ເມືອງນໍ້າບາກ ສະເຫຼີມສະຫຼອງປີທ່ອງທ່ຽວລາວ ແລະ ຈັດງານແຂ່ງຂັນຊ່ວງເຮືອປະຈຳປີ 2018

ຫຼວງພະບາງ: ວັນທີ່ 25 ສີງຫານີ້ ເມືອງນໍ້າບາກດີນແດນເຂົ້າຂາວ, ຊາວເມືອງດຸໝັ່ນ, ໝາກກ້ຽງຫວານ, ວິລະກຳບັ້ນຮົບນໍ້າບາກທີ່ລືຊື່ ໄດ້ຈັດງານສະເຫຼີມສະຫຼອງປີທ່ອງທ່ຽວລາວ 2018 ຂື້ນທີ່ສະໂມສອນໃຫຍ່ຂອງເມືອງ ໂດຍມີ ທ່ານ ວົງສະຫວັນ ເທບພະຈັນ ຮອງເຈົ້າແຂວງ ພ້ອມດ້ວຍການນຳຂອງແຂວງ, ເມືອງອ້ອມຂ້າງ ຕະຫຼອດຮອດແຂກ ຮັບເຊີນ ແລະມວນຊົນເຂົ້າຮ່ວມ.



ພິທີເລີ້ມຕົ້ນຈາກຂະບວນແຫ່ທີ່ສະແດງເຖີງວິຖີການດຳລົງຊີວິດ ຂອງປະຊາຊົນບັນດາເຜົ່າພາຍໃນເມືອງນໍ້າບາກ, ພ້ອມທັງຮັບຊົມການສະແດງສິລະປະວັນນະຄະດີ ທີ່ເປັນເອກະລັກຂອງບັນດາເຜົ່າ. ຈາກນັ້ນ ທ່ານ ສົມພອນ ສີອຸດົມພັນ ເຈົ້າເມືອງນໍ້າບາກ ໄດ້ຂື້ນມີຄຳເຫັນຕໍ່ງານ ທ່ານກ່າວວ່າ: ເມືອງນໍ້າບາກ ຫ່າງຈາກເທດສະບານຂອງແຂວງຫຼວງພະບາງປະມານ 120 ກິໂລແມັດ ປະກອບມີ 83 ບ້ານ, 12.484 ຄອບຄົວ, ພົນລະເມືອງ 69.894 ຄົນ, ຍີງ 34.680 ຄົນ, ປະຊາຊົນ 79,27% ຖືເອົາການປູກຟັງ-ລ້ຽງສັດເປັນອາຊີບຕົ້ນຕໍ, ຮອງລົງມາແມ່ນການບໍລິການ, ຄ້າຂາຍ ແລະພະນັກງານ.



ໃນມະຕິກອງປະຊຸມໃຫຍ່ ຄັ້ງທີ່ VIII ໄດ້ກຳນົດເອົາການອານຸລັກ ແລະເສີມຂະຫຍາຍວັດທະນະທຳອັນດີງາມຂອງບັນດາເຜົ່າ, ປຸກລະດົມ ແລະອຳນວຍຄວາມສະດວກ ໃຫ້ນັກລົງທືນທັງພາຍໃນ ແລະຕ່າງປະເທດ ເຂົ້າມາພັດທະນາແຫຼ່ງທ່ອງທ່ຽວ, ເຮືອນພັກ, ຮ້ານອາຫານໃຫ້ໄດ້ມາດຕະຖານ ເພື່ອຮອງຮັບນັກທ່ອງທ່ຽວທີ່ເຂົ້າມາທ່ອງທ່ຽວ ແລະບໍລິການເປັນທາງຜ່ານໄປສູ່ບັນດາແຂວງພາກເໜືອ. ເພື່ອເປັນການເສີມຂະຫຍາຍນະໂຍບາຍການເປີດປີທ່ອງທ່ຽວລາວ 2018 ຂອງລັດຖະບານແຫ່ງ ສປປ ລາວ ອົງການປົກຄອງເມືອງ ໄດ້ຈັດໃຫ້ມີການສະເຫຼີມສະຫຼອງຫຼາຍກິດຈະກຳ ໃນການສະເຫຼີມສະຫຼອງ ເປັນຕົ້ນເທດສະການບຸນປີໃໝ່ລາວ ຕິດພັນກັບບຸນບັ້ງໄຟຂອງເຜົ່າລື້, ງານບຸນຊ່ວງເຮືອເດືອນ 9 ເພັງ, ການທ່ອງທ່ຽວຊົມວິຖີຊີວິດ ດັ້ງເດີມຕິດພັນກັບກາຕໍ່ຫູກທໍໄໝ ແລະຍ້ອມສີທຳມະຊາດ, ງານເທດສະການໝາກກ້ຽງຫວານ, ງານບຸນປົດປີຂອງເຜົ່າກື່ມມຸ, ງານບຸນກີນຈຽງຂອງເຜົ່າມົ້ງ ແລະຈັດງານສະເຫຼີມສະຫຼອງປີທ່ອງທ່ຽວລາວ 2018.



