ເປີດກອງປະຊຸມຄະນະກຳມະການທ່ອງທ່ຽວອາຊຽນ ແລະ ກອງປະຊຸມພາກພື້ນວ່າດ້ວຍແຜນວຽກສັນຍາຮັບຮູ້ເຊິ່ງກັນ ແລະ ກັນກ່ຽວກັບວິຊາຊີບທ່ອງທ່ຽວອາຊຽນ





ກອງປະຊຸມຄະນະກຳມະການທ່ອງທ່ຽວອາຊຽນ (ASEAN Tourism Committee Meetings) ແລະ ກອງປະຊຸມພາກພື້ນວ່າດ້ວຍແຜນວຽກສັນຍາຮັບຮູ້ເຊິ່ງກັນ ແລະ ກັນກ່ຽວກັບວິຊາຊີບທ່ອງທ່ຽວອາຊຽນ ໄດ້ໄຂຂຶ້ນຢ່າງເປັນທາງການ ໃນວັນທີ 2 ເມສາ 2018 ໃຫ້ກຽດກ່າວເປີກກອງປະຊຸມ ແມ່ນ ທ່ານ ອຸ່ນທວງ ຂາວພັນ, ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຊຶ່ງກອງປະຊຸມດັ່ງກ່າວ ເລີ່ມແຕ່ວັນທີ 2-7 ເມສາ 2018 ທີ່ໂຮງແຮມຫລວງພະບາງວິວ, ມີບັນດາຜູ້ແທນຈາກ 10 ປະເທດສະມາຊິກອາຊຽນ ແລະ ຜູ້ແທນຈາກກອງເລຂາອາຊຽນ ເຂົ້າຮ່ວມ ລວມທັງໝົດ 80 ທ່ານ. 



ຈຸດປະສົງຂອງກອງປະຊຸມຄະນະກຳມະການທ່ອງທ່ຽວອາຊຽນ ແມ່ນເພື່ອທົບທວນຄືນບັນດາກິດຈະກຳພັດທະນາ ແລະ ການສົ່ງເສີມການທ່ອງທ່ຽວ, ປຶກສາຫາລືວາງແຜນກິດຈະກຳ ສຳລັບ ການພັດທະນາການທ່ອງທ່ຽວ ແລະ ລາຍງານ ຄວາມຄືບໜ້າການຈັດຕັ້ງປະຕິບັດ ແລະ ຜັນຂະຫຍາຍກິດຈະກຳດ້ານການທ່ອງທ່ຽວ ທີ່ ບັນດາປະເທດ ສະມາຊິກອາຊຽນ ໄດ້ຕົກລົງຮັບຮອງເອົາຢູ່ໃນກອງປະຊຸມຄະນະກຳມະການທ່ອງ ທ່ຽວອາຊຽນ ທີ່ຈັດຂຶ້ນໃນລະ ຫວ່າງວັນທີ 1-8 ຕຸລາ 2017 ທີ່ໂຢກຈາກາຕ້າ, ປະເທດອິນໂດເນເຊຍ. 




ກອງປະຊຸມດັ່ງກ່າວ ໄດ້ແບ່ງອອກເປັນ 4 ກອງປະຊຸມຍ່ອຍ ຄື: ວັນທີ 2 ເມສາ 2018 ແມ່ນກອງປະຊຸມຄະນະກຳມະການກວດສອບວິຊາຊີບທ່ອງທ່ຽວອາຊຽນ ຄັ້ງທີ 19, ວັນທີ 3-4 ເມສາ ແມ່ນກອງປະຊຸມຄະນະກຳມະການແຂ່ງຂັນທ່ອງທ່ຽວອາຊຽນ (ATCC) ຄັ້ງທີ 5, ວັນທີ 5 ເມສາ ແມ່ນກອງປະຊຸມຄະນະກຳມະການພັດທະນາການທ່ອງທ່ຽວແບບຍືນຍົງ ແລະ ມີສ່ວນຮ່ວມອາຊຽນ (ASITDC) ຄັ້ງທີ 5 ແລະ ກອງປະຊຸມຄະນະກຳມະການຊອກແຫລ່ງທຶນ, ກວດສອບ ແລະ ປະເມີນຜົນການທ່ອງທ່ຽວອາຊຽນ (ATRMEC) ຄັ້ງທີ 5. 




ນອກຈາກນີ້ ຍັງມີກອງປະຊຸມພາກພື້ນວ່າດ້ວຍແຜນວຽກສັນຍາຮັບຮູ້ ເຊິ່ງກັນ ແລະ ກັນກ່ຽວກັບວິຊາຊີບທ່ອງທ່ຽວອາຊຽນ MRA-TP ຊຶ່ງຈະໄດ້ຈັດຂຶ້ນໃນວັນທີ 6-7 ເມສາ 2018. ກອງປະຊຸມດັ່ງກ່າວແນໃສ່ເພື່ອປຶກສາຫາລືກົນໄກການຈັດຕັ້ງປະຕິບັດ MRA-TP ກໍຄືການພັດທະນາບຸກຄະລາກອນທ່ອງທ່ຽວຕາມຫຼັກສູດການຮຽນ-ການສອນວິຊາຊີບທ່ອງທ່ຽວອາຊຽນ ຢູ່ໃນບັນດາ 10 ປະເທດສາມາຊິກອາຊຽນໃຫ້ປະກົດຜົນເປັນຈິງ ແລະ ສາມາດເຄື່ອນຍ້າຍແຮງງານທີ່ມີສີມືໄດ້ຢ່າງເສລີຕາມກົນໄກປະຊາຄົມເສດຖະກິດອາຊຽນ.


ພາບ ແລະ ຂ່າວ: ວສລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments