“ຄວາມເປັນມາຂອງ ວັນວິສາຄະບູຊາ” ວັນສິລໃຫຍ່ ຂຶ້ນ 15 ຄໍ່າ ເດືອນ 6



“ຄວາມເປັນມາຂອງ ວັນວິສາຄະບູຊາ” ວັນສິລໃຫຍ່ ຂຶ້ນ 15 ຄໍ່າ ເດືອນ 6.

ວັນວິສາຂະບູຊາ ຫຍໍ້ມາຈາກ “ວິສາຂະປຸຣະມະນີບູຊາ” ແປວ່າ: “ການບູຊາໃນວັນເພັງເດືອນວິສາຂະ” ຖ້າປີໃດມີອະທິກະມາດ ຄື: ມີເດືອນ 8 ສອງຫົນ ກໍເລື່ອນໄປເປັນກາງເດືອນ 7. ວັນວິສາຂະບູຊາ ເປັນວັນສໍາຄັນຍິ່ງໃນທາງພຣະພຸດທະສາສະໜາເພາະເປັນວັນທີ່ ພຣະພຸດທະເຈົ້າປຣະສູດ ຄືເກີດ ໄດ້ຕັດສະຮູ້ ຄືສຳເລັດ ໄດ້ປະຣິນິພານ ຄືດັບ ເກີດຂຶ້ນກົງກັນທັງ 3 ວາລະຄື:



“ປຣະສູດ” ເມື່ອວັນເພັງເດືອນ 6 ກົງກັບວັນສຸກ ຂຶ້ນ 15 ຄໍ່າ ປີຈໍ ກ່ອນ ພສ 80 ປີ ເປັນປຣະສູດຂອງເຈົ້າຊາຍ ສິດທັດທະ ໃຕ້ຕົ້ນສາລະ ທີ່ລຸນພິນີສະຖານ.

“ຕັດສະຮູ້” ເມື່ອເຈົ້າຊາຍສິດທັດທະ ຊົງຜະນວດໄດ້ 6 ປີພຣະຊົນມາຍຸ 35 ພັນສາ ຊົງຕັດສະຮູ້ ໃຕ້ຮົ່ມໄມ້ສີມະຫາໂພ ຝັ່ງແມ່ນໍ້າເນຣັນຊະລາ ເມືອງ ອຸຣຸເວລາເສນານິຄົມ ໃນຕອນເຊົ້າມື້ວັນພຸດ ຂຶ້ນ 15 ຄໍ່າ ເດືອນ 6 ປີລະກາ ກ່ອນ ພສ 45 ປີ.

ການຕັດສະຮູ້ ອະຣິຍະສັດ 4 ຄືຂອງແທ້ອັນປະເສີດ 4 ປະການ ຂອງພຣະພຸດທະເຈົ້າເປັນການຕັດສະຮູ້ອັນສຸດຍອດ ບໍ່ມີຜູ້ປຽບປານ ວັນຕັດສະຮູ້ຂອງພຣະພຸດທະເຈົ້າ ຈຶ່ງຈັດເປັນວັນສຳຄັນ ເພາະເປັນວັນໃຫ້ກໍາເນີດມີ ພຣະພຸດທະເຈົ້າ ຂຶ້ນໃນໂລກ. ທັມທີ່ພຣະພຸດທະອົງຊົງຕັດສະຮູ້ ອະຣິຍະສັດ 4 ໄດ້ແກ່:

ທຸກ ຄື ຄວາມລຳບາກ ຄວາມບໍ່ສະບາຍກາຍບໍ່ສະບາຍໃຈ.

2. ສະມຸໄທ ຄື ເຫດທີ່ເຮັດໃຫ້ເກີດທຸກ.

3. ນິໂຣດ ຄື ຄວາມດັບທຸກ.

4. ມັກ ຄື ຂໍ້ປະຕິບັດໃຫ້ເຖິງຄວາມດັບແຫ່ງທຸກ.

