ແຂວງຈໍາປາສັກເອົາໃຈໃສ່ກວດກາຄຸນນະພາບສິນຄ້າທີ່ສົ່ງອອກ-ນໍາເຂົ້າ




ທ່ານ ສີຟອງ ແກ້ວເຮືອງມະນີ ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງຈໍາປາສັກ ໃຫ້ຮູ້ວ່າ: ໄລຍະຜ່ານມາພະແນກວິທະຍາສາດ-ເຕັກໂນໂລຊີ ໄດ້ເອົາໃຈໃສ່ເປັນຢ່າງດີໃນການຈັດຕັ້ງເຄື່ອນໄຫວວຽກງານຄຸ້ມຄອງ, ບໍລິການດ້ານວິທະຍາສາດ-ເຕັກໂນໂລຊີ ຄື: ການກວດກາ, ຢັ້ງຢືນຄຸນນະພາບສິນຄ້າສົ່ງອອກ ແລະ ນໍາເຂົ້າ ເປັນຕົ້ນ: ກາເຟ, ເຂົ້າສານ, ມັນຕົ້ນແຫ້ງ, ຢາງພາລາ, ອົກຊີແຊນ, ນໍ້າມັນເຊື້ອໄຟ ທັງນີ້ກໍ່ເພື່ອຮັບປະກັນດ້ານຄຸນນະພາບຂອງຜະລິດຕະພັນສິນຄ້າ ຕອບສະໜອງແກ່ຜູ້ຊົມໃຊ້ໃຫ້ມີຄວາມເພິ່ງພໍໃຈ. 



ນອກຈາກນີ້ການກວດກາບັນດາ ສິນຄ້າອຸປະໂພກ-ບໍລິໂພກ ໃນທົ່ວແຂວງແມ່ນສາມາດພົບເຫັນ ແລະ ກັກຢຶດ ສິນຄ້າທີ່ມີການປອມແປງເຄື່ອງໝາຍທາງດ້ານການຄ້າ ເປັນຈໍານວນຫຼາຍເຊັ່ນ: ແປ້ງນົວກາຈອງ, ຢາຖູແຂ້ວ, ເຫຼົ້າຂາວເມືອງຄົງ, ເຫຼົ້າຈອນນີ, ຢາສະຜົມຊັນຊິວ, ໂທລະສັບຍີ່ຫໍ້ໂນເກຍ, ນໍ້າມັນເຄື່ອງ, ອາໄຫຼ່ລົດຍີ່ຫໍ້ ຄູໂບຕ້າ ທັງນີ້ກໍ່ເພື່ອມີມາດຕະການຕໍ່ຜູ້ລະເມີດ ຊຶ່ງເບື້ອງຕົ້ນແມ່ນກ່າວເຕືອນ, ປັບໃໝ ພ້ອມທັງທໍາລາຍສິນຄ້າດັ່ງກ່າວຖິ້ມ.


ທ່ານ ສີຟອງ ແກ້ວເຮືອງມະນີ ໃຫ້ຮູ້ຕື່ມວ່າ: ປັດຈຸບັນພະແນກ ໄດ້ເຄື່ອນໄຫວກວດກາກ່ຽວກັບຄຸນນະພາບຂອງນໍ້າມັນເຊື້ອໄຟ ຢູ່ຕົ້ນທາງທີ່ນໍາເຂົ້າຄືຢູ່ດ່ານສາກົນວັງເຕົ່າ, ການກວດກາຢູ່ຕາມສາງ, ກວດກາຢູ່ປໍ້າ. ພ້ອມນັ້ນຍັງມີການກວດສອບມາດຕະຖານຂອງຫົວໜ່ວຍວັດແທກ ທີ່ຕິດພັນກັບການຄ້າຂາຍນໍ້າມັນເຊື້ອໄຟ ຕາມແຫ່ງຕ່າງໆເປັນປົກກະຕິເຊັ່ນ: ກວດສອບໂດຍມີການຮ້ອງຮຽນ, ກວດສອບແບບແຈ້ງໃຫ້ຮູ້ລ່ວງໜ້າ, ກວດສອບແບບບັງເອີນ ແລະ ໃນຕໍ່ໜ້າຈະມີການກວດກາດ້ານຄຸນນະພາບ ຂອງສິນຄ້າປະເພດຕ່າງໆ ທີ່ນໍາເຂົ້າຢ່າງເຂັ້ມງວດ (ຕາມມາດຕະຖານແຫ່ງຊາດປະກາດໃຊ້). ໃນຕອນທ້າຍທ່ານ ສີຟອງ ແກ້ວເຮືອງມະນີ ກ່າວຕື່ມອີກວ່າ: ເພື່ອເຮັດໃຫ້ວຽກງານດັ່ງກ່າວໄດ້ຮັບການພັດທະນາຢ່າງມີຄຸນະພາບ ໃນການບໍລິການສັງຄົມຢ່າງທົ່ວເຖິງ ແມ່ນຕ້ອງໄດ້ເພີ່ມຄວາມຮູ້ດ້ານວິຊາການໃຫ້ແກ່ບຸກຄະລາກອນຢ່າງແຂງແຮງ ແລະ ຕອບສະໜອງດ້ານອຸປະກອນທີ່ທັນສະໄໝເຂົ້າໃນວຽກງານຕົວຈິງໃຫ້ພຽງພໍ.


ຂ່າວ-ພາບ: ຈັນທະວີສັກ ໜັງສືພິມຈໍາປາໃໝ່ 

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments