ພະແນກການເງິນແຂວງເຊກອງ ເລື່ອນສະມາຊິກພັກສຳຮອງຂຶ້ນສົມບູນ





ແຂວງເຊກອງ,ວັນທີ 07/03/2018 : ໜ່ວຍພັກພະແນກການເງິນ ແລະໜ່ວຍພັກຄັງເງິນ-ຫ້ອງບັນຊີ ທີ່ຂຶ້ນກັບຄະນະພັກຮາກຖານພະແນກການເງິນແຂວງເຊກອງໄດ້ຈັດພິທີເລື່ອນສະມາຊິກພັກປະຊາຊົນປະຕິວັດລາວສະໄໝສຳຮອງຂຶ້ນສົມຈຳນວນ 6 ສະຫາຍ, ຍິງ 3 ສະຫາຍ. ໂດຍພິທີໄດ້ຈັດຂຶ້ນໃນຕອນບ່າຍວັນທີ 6 ມີນາ 2018 ທີ່ຫ້ອງປະຊຸມພະແນກການເງິນແຂວງ ເປັນກຽດເຂົ້າຮ່ວມຂອງສະຫາຍ ທອນສົມມັກ ຈັນທະສີດາ ເລຂາຄະນະພັກຮາກຖານ, ຫົວໜ້າພະແນກການເງິນແຂວງ, ມີເລຂາ-ຮອງເລຂາຄະນະໜ່ວຍພັກ, ສະມາຊິກພັກສົມບູນ-ສຳຮອງ ແລະແຂກຖືກເຊີນເຂົ້າຮ່ວມ.



ໃນພິທີສະຫາຍ ບົວລຽນ ໂພທິລາດ ຄະນະໜ່ວຍພັກພະແນກການເງິນ ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງວ່າດ້ວຍການເລື່ອນສະມາຊິກພັກສຳຮອງຂຶ້ນສົມບູນ. ຫຼັງຈາກນັ້ນ ສະຫາຍ ນາງ ອ່ອນນັນ ພົມມະຫາໄຊ ເລຂາໜ່ວຍພັກຄັງເງິນ-ຫ້ອງບັນຊີ ກໍຂຶ້ນຮັບຮອງເອົາ. ທັງ 2 ໜ່ວຍພັກແມ່ນຂຶ້ນກັບການຊີ້ນຳ-ນຳພາໂດຍກົງ ແລະຮອບດ້ານຂອງຄະນະພັກຮາກຖານພະແນກການເງິນແຂວງ ຊຶ່ງປັດຈຸບັນມີສະມາຊິກທັງໝົດ 59 ສະຫາຍ, ຍິງ 20 ສະຫາຍ.


ໂອກາດດັ່ງກ່າວ ສະຫາຍ ທອນສົມມັກ ຈັນທະສີດາ ກໍໃຫ້ກຽດມີຄຳເຫັນ ແລະໂອ້ລົມສະມາຊິກພັກສົມບູນ ໃໝ່ເອົາໃຈໃສ່ປະຕິບັດຄຳປະຕິຍານຂອງຕົນຢ່າງເຂັ້ມງວດຄຽງຄູ່ກັບການປະຕິບັດສິດ, ໜ້າທີ່ ແລະຂໍ້ຫ້າມຂອງສະມາ ຊິກພັກ, ບຸກບືນເຮັດວຽກໃຫ້ຫຼ້ອນໜ້າທີ່ຕາມທີ່ພັກ ແລະລັດ ກໍຄືການຈັດຕັ້ງຂັ້ນເທິງມອບໝາຍໃຫ້, ເພີ່ມທະວີຄວາມສາມັກຄີ, ຄວາມເປັນເອກະພາບ ເພື່ອພ້ອມກັນເສີມຂະຫຍາຍໝາກຜົນ, ຜົນງານ ແລະມູນເຊື້ອອັນດີງາມຂອງພັກທີ່ເປັນປະໂຫຍດແກ່ການຈັດຕັ້ງ, ສັງຄົມ ກໍຄືປະເທດຊາດ ທັງນີ້ ກໍເພື່ອເປັນກຳລັງແຮງໃນການສ້າງໜ່ວຍພັກທີ່ຕົນສັງກັດຢູ່ໃຫ້ມີຄວາມເຂັ້ມແຂງຂຶ້ນເລື້ອຍໆ.




ຕອນທ້າຍສະຫາຍເລຂາຄະນະພັກຮາກຖານ ໄດ້ເນັ້ນໃຫ້ສະມາຊິກພັກທຸກສະຫາຍເອົາໃຈໃສ່ຄົ້ນຄວ້າເຊື່ອມຊຶມແນວທາງນະໂຍບາຍ, ມະຕິຄຳສັ່ງຂອງພັກ, ລັດຖະທຳມະນູນ ແລະກົດໝາຍຂອງລັດ, ເພີ່ມທະວີຍົກສູງພາລະບົດບາດການນຳພາຂອງພັກເຂົ້າໃນທຸກຂົງເຂດວຽກງານ, ຕ້ານ ແລະສະກັດກັ້ນແນວຄິດເອກະຊົນ, ອາດຍາສິດ, ແນວຄິດທ້ອງຖິ່ນ, ສວຍໃຊ້ໜ້າທີ່ຕຳແໜ່ງສໍ້ລາດບັງຫຼວງ, ຫຼິ້ນກິນຟຸມເຟືອຍ ແລະອື່ນໆທີ່ສ້າງຄວາມເຊື່ອມເສຍແກ່ການຈັດຕັ້ງພັກ, ປະກອບສ່ວນເຂົ້າໃນການກໍສ້າງພັກເຮັດໃຫ້ພັກປອດໃສ, ໜັກແໜ້ນ, ເຂັ້ມແຂງທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ເຂັ້ມແຂງທາງດ້ານແບບແຜນວິທີນຳພາ, ດຳເນີນການຕຳນິຕິຊົມຕົນເອງ ແລະ ຕິຊົມໝູ່ເພື່ອນເປັນປະຈຳຢ່າງເຂັ້ມງວດ, ຍົກສູງສະຕິປົກປັກຮັກສາພັກ ແລະຮັກສາຄວາມສາມັກຄີພາຍໃນໃຫ້ມີຄວາມແໜ້ນຍິ່ງໆຂຶ້ນ.


ຂ່າວ-ພາບ : ສັນຍາ  (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments