ອຸດົມໄຊຈັດງານຊ່ວງເຮືອສະຫລອງບຸນອອກພັນສາປີນີ້ຢ່າງຟົດຟື້ນ

ໃນຕອນເຊົ້າວັນທີ 27 ຕຸລາ 2018, ງານສະເຫລີມສະຫລອງປີທ່ອງທ່ຽວລາວ 2018 ໂດຍຕິດພັນກັບບຸນອອກພັນສາປະວໍລະນາ ແລະ ງານຊ່ວງເຮືອປະຈຳປີຂອງເມືອງຮຸນ, ແຂວງອຸດົມໄຊ ໄດ້ຖືກຈັດຂື້ນຢ່າງເປັນທາງການ, ຢູ່ທ່າເຮືອບ້ານນາຝາງ ໂດຍການເຂົ້າຮ່ວມຂອງທ່ານ ຄຳພຽງ ຢາຈົງວາ, ຮອງເຈົ້າແຂວງອຸດົມໄຊ , ທ່ານ ບຸນຄົງ ຫລ້າຈຽມພອນ, ເຈົ້າເມືອງໆຮຸນ ແລະ ການນຳເມືອງຕະຫລອດຮອດມວນຊົນຊາວເມືອງຮຸນຈຳນວນຫລາຍ.



ການຈັດງານດັ່ງກ່າວໃນຄັ້ງນີ້ ແມ່ນເພື່ອຊຸກຍູ້ສົ່ງເສີມວຽກງານການທ່ອງທ່ຽວພາຍໃນເມືອງໃຫ້ເຕີບໃຫ່ຍຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ, ທັງເພື່ອເປັນການປູກຈິດສຳນຶກໃຫ້ປະຊາຊົນບັນດາເຜົ່າ ໃຫ້ຮູ້ຈັກຮັກສາ, ສົ່ງເສີມ ແລະ ຄຸ້ມຄອງມໍລະດົກທາງດ້ານທຳມະຊາດ, ວັດທະນະທຳ ແລະ ປະຫວັດສາດທີ່ເປັນທ່າແຮງສຳຄັນຂອງເມືອງຮຸນ, ທັງເປັນການແລກປ່ຽນທາງດ້ານສິລະປະການສະແດງ, ວັດທະນາທຳ ແລະ ຮີດຄອງປະເພນີຂອງບັນດາເຜົ່າພາຍໃນທ້ອງຖີ່ນ ໃຫ້ກາຍເປັນເຫດການຫນຶ່ງທີ່ສຳຄັນປະຈຳປີຂອງເມືອງຮຸນ.





ທ່ານ ບຸນຄົງ ຫລ້າຈຽມພອນ, ເຈົ້າເມືອງໆຮຸນແຂວງອຸດົມໄຊ ໄດ້ຕີລາຄາສູງຕໍ່ການຈັດງານໃນຄັ້ງນີ້ ຊື່ງສະແດງໃຫ້ເຫັນເຖິງຄວາມອຸດົມຮັ່ງມີທາງດ້ານທຳມະຊາດ, ວັດທະນະທຳ, ແລະ ຮີດຄອງປະເພນີທີ່ບັນພະບູຫລຸດເຄີຍປະຕິບັດສືບທອດກັນມາແຕ່ບູຮານນະການ. ການທ່ອງທ່ຽວຖືເປັນຂະແໜງເສດຖະກິດໜື່ງທີ່ມີການຂະຫຍາຍຕົວໄວ ແລະກ້ວາງຂວາງໃນຊຸມປີຜ່ານມາ ໂດຍສະເພາະ ປີ 2017 ແມ່ນມີນັກທ່ອງທ່ຽວທັງພາຍໃນ ແລະ ຕ່າງປະເທດ ເດີນທາງໄປທ່ຽວເມືອງຮຸນ ຫລາຍກວ່າ 21.300 ຄົນ, ໃນນີ້ ມີນັກທ່ອງທ່ຽວຕ່າງປະເທດຫລາຍກວ່າ 7.600 ກວ່າເທື່ອຄົນ, ເຊິ່ງສາມາດສ້າງລາຍຮັບໃຫ້ຜູ້ປະກອບບໍລິການພາຍໃນ ໄດ້ຫລາຍກວ່າ 1.125.000 ໂດລາສະຫະລັດ ຫລື ປະມານ 9 ຕື້ກີບ.



ໃນໂອກາດສະເຫລີມສະຫລອງປີທ່ອງທ່ຽວລາວ 2018 ໂດຍຕິດພັນກັບບຸນອອກພັນສາປະວໍລະນາ ແລະ ງານຊ່ວງເຮືອປະຈຳປີໃນຄັ້ງນີ້, ຫລາກຫລາຍກິດຈະກຳສຳຄັນ ໄດ້ຖືກຈັດຂຶ້ນ, ເປັນຕົ້ນ ແມ່ນການແຂ່ງຂັນເຮືອງາມ, ການແຂ່ງຂັນຊ່ວງເຮືອ 25 ສີພາຍຍິງ-ຊາຍ, ການປະກວດນາງສາວງາມເມືອງຮຸນ, ຊົມການສະແດງສິລະປະ-ວັນນະຄະດີເຊັ່ນ: ການຕ່ອຍເກີງ, ຮ້ອງເພງ, ຂັບລຳທ້ອງຖິ່ນ ແລະ ບົດຟ້ອນຕ່າງໆ, ການຊິມອາຫານຂອງທ້ອງຖີ່ນ ແລະ ການວາງສະແດງ-ຈຳຫນ່າຍຜະລິດຕະພັນດ້ານກະສິກຳ, ຫັດຖະກຳ, ການທ່ອງທ່ຽວ ແລະ ຂະແຫນງອື່ນໆ ພາຍໃນເມືອງຕື່ມອີກ

ຂ່າວ;ພາບ: ຈັນທະສອນ ສີຫານາດ





Post a Comment

0 Comments