ໃນພິທີ ທ່ານ ວົງສະຫວັນ ເທບພະຈັນ ໄດ້ໃຫ້ກຽດລັ່ນຄ້ອງ 9 ບາດເພື່ອເປັນການສີລິມຸງຄຸນແກ່ການສະເຫຼີມສະຫຼອງ. ພ້ອມນີ້ ຜູ້ເຂົ້າຮ່ວມໄດ້ໄປທ່ຽວຊົມບ້ານຫັດຖະກຳເຜົ່າລື້ບ້ານນາຍາງເໜືອ ແລະນາຍາງໃຕ້ ຕື່ມອີກ. ສຳລັບວັນທີ່ 26 ສີງຫານີ້ ເລີ້ມແຕ່ຕອນເຊົ້າ ໄດ້ຈັດໃຫ້ມີການໃສ່ບາດ ແລະປະກອບພິທີທາງສາສະໜາ ຕາມວັດວາອາຣາມແຫ່ງຕ່າງໆ ແລະໂລະລາດແບບມວນຊົນ ໂດຍມີປະຊາຊົນບັນດາເຜົ່າ ໄດ້ນຳເອົາສີຄ້າກະສິກຳ, ຫັດຖະກຳມາວາງຂາຍ ຕາມເສັ້ນທາງໃຈກາງເມືອງ,



ຈາກນັ້ນ ໄດ້ຈັດການແຂ່ງຂັນຊ່ວງເຮືອປະຈຳປີ ສຳລັບປີນີ້ ມີເຮືອຊ່ວງເຂົ້າຮ່ວມແຂ່ງຂັນທັງໝົດ 16 ລຳ ມາຈາກບັນດາບ້ານ, ຫົວໜ່ວຍທຸລະກິດພາຍໃນເມືອງ ແລະເມືອງອ້ອມຂ້າງ, ເພີ້ມຈາກປີຜ່ານມາ 3 ລຳ. ໃນນັ້ນ ໄດ້ແບ່ງເປັນ 2 ປະເພດປະເພດຄື: ປະເພດເຮືອປະເພນີ ແລະເຄີ່ງປະເພນີ ມີ 7 ລໍາ ແບ່ງອອກເປັນ 2 ສາຍ ແລະປະເພດເຮືອກິລາ ຫຼື ເຮືອສູດ ມີ 9 ລໍາ ແບ່ງອອກເປັນ 2 ສາຍ. ຜ່ານການຈົກສະຫຼາກ ປະເພດເຮືອປະເພນີ ແລະເຄີ່ງປະເພນີ ສາຍ ກໍ ປະກອບມີ: ບ້ານໂພນໄຊ, ບ້ານໂຄ້ງ, ບ້ານນ້ຳລາ, ບ້ານໂພນສະອາດ; ສາຍ ຂໍ ມີ ບ້ານຟ້າ, ບ້ານນະຄອນ, ບ້ານລີ່; ສຳລັບປະເພດເຮືອກິລາ ຫຼື ເຮືອສູດ ສາຍ ກໍ ປະກອບມີ: ບ້ານໂພນສະອາດ, ບ້ານທ່າລີໃຕ້, ບ້ານລີ່, ບ້ານປາກມອງ; ສາຍ ຂໍ ປະກອບມີ: ບໍລິສັດສິນໄຊ ຫຼວງພະບາງ, ບ້ານບົມ, ນັກທຸລະກິດບ້ານຊາງ ກຸ່ມນ້ຳຖ້ວມ, ເມືອງຊຽງເງີນ ແລະນະຄອນ-ຫຼວງພະບາງ. ການແຂ່ງຂັນແມ່ນດຳເນີນແບບເສຍ 2 ເທື່ອ ແລ້ວຂັດອອກຊີງອັນດັບທີ່, ສ່ວນເຮືອທີ່ເສຍ 1 ຄັ້ງມີສິດຊີງຂື້ນໄປເຖີງຮອບຊີງຊະນະເລີດ,



ໃນນັ້ນ ຈະມີການແຂ່ງຂັນກັນທັງໝົດຕ່ຳສຸດ 31 ລ່ອງ ແລະສູງສຸດ 36 ລ່ອງ. ສ່ວນຜົນການແຂ່ງຂັນຈະລາຍງານໃຫ້ຮູ້ໃນໂອກາດຕໍ່ໄປ.

ໂດຍ: ອາພຸດເດດ ບຸບຜາ

Post a Comment

0 Comments