ສາລະວັນ ເອົາໃຈໃສ່ຄຸ້ມຄອງລາຄາສິນຄ້າ ໃນໄລຍະ ບຸນປີໃໝ່ລາວ 2018



ໄລຍະເທສະການ ບຸນປີໃໝ່ລາວ 2018 ທີ່ ຈະມາເຖິງນີ້, ແຂວງສາລະວັນ ຈະເອົາໃຈໃສ່ ໃນການລົງຕິດຕາມ, ກວດກາ ແລະ ການຄຸ້ມຄອງລາຄາສິນຄ້າ ໃນທ້ອງຕະຫລາດ ຂອງຜູ້ປະກອບການ ເພື່ອເຮັດໃຫ້ສັງຄົມ ມີຄວາມສະຫງົບ, ປົກປ້ອງສິດຜົນປະໂຫຍດ ຂອງຜູ້ຊົມໃຊ້ໄດ້ຮັບຄວາມເປັນທຳ ທາງດ້ານລາຄາ, ປະລິມານ ແລະຄຸນນະພາບ ໂດຍສະເພາະ ແມ່ນຕະຫຼາດໃຫຍ່ ໃນ 3 ຕົວເມືອງຄື: ເມືອງສາລະວັນ, ຄົງເຊໂດນ ແລະເມືອງເລົ່າງາມ.

ທ່ານ ຄຳຜ່ານ ສີລາວີ ຮັກສາການຫົວໜ້າ ພະແນກອຸດສາຫະກຳ ແລະ ການຄ້າແຂວງ ໄດ້ເປີດເຜີຍ ຕໍ່ສື່ມວນຊົນວ່າ: ການຄຸ້ມຄອງລາຄາສິນຄ້າ ເປັນວຽກໜຶ່ງທີ່ມີຄວາມສຳຄັນ ຕໍ່ຜູ້ຊົມໃຊ້ ແລະ ເປັນການຄຸ້ມຄອງຜູ້ປະກອບການ ທີ່ຈະສ່ວຍໂອກາດ ຂຶ້ນລາຄາສິນຄ້າ, ເອົາປຽບຜູ້ຊົມໃຊ້ ແລະ ໄດ້ປະສານສົມທົບ ກັບຄະນະຈັດສັນຕະຫລາດ, ສ່ວຍສາອາກາອນ, ຕຳຫລວດ ແລະ ຂະແໜງການທີ່ກ່ຽວຂ້ອງ ເພື່ອຕ້ານ ແລະ ສະກັດກັ້ນ ການປັ່ນປ່ວນ, ກັກຕຸນ, ການສ່ວຍໂອກາດຂຶ້ນລາຄາ ສິນຄ້າສູງເກີນໄປ. ໃນນັ້ນລາຄາ ທີ່ຈະໄດ້ເອົາໃຈໃສ່ຄຸ້ມຄອງ ເປັນພິເສດແມ່ນ ສິນຄ້າທີ່ມີຜົນກະທົບໄວ ຕໍ່ການດຳລົງຊີວິດ ຂອງພໍ່ແມ່ປະຊາຊົນ ເປັນຕົ້ນ: ນ້ຳມັນເຊື້ອໄຟ, ອາຍແກັດ, ເຂົ້າ, ຊີ້ນ (ໝູ, ງົວ, ຄວາຍ), ໄກ່, ປາ ແລະ ພືດພັກຕ່າງໆ ບົນພື້ນຖານດຳລັດ 474/ນຍ ແລະ ຕາມລະບຽບການ ທີ່ກ່ຽວຂ້ອງດ້ວຍການຄິດໄລ່ໂຄງປະກອບລາຄາ ໃນແຕ່ລະຂອດຢ່າງຊັດເຈນ.

ນອກຈາກນັ້ນ ຍັງໄດ້ອອກແຈ້ງການ ແລະ ເຜີຍແຜ່ເຊື່ອມຊຶມ ລະບຽບການ, ນິຕິກຳ, ກົດໝາຍທີ່ກ່ຽວຂ້ອງ ໃຫ້ແກ່ຜູ້ປະກອບການເຊັ່ນ: ຜູ້ຜະລິດ, ຜູ້ນຳເຂົ້າ-ສົ່ງອອກ ແລະ ຜູ້ຈຳໜ່າຍ ຕະຫລອດຮອດພໍ່ແມ່ປະຊາຊົນ ໃຫ້ເຂົ້າໃຈ ຕໍ່ກັບລະບຽບການດັ່ງກ່າວ ເພື່ອປາສະຈາກ ການຂຶ້ນລາຄາສິນຄ້າ ໃນໄລຍະ ເທສະການບຸນປີໃໝ່ລາວ ຕິດພັນກັບງານສະເຫລີມສະຫລອງ ປີທ່ອງທ່ຽວລາວ 2018 ຂອງແຂວງ, ການຈຳໜ່າຍສິນຄ້າຕ້ອງຕິດລາຄາສິນຄ້າ ເປັນເງິນກີບ ແລະ ຕິດສະຫລາກ ເປັນພາສາລາວ.


ຂ່າວ: ພອນສະໄໝ ໄຊຍະເສນ (ຂປລ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments