ເມືອງເງິນ ຈັດພິທີສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 57 ປີແລະ ວັນສ້າງຕັ້ງຊາວໜຸ່ມປະຊາຊົນປະຕິວັດລາວຄົບຮອບ 63 ປີ

ຕອນເຊົ້າຂອງວັນທີ 4 ເມສາ 2018ນີ້ ທ່ານ ບຸນມີ ຈັນທີບ ກຳມະການພັກແຂວງ ເລຂາພັກເມືອງ ເຈົ້າເມືອງໆເງິນ ພ້ອມດ້ວຍຄະນະນຳຂອງເມືອງ, ທະຫານ, ຕຳຫຼວດ, ຊາວໜຸ່ມ, ເຍົາວະຊົນ ໄດ້ພ້ອມກັນວາງພວງມາລາຢູ່ອານຸສາວະລີນັກຮົບນິລະນາມ ແລະ ວາງກະຕ່າດອກໄມ້ ຢູ່ທີ່ອານຸສອນສະຖານ ປະທານ ໄກສອນ ພົມວິຫານ, ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 57 ປີ(5 ເມສາ 1961-5 ເມສາ 2018) ແລະ ວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 63 ປີ (14- ເມສາ 1955- 14 ເມສາ 2018)



          ໃນວັນດຽວກັນນີ້ກໍ່ໄດ້ຈັດພິທີປະຖະກາຖາວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 57 ປີ ແລະ ວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 63 ປີ ຢູ່ທີ່ສະໂມສອນ ເມືອງ ເງິນ ແຂວງໄຊຍະບູລີ ເຊິ່ງໃຫ້ກຽດຂຶ້ນເລົ່າຫວນຄືນມູນເຊື້ອໂດຍແມ່ນທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ ທ່ານໄດ້ຍົກໃຫ້ເຫັນມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວຂອງ 2 ວັນປະຫວັດສາດ ພ້ອມນິ້ ທ່ານຍັງຍົກໃຫ້ເຫັນຜົນງານ ການເຄື່ອນໄຫວຂອງ ກຳລັງປ້ອງກັນຄວາມສະຫງົບ ແຂວງໄຊຍະບູລີ ກໍ່ຄື ເມືອງເງິນ  ນີ້ກໍ່ເພື່ອເຮັດໃຫ້ພະນັກງານທະຫານ, ຕໍາຫຼວດ ຮູ້ໄດ້ເຖິງມູນເຊື້ອອັນພິລະອາດຫານ ແລະ ສູ້ຮົບຢ່າງມີໄຊຂອງກຳລັງປ້ອງກັນຄວາມສະຫງົບ ທີ່ຍາດມາໄດ້ ໃນພາລະກິດຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອສືບຕໍ່ເສີມຂະຫຍາຍມູນເຊື້ອດັ່ງກ່າວ ເຂົ້າໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ່ x ຂອງພັກ ໃຫ້ເປັນຂະບວນຟົດຟື້ນ.

          ຕອນທ້າຍຂອງພິທີທ່ານ ສອນສຸກ ພວງແກ້ວ ກໍ່ໃຫ້ກຽດຂຶ້ນມອບໃບຢັ້ງຢືນ 4 ບຸກ ຂອງຊາວໜຸ່ມເມືອງ ແລະ ໃບຍໍຍ້ອງ ຂອງທ່ານ ເຈົ້າເມືອງໃຫ້ກັບຜູ້ທີ່ປະກອບສ່ວນທຶນ ສ້າງຫໍສະໝຸດ ຂອງຫ້ອງການຊາວໜຸ່ມເມືອງອີກດ້ວຍ.

ໂດຍ: ອິນແປງ ແຫວນຄຳ




Post a Comment

0 Comments