ສໍາເລັດກອງປະຊຸມຫ້ອງວ່າການທົ່ວແຂວງໄຊຍະບູລີປະຈຳປີ 2017




ພາຍຫຼັງທີ່ໄດ້ດໍາເນີນກອງປະຊຸມຫ້ອງວ່າການທົ່ວແຂວງ ໄຊຍະບູລີ ປະຈຳປີ 2017 ມາເປັນເວລາ 2 ວັນຈິ່ງໄດ້ສໍາເລັດລົງໃນວັນທີ 23 ມີນາ 2018 ນີ້, ທີ່ສະໂມສອນຫ້ອງວ່າການແຂວງ, ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ກຳມະການພັກແຂວງ, ຫົວໜ້າຫ້ອງວ່າການແຂວງ, ເຂົ້າຮ່ວມເປັນກຽດມີ ທ່ານ ຍັນຍົງ ສີປະເສີດ ຮອງເລຂາພັກແຂວງ, ຮອງເຈົ້າແຂວງ ໄຊຍະບູລີ, ມີຫົວໜ້າ, ຮອງຫົວໜ້າຫ້ອງວ່າການ 11 ເມືອງ, ມີຫົວໜ້າຫ້ອງການບໍລິຫານແຕ່ລະພະແນກການ, ກົມກອງອ້ອມຂ້າງແຂວງ, ຕະຫຼອດເຖິງພະນັກງານວິຊາການພາຍໃນຫ້ອງວ່າການແຂວງເຂົ້າຮ່ວມ 100 ກວ່າຄົນ.



ໃນກອງປະຊຸມຄັ້ງນີ້, ໄດ້ພ້ອມກັນສະຫຼຸບຕີລາຄາຄືນຢ່າງພາວະວິໄສແລະເລິກເຊິ່ງຕໍ່ການເຄື່ອນໄຫວວຽກງານຫ້ອງວ່າການປະປີ2017ໃນໄລຍະໜຶ່ງປີຜ່ານມາ, ທິດທາງແຜນການປະຈຳປີ2018 ແລະຮັບຟັງການສະເໜີການຍົກສູງຄຸນນະພາບການເປັນເສນາທິການຮັບໃຊ້ການນໍາ; ການຍົກສູງຄຸນນະພາບໃນການສ້າງແຜນດຳເນີນງານຂອງຄະນະພັກຂັ້ນຂອງຕົນ; ຍົກສູງຄຸນນະພາບວຽກງານກໍ່ສ້າງຮາກຖານການເມືອງໃນໄລຍະໃໝ່ແລະບົດແນະນຳກ່ຽວກັບການຈັດຕັ້ງ-ການເຄື່ອນໄຫວຂອງຫ້ອງວ່າການຂັ້ນແຂວງແລະຂັ້ນເມືອງ; 


ນອກນັ້ນ, ໃນກອງປະຊຸມຍັງໄດ້ຮັບຟັງການປະກອບຄໍາຄິດ-ຄໍາເຫັນຈາກຜູ້ແທນກອງປະຊຸມດ້ວຍຄວາມຮັບຜິດຊອບສູງຢ່າງກົງໄປກົງມາແລະສ້າງສັນເຮັດໃຫ້ຜູ້ເຂົ້າຮ່ວມກອງປະຊຸມຄັ້ງນີ້ເຫັນໄດ້ບັນຫາຢ່າງຈະແຈ້ງ, ມີເນື້ອໃນເລິກເຊິ່ງແລະບັນລຸຕາມຄາດໝາຍທີ່ວາງໄວ້, ຈາກນັ້ນກໍ່ໄດ້ຮັບຟັງການໂອ້ລົມຂອງ ທ່ານ ຍັນຍົງ ສີປະເສີດ ຮອງເຈົ້າແຂວງ ໄຊຍະບູລີ, ເຊີ່ງທ່ານ ໄດ້ສະແດງເຖິງຄວາມເປັນຮ່ວງເປັນໃຍແລະມີຄວາມໝາຍສໍາຄັນຕໍ່ວຽກງານຫ້ອງວ່າການ, ໂດຍໃຫ້ທິດຊີ້ນຳບັນຫາໃຈກາງທີ່ຄວນເອົາໃຈໃສ່, ໂດຍສະເພາະການເຊື່ອມຊຶມຕໍ່ພາລະບົດບາດ, ໜ້າທີ່, ຂອບເຂດສິດຂອງຕົນໃຫ້ໜັກແໜ້ນເລິກເຊິ່ງຈະແຈ້ງ, ບໍ່ກ້າວກ່າຍວຽກງານຂອງກັນ ແລະ ກັນນັບທັງພະນັກງານນຳພາ, ພະນັກງານວິຊາການ ແລະ ພະນັກງານບໍລິຫານຮັບໃຊ້ໃນການເສີມຂະຫຍາຍບົດບາດເປັນເສນາທິການ, ການປະສານງານ, ການບໍລິການ ແລະຮັບໃຊ້ໃຫ້ແກ່ການນຳຂອງແຂວງນັບມື້ນັບສູງຂຶ້ນ,ຮັບປະກັນການເປັນໃຈກາງການປະສານງານກັບບັນດາອົງການຈັດຕັ້ງຕ່າງໆ, ເປັນຂົວຕໍ່ລະຫວ່າງຂັ້ນເທິງກັບຂັ້ນລຸ່ມ ແລະ ຂັ້ນລຸ່ມກັບຂັ້ນເທິງ, ການພົວພັນວຽກງານລະຫວ່າງສາຍຕັ້ງ ແລະ ສາຍຂວາງ, ໃຫ້ສອດຄ່ອງກັບສະພາບຄວາມເປັນຈິງ, ໃນຕອນທ້າຍຂອງກອງປະຊຸມຍັງໄດ້ມີການມອບໃບຍ້ອງຍໍໃຫ້ກົມກອງ ແລະ ບຸກຄົນດີເດັ່ນທີ່ມີຜົນງານໃນການປະກອບສ່ວນເຂົ້າໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະໃນຂົງເຂດຫ້ອງວ່າການແຂວງ ແລະ ບັນດາຫ້ອງວ່າການ 11 ເມືອງຕື່ມອີກ. ພາບ ແລະ ຂ່າວ: ມີເດຍລາວ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments