ປະທານສູນກາງອົງການພຸດທະສາສະໜາສຳພັນ ແຫ່ງ ສປປ. ລາວ ໄດ້ໃຫ້ພຣະໂອວາດ ແລະ ປະທານພອນປີໃໝ່ລາວ



ເນື່ອງໃນໂອກາດປີໃໝ່ລາວມາເຖິງນີ້ ຍາທ່ານ ກໍຂໍຝາກທັມ ເປັນເປັນຫຼັກແຫ່ງການສະຫຼອງປີ ໃໝ່ ແລະ ການດຳເນີນຊີວິດຢ່າງຖືກຕ້ອງ ເພື່ອປະໂຫຍດສຸກຂອງທຸກໆ ທ່ານ ຕາມຫຼັກຂອງພຣະພຸດທະ ສາສະໜາ ທີ່ພຣະພຸດທະເຈົ້າ ຊົງຕັດໄວ້ວ່າ ອັບປະມາໂທ ອະມະຕັງ ປະທັງ, ປະມາໂທ ມັດຈຸໂນ ປະທັງ ແປວ່າ ຄວາມບໍ່ປະໝາດເປັນທາງແຫ່ງຄວາມໝັ້ນຄົງຍືນຍົງຕະຫຼອດໄປ, ຄວາມປະໝາດເປັນຫົນທາງ ແຫ່ງຄວາມພິນາດຂາດຊິ້ນຊີວິດ ເພາະສະນັ້ນ ເນື່ອງໃນໂອກາດປີໃໝ່ມາເຖິງ ທາງພັກ-ລັດ ໄດ້ໃຫ້ໂອກາດ ເວລາແກ່ປະຊາຊົນທຸກພາກສ່ວນ ໄດ້ສະຫຼອງມ່ວນຊື່ນ ກໍຈົ່ງພາກັນສະຫຼອງມ່ວນຊື່ນຢ່າງມີສະຕິ ປັນຍາ ບໍ່ປະໝາດ ການສະຫຼອງມ່ວນຊື່ນຢ່າງມີປັນຍາສະຫຼາດ ບໍ່ປະໝາດຄືຢ່າງໃດ? ກໍຄືການເອົາໂອກາດເວລາ ພັກນີ້ ໄດ້ເຮັດສິ່ງທີ່ເປັນປະໂຫຍດໃຫ້ແກ່ຕົນ ແລະ ຄົນອື່ນ ປະໂຫຍດສ່ວນຕົນກໍຄື ໄດ້ໂອກາດກັບບ້ານ ກັບເຮືອນ ໄປພົບປະຍາດພີ່ນ້ອງ ພໍ່ແມ່ເຖົ້າແກ່ ໄດ້ໂອກາດຂໍຂະມາລາໂທດ 


ໃນບາງຢ່າງທີ່ຜິດພາດໄປ ໄດ້ໂອກາດຂໍບຸນຂໍຄຸນນຳທ່ານຜູ້ມີພຣະຄຸນ ທ່ານຜູ້ຊົງຄຸນວຸດທິ ເຖົ້າແກ່ນັກປາດ ໄດ້ໂອກາດທຳບຸນ ຖວາຍທານເພື່ອຕົນ ໄດ້ຮົດສົງພຣະພຸດທະຮູບ ຮົດສົງພຣະສົງສາມະເນນ ຜູ້ຊົງສີນຊົງທັມ ເພື່ອຂໍຂະມາລາ ໂທດ ແລະຂໍບຸນຄຸນ ຂໍພອນອັນປະເສີດ ເພື່ອປະໂຫຍດສຸກຂອງຕົນ ສ່ວນປະໂຫຍດສຸກຂອງຄົນອື່ນ ກໍຄື ໂອກາດປີໃໝ່ລາວມາເຖິງ ກໍຈະໄດ້ພົບປະສ້າງສັນສາມັກຄີກັບພໍ່ແມ່ ຍາດພີ່ນ້ອງ ລູງປ້າອາວອາ ໄດ້ພົບປະ ສາມັກຄີກັນ ຖືໂອກາດປີໃໝ່ຟ້າໃໝ່ມາເຖິງນີ້ ໃຫ້ໂອກາດ ໃຫ້ອະໄພເຊິ່ງກັນແລະກັນ ແລະຍັງໄດ້ອວຍ ໄຊໃຫ້ພອນເຊິ່ງກັນແລະກັນ ສ່ວນຜູ້ທີ່ມີປັນຍາສູງຍິ່ງຂຶ້ນໃນທັມກວ່ານັ້ນ ກໍຖືໂອກາດເວລາພັກນີ້ ໄດ້ ທຳບຸນຖວາຍທານ ບຳເພັນພາວະນາ ອົບຮົມຈິດໃຈຂອງຕົນ ຈຶ່ງຊື່ວ່າເປັນຜູ້ບໍ່ປະໝາດໃນຊີວິດບໍ່ປະໝາດ ໃນບຸນກຸສົນຄຸນງາມຄວາມດີ ທີ່ພຣະພຸດທະເຈົ້າຊົງຕັດວ່າ ຄວາມບໍ່ປະໝາດ ເປັນຫົນທາງແຫ່ງຄວາມ ໝັ້ນຄົງຍືນຍົງຕະຫຼອດໄປ ສ່ວນບຸກຄົນໃດ ມີຄວາມປະໝາດຂາດສະຕິ ເອົາເວລາພັກນີ້ ມົວແຕ່ທ່ຽວຫຼິ້ນ ກິນມືນເມົາເກີນຂອບເຂດ ອຸປັດຕິເຫດກໍຈະຕາມມາ ກໍຈະເຖິງຄວາມພິນາດຂາດຊີວິດລົງໄດ້ ເພາະສະນັ້ນ ຈົ່ງຕັ້ງຢູ່ໃນຄວາມບໍ່ປະໝາດ ຫຼິ້ນປີໃໝ່ ສະຫຼອງປີໃໝ່ຢ່າງມີສະຕິສັມປະຊັນຍະ ລະມັດລະວັງ ບໍ່ປະໝາດ ຫຼິ້ນປີໃໝ່ສະຫຼອງປີໃໝ່ຢ່າງມີປັນຍາ ເອົາສາຣະປະໂຫຍດຈາກປີໃໝ່ໃຫ້ໄດ້.
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments