ເພື່ອເປັນການ ສະເຫຼີມສະຫຼອງ ປີທ່ອງທ່ຽວລາວ 2018 ບ້ານນາງົວ ຈັດພິທີ ເປີດຖໍ້າຫ້ວຍນໍ້າລີນ ເປັນແຫຼ່ງທ່ອງທ່ຽວ ທາງທຳມະຊາດ ເປັນແຫ່ງທຳອິດຂອງເມືອງ



ວັນທີ່ 11 ເມສາ 2018 ນີ້ ຢູ່ທີ່ຖໍ້າຫ້ວຍນໍ້າລີນ ບ້ານນາງົວ ເມືອງເງິນ ແຂວງໄຊຍະບູລີ ໄດ້ຈັດພິທີເປີດຖໍ້າຫ້ວຍນໍ້າລີນ ເປັນແຫຼ່ງທ່ອງທ່ຽວທາງທຳມະຊາດຂອງເມືອງ, ເຂົ້າຮ່ວມເປັນກຽດ ມີ ທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ, ມີທ່ານ ລັດທິ ພົມມະຈິດ ຫົວໜ້າຫ້ອງການຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ,ນາຍບ້ານ ນັກທຸລະກິດຜູ້ປະກອບການຕະຫຼອດຮອດພໍ່ແມ່ປະຊາຊົນເຂົ້າຮ່ວມ.



 

ທ່ານ ອິນເມືອງ ພົມວິໄລ ເລຂາໜ່ວຍພັກນາຍບ້ານໆນາງົວ ກໍ່ໄດ້ຂື້ນກ່າວເປີດຖໍ້າຫ້ວຍນໍ້າລີນ ເປັນແຫຼ່ງທ່ອງທ່ຽວທາງທຳມະຊາດ ຢ່າງເປັນທາງການ ຈາກນັ້ນທ່ານ ຄຳຫຼ້າ ອິນສຸນັນ ຜູ້ເຮັດວຽກງານຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວບ້ານ,ກໍ່ໄດ້ຜ່ານ ປະຫວັດຄວາມເປັນມາ ຂອງຖ້ຳຫ້ວຍນ້ຳລີນ ເຊິ່ງຕັ້ງຢູ່ທາງທິດໃຕ້ ຂອງບ້ານນາງົວ ມີໄລຍະຫ່າງຈາກບ້ານ 2.500 ແມັດ ໃນຖ້ຳມີລວງຍາວ 40 ແມັດ, ກວ້າງ 4 ແມັດ ຖ້ຳແຫ່ງນີ້ເປັນຖ້ຳ ທຳມະຊາດ ນັບແຕ່ປະຊາຊົນບ້ານນາງົວ ໄດ້ມາຕັ້ງຖີ່ນຖານຢູ່ບ່ອນນີ້ ແລະ ໄດ້ມາພົບເຫັນຖ້ຳດັ່ງກ່າວ ແລະ ກໍ່ເຊື່ອໄດ້ວ່າ ມີຜູ້ຄົນຫຼື ພະສົງສຳມະເນນ ຢູ່ກ່ອນແລ້ວ, ເຊີ່ງມີຮອງຮອຍ ແລະ ວັດຖຸບາງສະນິດຄ້າງເຫຼືອໄວ້ ເຊັ່ນ: ບາດພະ ແລະ ມັດຢາສະມຸນໄພ ຂອງຄົນບູຮານປະໄວ້ໃນຖ້ຳ ໃນໄລຍະກ່ອນ. ບໍລິເວນຖໍ້າແຫ່ງນີ້ ມີ ທີວທັດທໍາມະຊາດ ອັນແສນງົດງາມ, ມີຕົ້ນໄມ້ໃຫຍ່ ແລະ ມີປ່າດົງອັນແສນຊຸມເຢັນ ເປັນສະຖານທີ່ອີກແຫ່ງໜຶ່ງ ທີ່ເໝາະສົມກັບການທ່ຽວຊົມທຳມະຊາດ, ການພັກຜ່ອນ.



ຕອນທ້າຍ ທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ ກໍ່ໃຫ້ກຽດໂອ້ລົມ ກ່ອນອື່ນທ່ານໄດ້ຍ້ອງຍໍຊົມ ອົງການປົກຄອງບ້ານນາງົວ ທີ່ມີຄວາມຕັດສິນໃຈສູງ ໃນການກະກຽມສະຖານທີ ເປັນຕົ້້ນແມ່ນ ສ້ອມແປງເສັ້ນທາງ, ອານາໄມບໍລິເວນຂອບເຂດດັງກ່າວມີຄວາມສວຍສົດງົດງາມ ໂດຍແມ່ນເຮືອແຮງ, ແລະ ທືນຮອນຂອງປະຊາຊົນບ້ານນາງົວເອງ ໃຫ້ພ້ອມກັນສືບຕໍ່ ປົກປັກຮັກສາແລະ ພັດທະນາແຫຼ່ງທ່ອງທ່ຽວແຫ່ງນີ້ ໃຫ້ເປັນແຫຼ່ງທ່ອງທ່ຽວ ທີ່ຍືນຍົງ ເພື່ອແນໃສ່ສ້າງລາຍຮັບໃຫ້ງົບປະມານແຫ່ງຊາດ ໃນອະນາຄົດ




ໂດຍ: ອິນແປງ ແຫວນຄຳ



Post a Comment

0 Comments