ລັດຖະບານຈີນ ຊ່ວຍເຫລືອອຸປະກອນ ໃຫ້ ສື່ສິ່ງພິມຂອງລາວ




ລັດຖະບານ ແຫ່ງ ສປ ຈີນ ໄດ້ຊ່ວຍເຫລືອອຸປະກອນຮັບໃຊ້ຫ້ອງການ ໃຫ້ແກ່ສຳນັກຂ່າວ ສານປະເທດລາວ, ໜັງສືພິມປະຊາຊົນ ແລະ ໜັງສືພິມພາສາຕ່າງປະເທດ ມູນຄ່າປະມານ 560 ລ້ານກີບ ຫລື ປະມານ 67.520 ໂດລາສະຫະລັດ ເພື່ອປະກອບສ່ວນຮັບໃຊ້ເຂົ້າໃນວຽກງານສື່ມວນຊົນ ໃຫ້ວ່ອງໄວ ແລະ ທັນສະໄໝ ໃນນີ້ປະກອບ ມີ ຄອມພິວເຕີຕັ້ງໂຕະ 44 ຊຸດ, ໂນດບຸກ 8 ໜ່ວຍ, ກ້ອງ ຖ່າຍຮູບ 6 ໜ່ວຍ, ຈັກພິມເອກະສານ 2 ຊຸດ, ວີດີໂອຖ່າຍຮູບເງົາ 1 ຊຸດ, ແທເບລັດ 1 ຊຸດ, ແລະ ອຸປະກອນເສີມສຳລັບກ້ອງຖ່າຍຮູບ, ວີດີໂອ ແລະ ໂດຣນ.



ພິທີມອບ-ຮັບ ເຄື່ອງຊ່ວຍເຫລືອດັ່ງກ່າວ, ໄດ້ຈັດຂຶ້ນໃນວັນທີ 29 ມີນາ 2018 ຢູ່ທີ່ຫ້ອງປະຊຸມໜັງສືພິມພາສາຕ່າງປະເທດ, ນະຄອນຫລວງວຽງຈັນ ຕາງໜ້າມອບໃນຄັ້ງນີ້, ໂດຍທ່ານ ຈ້າວເສິງກ່າງ ທີ່ປຶກສາການເມືອງຂອງສະຖານທູດ ສປ ຈີນ ປະຈຳ ສປປ ລາວ ແລະ ກ່າວຮັບໂດຍ ທ່ານ ສູນທອນ ຄັນທະວົງ ອຳນວຍການໃຫຍ່ສຳນັກຂ່າວສານປະເທດລາວ, ທ່ານ ດວງຈິດ ສະຫວັດບຸນມີ ອຳນວຍການໜັງສືພີມປະຊາຊົນ, ທ່ານ ທອງຫລໍ່ ດວງສະຫວັນ ອຳນວຍການໜັງສືພິມພາສາຕ່າງປະເທດ, ໂດຍການເຂົ້າຮ່ວມ ເປັນສັກຂີພິຍານຂອງ ທ່ານ ສະຫວັນຄອນ ຣາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາພະນັກງານວິຊາການ ຈາກສະຖານທູດ ສປ ຈີນ ປະຈຳ ສປປ ລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.




ໃນໂອກາດດັ່ງກ່າວ, ທ່ານ ສູນທອນ ຄັນທະວົງ ຕ່າງໜ້າໃຫ້ ສື່ສິ່ງພີມ 3 ພາກສ່ວນກ່າວສະ ແດງຄວາມຂອບໃຈມາຍັງລັດຖະບານ ສປ ຈີນ ກໍຄື ສະຖານທູດ ສປ ຈີນ ປະຈຳ ສປປ ລາວ ທີ່ມີຄວາມເປັນຫ່ວງເປັນໃຍ ແລະ ໃຫ້ຄວາມສຳຄັນໃນວຽກງານສື່ມວນຊົນລາວ ທີ່ໄດ້ນໍາເອົາອຸປະກອນຮັບໃຊ້ສື່ມວນຊົນມາມອບໃນຄັ້ງນີ້ ແລະ ຈະໄດ້ນຳເອົາອຸປະກອນດັ່ງກ່າວ, ປະກອບສ່ວນຮັບໃຊ້ວຽກງານຕົວຈິງ ເພື່ອໃຫ້ເກີດປະໂຫຍດສູງສຸດ ເພື່ອພັດທະນາວົງການສື່ມວນຊົນລາວ ກໍຄື ຊາດລາວ ໃຫ້ຈະເລີນກ້າວໜ້າຍິ່ງໆຂຶ້ນ. ພ້ອມກັນນີ້, ຍັງເປັນຂີດໝາຍອັນສຳຄັນ ໃນການເສີມສ້າງສາຍພົວພັນໃຫ້ແກ່ສື່ມວນຊົນລາວ-ຈີນ ກໍຄື ປະຊາຊົນສອງຊາດ ນັບມື້ຂະຫຍາຍຕົວໄປເລື້ອຍໆ.




ຂ່າວ: ເດດສຸວັນ ໄຊຍະວົງ, ພາບ: ສະຫວາດ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments