ປກສ ແຂວງສະຫວັນນະເຂດເປົ້າໝາຍຄ້າຂາຍຢາເສບຕິດ 3 ຄົນໃນຂະນະກຳລັງຊື້-ຂາຍຢາບ້າ ພ້ອມຂອງກາງ 2.000 ເມັດ



ອີງຕາມການລາຍງານຂອງ ນສພ ຄວາມສະຫງົບ  ວ່າ : ໃນວັນທີ 22 ມີນາ 2018, ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດ ຈັບຕົວເປົ້າໝາຍຄ້າຂາຍຢາເສບຕິດໄດ້ 3 ຄົນ ໃນຂະນະທີ່ກຳລັງຊື້-ຂາຍຢູ່ຕາມເສັ້ນທາງເລກທີ 13 ໃຕ້ ຂອບເຂດບ້ານໜອງນົກຂຽນ ເມືອງສອງຄອນ ແຂວງສະຫວັນນະເຂດ ພ້ອມຂອງກາງຢາບ້າ ຈຳນວນ 2.000 ເມັດ ໄປສອບສວນຂະຫຍາຍຜົນ.

ເຈົ້າໜ້າທີ່ ປກສ ແຂວງສະຫວັນນະເຂດ ໃຫ້ຮູ້ວ່າ: ພາຍຫຼັງສືບຮູ້ວ່າ ວັນທີ 22 ມີນາ 2018 ພວກກ່ຽວທັງ 3 ຄົນຈະນັດຊື້-ຂາຍຢາບ້າໃຫ້ກັນຢູ່ເສັ້ນທາງເລກທີ 13 ໃຕ້ບ້ານໜອງນົກຂຽນ; ຈາກນັ້ນ, ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະໄປຕິດຕາມກຸ່ມເປົ້າໝາຍດັ່ງກ່າວ ຮອດເວລາ 13:00 ໂມງ ຂອງວັນດຽວກັນ ໄດ້ເຫັນກຸ່ມເປົ້າໝາຍກໍາລັງແລກປ່ຽນຊື້-ຂາຍຢາເສບຕິດ ຢູ່ຂອບເຂດເສັ້ນທາງບ້ານດັ່ງກ່າວ. ດັ່ງນັ້ນ, ເຈົ້າໜ້າທີ່ຈຶ່ງໄດ້ເຂົ້າຈັບກຸ່ມໄດ້ພວກຖືກຫາທັງ 3 ຄົນ ຄື: ທ້າວ ລຳທອງ ຫຼື ລຳ ອາຍຸ 31 ປີ, ທ້າວ ໂນໄຊ ຍະວົງ ອາຍຸ 26 ປີ ແລະ ທ້າວ ໂບ້ ບົວເງິນ ອາຍຸ 28 ປີ ທັງສາມຄົນຢູ່ບ້ານນາໂມງ ເມືອງໄຊພູທອງ ແຂວງສະຫວັນນະເຂດ ພ້ອມຢາບ້າຈຳນວນ 2.000 ເມັດ, ໂທລະສັບ 5 ໜ່ວຍ ແລະ ລົດຈັກ 2 ຄັນ.

ຜ່ານການສືບສວນ-ສອບສວນຂອງເຈົ້າໜ້າທີ່ໃນເບື້ອງຕົ້ນ ພວກກ່ຽວສາລະພາບວ່າ: ຢາບ້າຈໍານວນດັ່ງກ່າວແມ່ນຂອງພວກກ່ຽວແທ້, ກຳລັງຊື້-ຂາຍໃຫ້ກັນຢູ່ເສັ້ນທາງເລກທີ 13 ໃຕ້ ບ້ານໜອງນົກຂຽນ ຈຶ່ງຖືກເຈົ້າໜ້າທີ່ຕໍາຫຼວດເຈົ້າຈັບຕົວ ພ້ອມຂອງກາງຈໍານວນດັ່ງກ່າວ. ປະຈຸບັນຄະດີດັ່ງກ່າວ ແມ່ນພວມຢູ່ໃນຂັ້ນຕອນການດຳເນີນຄະດີຂອງເຈົ້າໜ້າທີ່ ເພື່ອຮວບຮວມຂໍ້ມູນຫຼັກຖານສົ່ງໄອຍະການສັ່ງຟ້ອງສານຕັດສິນຕາມລະບຽບກົດໝາຍຕໍ່ໄປ.

ພາບ ແລະ ຂ່າວ: ນສພ ຄວາມສະຫງົບ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments