ຫກປຊ ຮ່ວມກັບ ທພລ ຈະນໍາໃຊ້ລະບົບທັນສະໄໝເຂົ້າໃນການຊໍາລະເງິນປະກັນສັງຄົມ ສໍາລັບຜູ້ ປະກັນຕົນສະໝັກໃຈ



ເພື່ອເຮັດໃຫ້ສະດວກສະບາຍໃນຫຼາຍຊ່ອງທາງໃຫ້ກັບຜູ້ປະກັນຕົນໃນລະບົບສະໝັກໃຈ ສາມາດຊໍາລະເງິນປະກັນສັງຄົມ ໄດ້ຢ່າງສະດວກສະບາຍໃຫ້ຫລາຍຂື້ນ, ຈຶ່ງໄດ້ພິທີເຊັນສັນຍາ ລະຫວ່າງ ທະນາຄານພັດທະນາລາວ (ທພລ) ແລະ ຫ້ອງການກອງທຶນປະກັນສັງຄົມແຫ່ງຊາດ (ຫກປຊ) ວ່າດ້ວຍການບໍລິການຊຳລະເງິນປະກັນສັງຄົມ ຜ່ານທະນາຄານພັດທະນາລາວ ໃນວັນທີ 11 ເມສາ 2018ຜ່ານມານີ້, ທີ່ ສຳນັກງານໃຫຍ່ ທພລ ບ້ານສີຫອມ ເມືອງຈັນທະບູລີ ນະຄອນຫຼວງວຽງຈັນ, ຕາງໜ້າ ທພລ ລົງນາມເຊັນສັນຍາໂດຍ ທ່ານ ບົວລຽນ ພົມມະວົງສາ ຜູ້ອຳນວຍການ ທພລ ແລະ ຫກປຊ ລົງນາມໂດຍ ທ່ານ ປະເດີມພອນ ສົນທະນີ ຜູ້ອຳນວຍການ ຫກປຊ, ເຂົ້າຮ່ວມເປັນສັກຂີພະຍານມີ ຄະນະກົມ ທີ່ຂື້ນກັບທະນາຄານ ແຫ່ງ ສປປ ລາວ ແລະ ອ້ອມຂ້າງ ກະຊວງ ແຮງງານ ແລະ ສະຫວັດດີການສັງຄົມ, ມີຄະນະອຳນວຍການ, ຄະນະພະແນກ, ຄະນະສູນ, ວິຊາການທີ່ກ່ຽວຂ້ອງຂອງທັງສອງຝ່າຍ, ຕາງໜ້າບໍລິສັດ ແລະ ສື່ມວນຊົນຈາກພາກສ່ວນຕ່າງໆ ເຂົ້າຮ່ວມຢ່າງພ້ອມພຽງ.

ພິທີເຊັນສັນຍາໃນຄັ້ງນີ້, ກໍແມ່ນເພື່ອເປັນການນໍາເອົາເຕັກໂນໂລຢີທີທັນສະໄໝ ເຂົ້າຊ່ວຍໃນການຊໍາລະສະສາງເງິນປະກັນສັງຄົມຂອງສະມາຊິກເວົ້າລວມ, ເວົ້າສະເພາະ ກໍ່ຄື ຜູ້ປະກັນຕົນໃນລະບົບສະໝັກໃຈ ສາມາດຊໍາລະເງິນປະກັນສັງຄົມໄດ້ຢ່າງສະດວກສະບາຍໃນຫຼາຍຊ່ອງທາງ ຄືນອກຈາກການຊໍາລະຢູ່ ຫກປຊ ແລ້ວ, ຍັງສາມາດຊໍາລະຜ່ານການໃຫ້ບໍລິການຂອງທະນາຄານພັດທະນາລາວ ເຊັ່ນ: ປ່ອງບໍລິການ ຂອງ ທພລ, LDB Trust, LDB on Bank ແລະ Auto debit (ຊຶ່ງເປັນການຕັດບັນຊີລູກຄ້າໃນແຕ່ລະເດືອນ), ທັງນີ້ກໍເພື່ອ ເປັນການຫຼຸດຜ່ອນການນຳໃຊ້ເງິນສົດໃນການຊໍາລະສະສາງຕາມແນວທາງນະໂຍບາຍທີ່ຂັ້ນເທິງວາງອອກ ເພື່ອຮັບປະກັນຄວາມຖືກຕ້ອງ ວ່ອງໄວ ປອດໄພ ແລະ ປະຢັດຄ່າໃຊ້ຈ່າຍ. ພ້ອມດຽວກັນນີ້ ທາງ ທພລ ແລະ ຫກປຊ ຍັງຈະສືບຕໍ່ສຶກສາພັດທະນາການເຊື່ອມບັດປະກັນສັງຄົມ ເຂົ້າກັບ ບັດ ATM ແລະ ຈະຮ່ວມມືກັນໃນຫຼາຍດ້ານຕື່ມອີກໃນອານາຄົດ.
ຂໍ້ມູນ: ຫກປຊ, ຂ່າວ: ເພັດສະໄໝ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments