ລະນຶກ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 57 ປີ ທີ່ ຜົ້ງສາລີ




ການນຳພັກ-ລັດແຂວງ ແລະ ການນໍາກອງບັນຊາການ ປກສ ແຂວງຜົ້ງສາລີ ໄດ້ພ້ອມກັນວາງພວງມາລາ ແລະ ກະຕ່າດອກໄມ້ເຂົ້າວາງຢູ່ຕໍ່ໜ້າອານຸສາວະລີນັກຮົບນິລະນາມ ແລະ ອານຸສາວະລີປະທານ ໄກສອນ ພົມວິຫານ ຜູ້ນໍາ ທີ່ແສນເຄົາລົບຮັກຂອງປວງຊົນລາວ ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 57 ປີ, ໃນວັນທີ 5 ເມສາ 2018 ນຳພາໂດຍທ່ານ ຄຳເຈນ ວົງໂພສີ ເຈົ້າແຂວງຜົ້ງສາລີ ແລະ ພັອ ຄຳເພັງ ເຈັ່ນຄຳເຫຼັກ ຫົວໜ້າກອງບັນຊາການ ປກສ ແຂວງຜົ້ງສາລີ ພ້ອມດ້ວຍຄະນະນໍາຂອງແຂວງ.

ພັອ ຄຳເພັງ ເຈັ່ນຄຳເຫຼັກ ກ່າວວ່າ: ການເຂົ້າວາງພວງມາລາ ແລະ ກະຕ່າດອກໄມ້ໃນຄັ້ງນີ້ເພື່ອເປັນການຂ່ຳນັບຮັບຕ້ອນວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 57 ປີ ຄື: ວັນທີ 5 ເມສາ 1961-5 ເມສາ 2018 ທີ່ໄດ້ ມາບັນຈົບຄົບຮອບອີກວາລະໜຶ່ງ ແລະ ເປັນການເຄົາລົບຕໍ່ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກ ເຊິ່ງທ່ານເປັນຜູ້ຈົ່ງຮັກພັກດີຕໍ່ພັກ, ຕໍ່ປະເທດຊາດມີຄຸນງາມຄວາມດີອັນລ້ຳເລີດ, ເປັນຜູ້ປະເສີດຂອງປະຊາຊົນລາວບັນດາຜົ່າ, ທ່ານເປັນຜູ້ກໍ່ຕັ້ງພັກປະຊາຊົນປະຕິວັດລາວ ແລະ ມີຄຸນງາມຄວາມດີອັນໃຫຍ່ຫຼວງໃນການອຸທິດຕົນເພື່ອປະເທດຊາດ, ເພື່ອການປະຕິວັດລາວ, ທ່ານເປັນບິດາຂອງຊາດລາວເຮົາ. 

ສະນັ້ນ, ຈົ່ງພ້ອມກັນເສີມຂະຫຍາຍມູນມໍລະດົກອັນລ້ຳຄ່າຂອງທ່ານໄດ້ສ້າງໄວ້ໃຫ້ພວກເຮົາໄດ້ມີຄວາມສົມບຸນພູນສຸກ ແລະ ມີຄວາມສີວິໄລກ້າວໜ້າຂຶ້ນເລື້ອຍໆ.

ສໍາລັບຜົນງານທີ່ພົ້ນເດັ່ນຂອງກໍາລັງປ້ອງກັນຄວາມສະຫງົບ ໃນຕະຫຼອດໄລຍະ 57 ປີຜ່ານມາມີ ຄື: ກໍາລັງປ້ອງກັນຄວາມສະຫງົບ ພ້ອມກັບກອງທັບສາມາດຕີຊະນະຢູ່ໃນທຸກໆສະໜາມຮົບຕ້ານຈັກກະພັດຜູ້ຮຸກຮານ ແລະ ສາມາດປົດປ່ອຍປະເທດຊາດໄດ້ຢ່າງສົມບູນ, ສາມາດປົກປັກຮັກສາປະເທດຊາດ ແລະ ເຂດນໍ້າແດນດິນໄວ້ໄດ້ຢ່າງໝັ້ນຄົງບໍ່ມີເຫດການບໍ່ດີດ້ານການເມືອງໃດໆເກີດຂຶ້ນ ຢ່າງຮ້າຍແຮງ; ກໍາລັງປ້ອງກັນຄວາມສະຫງົບ ສາມາດປ້ອງກັນຜູ້ນໍາພັກ-ລັດ, ສໍານັກງານອົງການໃຫ້ມີຄວາມປອດໄພ 100%; ກໍາລັງປ້ອງກັນຄວາມສະຫງົບ ເປັນເຈົ້າການປ້ອງກັນກອງປະຊຸມໃຫຍ່, ວັນບຸນສໍາຄັນລະດັບຊາດ ແລະ ສາກົນ, ປ້ອງກັນແຂກຕ່າງປະເທດ ໃຫ້ມີຄວາມປອດໄພ 100%.

Post a Comment

0 Comments