ທັງ 4 ຂໍ້ນີ້ຖືເປັນສັດຈະທຳ ເອີ້ນວ່າ: ອະຣິຍະສັດ ເພາະເປັນສິ່ງທີ່ພຣະອະຣິຍະເຈົ້າຊົງຄົ້ນພົບ ເປັນສັດຈະທໍາຊັ້ນສູງ ປະເສີດກວ່າສັດຈະທໍາສາມັນທົ່ວໄປ.



“ປະຣິນິພານ” ຫຼັງຈາກຕັດສະຮູ້ແລ້ວ ໄດ້ປະກາດພຣະສາສະໜາ ແລະ ໂປດເວໄນຍະສັດ ເປັນໄລຍະເວລາ 45 ພັນສາພຣະຊົນມາຍຸໄດ້ 80 ພັນສາ ກໍສະເດັດດັບຂັນທະປະຣິນິພານ ເມື່ອວັນອັງຄານ ຂຶ້ນ 15 ຄໍ່າ ເດືອນ 6 ປີ ມະເສັງ ທີ່ ສາລະວະໂນທະຍານ ຂອງມັດລະກະສັດ ເມືອງກຸສິນາຣາ ແຄ້ວນມັດລະ.

ການປະຣິນິພານຂອງພຣະພຸດທະເຈົ້າ ນັບໄດ້ວ່າເປັນການສູນເສຍດວງປະທິບຂອງໂລກ ເປັນການສູນເສຍຄັ້ງຍິ່ງໃຫຍ່ ແລະ ຄັ້ງສຳຄັນຂອງຊາວພຸດທົ່ວໄປມີຄວາມເສົ້າສະຫຼົດໃຈ ແລະ ອາໄລສຸດຈະພັນລະນາ. ພຣະພຸດທະອົງໄດ້ຊົງສະແດງປັດສິມໂອວາດກ່ອນປະຣິນິພານວ່າ: “ເບິ່ງກ່ອນ ພິກຂຸທັງຫຼາຍ ອັນວ່າສັງຂານທັງຫຼາຍຍ່ອມມີຄວາມເສື່ອມສະຫຼາຍໄປເປັນທຳມະດາ ທ່ານທັງຫຼາຍຈົ່ງຍັງກິດທັງປວງອັນເປັນປະໂຫຍດຂອງຕົນ ແລະ ປະໂຫຍດຂອງຜູ້ອື່ນໃຫ້ບໍລິບູນດ້ວຍຄວາມບໍ່ປະໝາດເຖີດ” ຫຼັງຈາກນັ້ນກໍສະເດັດດັບຂັນປະຣິນິພານໃນຣາຕີເພັງເດືອນ 6 ນັ້ນ.



ນັບວ່າເປັນເລື່ອງອັດສະຈັນຍິ່ງ ທີ່ເຫດການທັງ 3 ກ່ຽວກັບວິຖີຊີວິດຂອງພຣະສຳມາສຳພຸດທະເຈົ້າ ເຊິ່ງມີໄລຍະເວລາຫ່າງກັນນັບຫຼາຍສິບປີບັງເອີນເກີດຂຶ້ນໃນວັນເພັງເດືອນ 6 ດັ່ງນັ້ນເມື່ອເຖິງວັນສຳຄັນຢ່າງນີ້ ຊາວພຸດທັງບັນພະຊິດ ແລະ ຄະລືຫັດໄດ້ພ້ອມໃຈກັນປະກອບພິທີບູຊາພຣະພຸດທະອົງ ເປັນກໍລະນີພິເສດ ເພື່ອນ້ອມລຳນຶກເຖິງພຣະກະລຸນາທິຄຸນ ພຣະປັນຍາທິຄຸນ ແລະ ພຣະບໍລິສຸດທິຄຸນ ຂອງພຣະອົງ ຜູ້ເປັນດວງປະທິບຂອງໂລກ.

ຂອບໃຈທີ່ມາ: ອາຈານ ບຸນເຕິມ ສິບຸນເຮືອງ ຮອງຄະນະອໍານວຍການ ວິທະຍາໄລສົງອົງຕື້.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhongtholakhong@gmail.com | www.tholakhong.com

ແຈກໂຊກໃຫຍ່KOLAO
ຕິດຕໍ່ຕົວແທນໂຄລາວ ທົ່ວປະເທດKOLAO

Post a Comment

0 Comments