ລັດວິສາຫະກິດນໍ້າປະປານະຄອນຫລວງວຽງຈັນ ຮຽກຮ້ອງສັງຄົມຊ່ວຍປະຢັດນໍ້າປະປາ ໃນໂອກາດສະເຫລີມສະຫລອງປີໃໝ່ລາວ ພ.ສ 2561




ລັດວິສາຫະກິດນໍ້າປະປານະຄອນຫລວງວຽງຈັນ ກຽມພ້ອມສະໜອງນໍ້າຮັບໃຊ້ສັງຄົມ ກໍຄື ຊາວນະຄອນ ຫລວງວຽງຈັນ ໃນໄລຍະສະເຫລີມສະຫລອງປີໃໝ່ລາວ ພຸດທະສັກກະລາດ 2561 ທີ່ຈະມາເຖີງນີ້ ເພື່ອຮັບປະກັນໃຫ້ມີນ້ຳປະປາຮັບໃຊ້ພຽງພໍກັບຄວາມຕ້ອງການ.



ທ່ານ ຄຳເຜີຍ ວົງສາຄຳຜຸຍ ຜູ້ອຳນວຍການໃຫຍ່ລັດວິສາຫະກິດນໍ້າປະປານະຄອນຫລວງວຽງຈັນ ໃຫ້ສຳພາດວ່າ: ໄດ້ກະກຽມເຮືອແພສຳຮອງໄວ້ແລ້ວເພື່ອໄວ້ໃຊ້ໃນກໍລະນີແຫລ່ງນ້ຳທີ່ນຳມາຜະລິດນໍ້າປະປາບໍ່ພຽງພໍ, ພ້ອມທັງໄດ້ກະກຽມພະນັກງານວິຊາການປະຈຳການຢູ່ຫ້ອງການ ແລະ ແຕ່ລະໂຮງງານຜະລິດນ້ຳປະປາ ຕະຫລອດ 24 ຊົ່ວໂມງ ເພື່ອກຽມຮັບມືໃນກໍລະນີເກີດທໍ່ສົ່ງນ້ຳປະປາແຕກ ແລະ ອື່ນຯ. ແນວໃດກໍຕາມ ເພື່ອຮັບປະກັນໃຫ້ມີນໍ້າປະປາຊົມໃຊ້ພຽງພໍໃນໄລຍະສະເຫລີມສະຫລອງປີໃໝ່ລາວປີນີ້ ແຕ່ລະຄົວເຮືອນຄວນມີຖັງເກັບນ້ຳໄວ້ ເພາະຖ້າຫາກເກີດກໍລະນີສຸກເສີນຂຶ້ນ ເປັນຕົ້ນ: ມີພະຍຸພັດເຂົ້າເຮັດໃຫ້ເສົາໄຟຟ້າລົ້ມຈະບໍ່ສາມາດຜະລິດນ້ຳປະປາໄດ້, ທໍ່່ນ້ຳປະປາແຕກ ເຮັດໃຫ້ຕ້ອງຢຸດສົ່ງນ້ຳປະປາຊົ່ວຄາວເພື່ອສ້ອມແປງ ແລະ ອື່ນຯ. 


ຜູ້ອຳນວຍການໃຫຍ່ລັດວິສາຫະກິດນໍ້າປະປານະຄອນຫລວງວຽງຈັນ ໃຫ້ຮູ້ຕື່ມວ່າ: ໂອກາດສະເຫລີມສະ ຫລອງປີໃໝ່ລາວແຕ່ລະປີ ການຊົມໃຊ້ນ້ຳປະປາຢູ່ນະຄອນຫລວງວຽງຈັນເພີ່ມຂຶ້ນກ່ວາໄລຍະປົກກະຕິປະມານ 50 ສ່ວນຮ້ອຍ. ດັ່ງນັ້ນ ຈິ່ງຮຽກຮ້ອງໃຫ້ທຸກຄົນຈົ່ງຊ່ວຍກັນປະຢັດນ້ຳປະປາຮ່ວມກັນ, ການຫົດນໍ້າໃນໂອກາດປີໃໝ່ລາວຄວນມີຂອບເຂດຈຳກັດ ເພາະການໃຊ້ນ້ຳປະປາຢ່າງຈຳກັດ ເພາະນອກຈາກເປັນການປະຢັດນ້ຳຊ່ວຍສັງຄົມຍັງເປັນການປະຢັດຄ່າໃຊ້ຈ່າຍໃນຄົວເຮືອນດ້ວຍ. ຖ້າຫາກພົບເຫັນທໍ່ນ້ຳປະປາແຕກ ຫລື ອື່ນຯ ທີ່ກ່ຽວກັບນໍ້າປະປາແມ່ນສາມາດໂທມາແຈ້ງໄດ້ທີ່ໝາຍເລກ 1169 ໂດຍບໍ່ເສຍຄ່າຕະຫລອດ 24 ຊົ່ວໂມງ.



ປັດຈຸບັນ ລັດວິສາຫະກິດນໍ້າປະປານະຄອນຫລວງວຽງຈັນ ມີໂຮງງານຜະລິດນ້ຳປະປາ 5 ແຫ່ງທີ່ນໍາໃຊ້ນໍ້າຂອງ ແລະ ນໍ້າງື່ມເຂົ້າໃນການຜະລິດ ຄື: ນໍາໃຊ້ນໍ້າຂອງເຂົ້າໃນການຜະລິດມີ ໂຮງງານຜະລິດນໍ້າປະປາຈີນາຍໂມ້, ເກົ້າລ້ຽວ ແລະ ໂຮງງານຜະລິດນ້ຳປະປາທ່າເດື່ອ ແລະ ນໍາໃຊ້ນ້ຳງື່ມເຂົ້າໃນການຜະລິດມີ ໂຮງງານຜະລິດນໍ້າປະປາດົງໝາຍຄາຍ 1, 2 ແລະ ໂຮງງານຜະລິດນໍ້າປະປາດົງບັງ. ທັງ 5 ແຫ່ງສາມາດຜະລິດນ້ຳປະປາໄດ້ຫລາຍກ່ວາ 280.000 ແມັດກ້ອນຕໍ່ວັນ. ປັດຈຸບັນ ມີປະຊາຊົນປະມານ 85 ສ່ວນຮ້ອຍຂອງຈຳນວນປະຊາຊົນທີ່ມີຄວາມພ້ອມ ຫລື ເງື່ອນໄຂໄດ້ຮັບການບໍລິການໄດ້ຊົມໃຊ້ນ້ຳປະປາແລ້ວ ແລະ ຄາດວ່າຈະເພີ່ມຂຶ້ນເປັນບໍ່ຫລຸດ 90 ສ່ວນຮ້ອຍໃນປີ 2020.

ໂດຍ: ບຸນຕຽງ ຈັນທະວົງ (ວລສ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments