ເມືອງເງິນ ຈັດຕັ້ງຄະນະກຳມະການກວດກາສະເພາະກິດ ເພື່ອຕ້ານແລະ ສະກັດກັ້ນປະກົດການຫຍໍ້ທໍ້ໃນການສອບເສັງ.

ວັນທີ່ 18 ພຶດສະພາ 2018 ນີ້ ຢູ່ທີ່ຫ້ອງການສຶກສາທິການ ແລະ ກິລາ ເມືອງເງິນ ແຂວງໄຊຍະບູລີ ໄດ້ເປີດກອງປະຊຸມຜ່ານຂໍ້ຕົກລົງແຕ່ງຕັ້ງຄະນະກຳມະການກວດກາສະເພາະກິດ ເພື່ອຕ້ານແລະ ສະກັດກັ້ນປະກົດການຫຍໍ້ທໍ້ໃນການສອບເສັງເລື່ອນຂັ້ນ-ຈົບຊັ້ນ ສາຍສາມັນສຶກສາ ປະຈຳສົກຮຽນ 2017-2018. ພາຍໃຕ້ການເປັນປະທານ ຂອງທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າໆເມືອງເງິນ, ມີຫົວໜ້າຫ້ອງການ, ກົມກອງ, ອຳນວຍການໂຮງຮຽນປະຖົມ-ມັດທະຍົມ, ຕາງໜ້າສູນບໍລິການລາວໂທລະຄົມ, ສະຕາຄົມ ປະຈຳເມືອງເງິນ ແລະ ພະນັກງານວິຊາການຫ້ອງການສຶກສາທິການ ແລະ ກິລາເຂົ້າຮ່ວມ.

ທ່ານ ສີສະຫວັດ ພົມມະເສນ ຮັກສາການຫົວໜ້າຫ້ອງການສຶກສາທິການ ແລະ ກິລາ ກໍ່ໄດ້ຜ່ານຂໍ້ຕົກລົງຂອງທ່ານ ເຈົ້າເມືອງ ສະບັບເລກທີ່ 187/ຈມ ມງ ວ່າດ້ວຍການແຕ່ງຕັ້ງຄະນະກຳມະການກວດກາສະເພາະກິດ ເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ໃນການສອບເສັງເລື່ອນຂັ້ນ-ຈົບຊັ້ນສາຍສາມັນສຶກສາ ທົ່ວເມືອງເງິນ ປະຈຳສົກຮຽນ 2017-2018. ແລະ ຜ່ານຄໍາສັ່ງແນະນໍາຂອງຫົວໜ້າຫ້ອງການສຶກສາທິການ ແລະ ກິລາ ສະບັບເລກທີ 509/ສກມ ມງ ວ່າດ້ວຍສິດ - ໜ້າທີ ແລະ ຂັ້ນຕອນການເຮັດວຽກຂອງປະທານ-ຮອງປະທານ, ເລຂານຸການ ສູນສອບເສັງຈົບຊັ້ນປະຖົມສຶກສາຂັ້ນ ປ5 ສົກ 2017-2018.

ຈາກນັ້ນຜູ້ເຂົ້າຮ່ວມກອງປະຊຸມຍັງໄດ້ປະກອບຄຳຄິດເຫັນເພື່ອຊອກເຫັນຈຸດດີ,ຂໍ້ຄົງຄ້າງ ແລະ ພ້ອມກັນສຸ່ມໃສ່ແກ້ໄຂ, ເພື່ອເຮັດໃຫ້ການສອບເສັງເລື່ອນຂັ້ນ-ຈົບຊັ້ນສາຍສາມັນສຶກສາ ທົ່ວເມືອງເງິນ ປະຈຳສົກຮຽນ 2017-2018 ນີ້ ມີບັນຍາກາດຟົດຟື້ນ, ຮັບປະກັນບໍ່ໃຫ້ມີ ປະກົດການຫຍໍ້ທໍ້ເກີດຂື້ນຢ່າງເດັດຂາດ.

ໂດຍ: ອິນແປງ ແຫວນຄຳ



Post a Comment

0 Comments