົ້ນຄວ້າ, ພິຈາລະນາ ແລະປັບປຸງແກ້ໄຂໃນຕໍ່ໜ້າ.



ໂອກາດດຽວກັນນີ້, ທ່ານ ດົງເພັດ ພະຍົນ ກໍໄດ້ໃຫ້ທິດຊີ້ນໍາໃຫ້ອຳນາດການປົກຄອງກຸ່ມບ້ານ, ບ້ານຕະຫຼອດຮອດປະຊາຊົນພາຍໃນແຕ່ລະບ້ານ ຈົ່ງເຊີດຊູພ້ອມກັນເອົາໃຈໃສ່ຕໍ່ກັບວຽກງານການເມືອງແນວຄິດໃນການແກ້ໄຂບັນຫາປະກົດການຫຍໍ້ທໍ້ໃນສັງຄົມ, ເອົາໃຈໃສ່ໃນການປະຕິບັດລະບຽບກົດໝາຍ, ເພີ່ມທະວີບົດບາດໃນການເຕົ້າໂຮມຄວາມສາມັກຄີໃຫ້ເປັນປຶກແຜ່ນແໜ້ນໜາ, ສືບ ຕໍ່ປັບປຸງແຜນວຽກໃຫ້ທຸກຄອບຄົວເປັນຫົວໜ່ວຍປ້ອງກັນຄວາມສະຫງົບ, ພາຍໃນຄອບຄົວຕ້ອງມີຄວາມສະຫງົບ, ຕ້ອງມີຄວາມສາມັກຄີ, ປະຕິບັດຕາມແຜນການຂອງອໍານາດການປົກຄອງບ້ານ ແລະສືບຕໍ່ສ້າງເສດຖະກິດຄອບຄົວໃຫ້ດີຂຶ້ນເປັນກ້າວໆ ເພື່ອພ້ອມກັນຫຼຸດພົ້ນອອກຈາກຄວາມທຸກຍາກ.


ຂ່າວ-ພາບ : ສັນຍາ (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments