ສະມາຊິກສະພາປະຊາຊົນແຂວງໄຊຍະບູລີ ລົງເຄື່ອນໄຫວຊຸກຍູ້ວຽກງານສະພາແຫ່ງຊາດ ແລະ ສະພາປະຊາຊົນແຂວງ ຢູ່ເມືອງເງິນ


ວັນທີ 16 ພຶດສະພາ 2018 ຜ່ານມານີ້ ສະພາປະຊາຊົນແຂວງໄຊຍະບູລີ ຊື່ງນໍາໂດຍ ທ່ານ ນາງ ອິດມະນີ ຈັນທະຄູນ  ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ່ 7  ທັງເປັນຮອງປະທານສະພາປະຊາຊົນແຂວງ; ພ້ອມດ້ວຍ ຄະນະກໍາມະການ ຂອງສະພາປະຊາຊົນແຂວງໄຊຍະບູລີ ໄດ້ລົງຕິດຕາມກວດກາ, ຊຸກຍູ້ການຈັດຕັ້ງປະຕິບັດມະຕິກອງປະຊຸມສະໄໝສາມັນ ເທື່ອທີ 2, 3 ແລະ 4 ຂອງສະພາປະຊາຊົນແຂວງໄຊຍະບູລີ ຊຸດທີ I  ຢູ່ເມືອງເງິນ ໂດຍໄດ້ຮັບກຽດເຂົ້າຮ່ວມຂອງ ທ່ານ ບຸນສົດ ອິນທະປັນຍາ ຮອງເລຂາພັກເມືອງ, ຮອງເຈົ້າເມືອງເງິນ, ມີບັນດາທ່ານຄະນະປະຈໍາພັກເມືອງ, ກໍາມະການພັກເມືອງ; ຫົວໜ້າ, ຮອງຫົວໜ້າຫ້ອງການ-ອົງການ; ກົມກອງ, ພະນັກງານຫຼັກແຫຼ່ງ ເລຂາໜ່ວຍພັກນາຍບ້ານ ແລະ ນັກທຸລະກິດຜູ້ປະກອບການພາຍໃນເມືອງເຂົ້າຮ່ວມ.

          ການລົງເຄື່ອນໄຫວຄັ້ງນີ້, ຄະນະສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ໄດ້ຮັບຟັງການລາຍງານ ກ່ຽວກັບສະພາບການຈັດຕັ້ງປະຕິບັດບັນດາມະຕິກອງປະຊຸມສະໄໝສາມັນ ເທື່ຶອທີ 2, 3,4 ຂອງສະພາປະຊາຊົນແຂວງ ໃນໄລຍະຜ່ານມາໂດຍສັງເຂບຈາກ ທ່ານ ບຸນສົດ ອິນທະປັນຍາ ຮອງເລຂາພັກເມືອງ, ຮອງເຈົ້າເມືອງເງິນ ພ້ອມກັນນັ້ນຍັງໄດ້ຮັບຟັງການຊີ້ແຈງຂອງຂະແໜງການທີ່ກ່ຽວຂ້ອງຕາມການເຈາະຈີ້ມຂອງບັນດາຄະນະກໍາມະການ ເປັນຕົ້ນແມ່ນ: ການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ; 13 ຄາດໝາຍສູ້ຊົນຂອງຂົງເຂດສຶກສາທິການ ແລະ ກິລາ; 10 ຄາດໝາຍສູ້ຊົນຂອງຂົງເຂດສາທາລະນະສຸກ; ສະພາບການແກ້ໄຂປະກົດການຫຍໍ້ທໍ້ໃນສັງຄົມ; ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ແລະ ການຄຸ້ມຄອງການນໍາເຂົ້າສານເຄມີ ມາຮັບໃຊ້ເຂົ້າໃນການຜະລິດກະສິກໍາ ໃຫ້ຖືກຕ້ອງຕາມລະບຽບການ.

ໂອກາດດັ່ງກ່າວ ທ່ານ  ນາງ ອິດມະນີ ຈັນທະຄູນ  ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ່ 7  ທັງເປັນຮອງປະທານສະພາປະຊາຊົນແຂວງ ໄດ້ມີຄໍາເຫັນຊີ້ນໍາ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ອົງການປົກຄອງເມືອງຍາດມາໄດ້ໃລຍະຜ່ານມາ, ຄຽງຄູ່ກັນນັ້ນກໍ່ຕ້ອງສືບຕໍ່ສຶກສາອົບຮົມການເມືອງ-ແນວຄິດໃຫ້ແກ່ຖັນແຖວພະນັກງານ; ເອົາໃຈໃສ່ສືບຕໍ່ຈັດຕັ້ງປະຕິບັດບັນດາຄາດໝາຍສູ້ຊົນໃຫ້ບັນລຸ; ເອົາໃຈໃສ່ໃນການປະຕິບັດລະບຽບກົດໝາຍຂອງລັດໃຫ້ເຂັ້ມງວດ; ສືບຕໍ່ເອົາໃຈໃສ່ສະກັດກັ້ນ ແລະ ຕ້ານທຸກປະກົດການຫຍໍ້ທໍ້ໃນສັງຄົມໃຫ້ຫຼຸດນ້ອຍຖອຍລົງ ແລະ ຮຽກຮ້ອງໃຫ້ອົງການປົກຄອງເມືອງ ຈົ່ງສືບຕໍ່ເອົາໃຈໃສ່ຕິດຕາມກວດກາ, ຊຸກຍູ້ການຈັດຕັ້ງປະຕິບັດໂຄງການລົງທຶນຂອງລັດໃຫ້ເຂັ້ມງວດ.

          ໃນວັນດຽວກັນຄະນະທິມງານຍັງໄດ້ລົງຕິດຕາມກວດກາ ການກໍ່ສ້າງພື້ນຖານໂຄງລ່າງຂອງເມືອງ ເປັນຕົ້ນແມ່ນ ໂຄງການກໍ່ສ້າງເສັ້ນທາງປາກແບງ ຫາ ບ້ານຫ້ວຍເງີຍ; ຕິດຕາມກວດກາການກໍ່ສ້າງໂຮງໝໍຫຼັງໃໝ່ ແລະ ອ່າງເກັບນ້ຳຫ້ວຍເພຍງາມ.

ໂດຍ:ສຸລິຍາ ແສງເດືອນ

         



Post a Comment

0 Comments