ຮ່ວມສູດມົນສົ່ງທ້າຍປີເກົ່າຕ້ອນຮັບປີໃໝ່ ປີ ພ.ສ. 2561-2562 (2018-2019) ພາຍໃນກົມມະລຽນ ແລະ ເດີ່ນພຣະທາດຫຼວງ

ຂໍເຊີນຊວນ ມວນສັດທາສາທຸຊົນທັງຫຼາຍ ຮ່ວມສູດມົນສົ່ງທ້າຍປີເກົ່າຕ້ອນຮັບປີໃໝ່ ປີ ພ.ສ. 2561-2562 (2018-2019) ພາຍໃນກົມມະລຽນ ແລະ ເດີ່ນພຣະທາດຫຼວງທັງໝົດ ໃນຄຳ່ຄືນຂອງ ວັນທີ 31 ທັນວາ 2018

ນັບຖອຍຫຼັງອີກພຽງບໍ່ທໍ່ໃດມື້ ກໍຈະເຂົ້າສູ່ສັກກະຣາດໃໝ່ ໃນເທດສະການປີໃໝ່ນີ້ ຖ້າໃຜຍັງບໍ່ຮູ້ວ່າ ຢາກຈະເຮັດສິ່ງດີໆ ຫຍັງແດ່ ໃຫ້ແກ່ຊີວິດຂອງຕົນ ແລະ ຄອບຄົວ ທຸຣະກິດການງານ ການໄປສູດມົນສົ່ງທ້າຍປີເກົ່າ ຕ້ອນຮັບປີໃໝ່ ຖືເປັນຫົນທາງເລືອກໜຶ່ງ ແລະເປັນທາງເລືອກທີ່ນັບວ່າດີສຸດ ເພາະການສູດມົນນັ້ນ ຈະມີອານິສົງຫຼາຍຢ່າງ ເຊັ່ນ ເວລາເຮົາສູດ ເຮັດໃຫ້ເຮົາມີຈິດໃຈຈົດຈໍ່ ຕາເບິ່ງ ປາກອ່ານ ຫູຟັງໃນບົດສູດມົນ ຈຶ່ງເຮັດໃຫ້ເກີດສະມາທິ ຈິດເປັນສະມາທິຕັ້ງໝັ້ນ ຈະກໍ່ໃຫ້ເກີດເຊິ່ງປັນຍາ ປັນຍາກໍຈະນຳພາຊີວິດ ໃຫ້ໄປໃນທາງທີ່ຖືກຕ້ອງດີງາມ ໃນທາງແງ່ຂອງວິທະຍາສາດ ເວລາທີ່ເປ່ງສຽງສູດມົນ ສຽງເຊິ່ງເປັນ ສັມມາວາຈາ (ເວົ້າວາຈາທີ່ຖືກຕ້ອງ) ແລະ ເປັນກຸສົນນີ້ ຈະເຮັດໃຫ້ນຳ້ໃນໂຕຮຽງໂມເລກູນ ເປັນນຳ້ທີ່ມີຢາດໃສ ຈະເຮັດໃຫ້ຜິວພັນໃສ ໃຈກໍຈະສະຫວ່າງ ເອີ້ນວ່າ ຜິວພັນຜຸດຜ່ອງ ເພາະເປັນຄວາມງາມທີ່ອອກມາຈາກໃຈ ຍິ່ງຖ້າຫາກວ່າມີຄວາມເຂົ້າໃຈໃນບົດສູດນັ້ນໆ ດ້ວຍແລ້ວ ກໍຍິ່ງເປັນການສ້າງປັນຍາໃຫ້ແກ່ບຸກຄົນຜູ້ສູດດ້ວຍ.

ໃນຊ້ວງເວລາດີໆ ຄື ຊ້ວງເວລາຂອງສັກກະຣາດໃໝ່ ດັ່ງນັ້ນ ການສູດມົນສົ່ງທ້າຍປີເກົ່າ ຕ້ອນຮັບປີໃໝ່ ຫຼື ທີ່ເອີ້ນວ່າ ສູດມົນຂ້າມປີ ຈຶ່ງຖືໄດ້ວ່າເປັນສິຣິມຸງຄຸນ ຕໍ່ການເລີ່ມສັກກະຣາດໃໝ່ ແລະຖືວ່າເປັນມຸງຄຸນໄປຕະຫຼອດທັງປີອີກດ້ວຍ ການສູດມົນສົ່ງທ້າຍປີເກົ່າ ຕ້ອນຮັບປີໃໝ່ ຖືວ່າເປັນພິທີກັມ ເປັນກິດຈະກັມອັນດີງາມ ແລະເປັນສິ່ງທີ່ຄວນປູກຝັງໃຫ້ກັບລູກຫຼານ ໃຫ້ປະພຶດປະຕິບັດຢ່າງສະເໝີ ເພາະການສູດມົນຈະເຮັດໃຫ້ຈະເຣີນສະຕິ ເຮັດໃຫ້ຈິດໃຈເປັນສະມາທິ ຈິດໃຈສະຫງົບເປັນສຸກ ດ້ວຍເຫດນີ້ເອງ ການສູດມົນສົ່ງທ້າຍປີເກົ່າ ຕ້ອນຮັບປີໃໝ່ ຈຶ່ງເປັນອີກໜຶ່ງກິດຈະກັມທີ່ໜ້າສົນໃຈ ແລະ ຄວນທີ່ສຸດທີ່ຈະໃຫ້ຄວາມສຳຄັນ ໃນວັນຂຶ້ນປີໃໝ່ ເພາະນອກຈາກຈະຊ່ວຍປະຢັດເເງິນ ຊ່ວຍລົດອຸບັດເຫດ ແລະ ອັນຕະຣາຍຕ່າງໆ ແລ້ວ ຍັງຖືວ່າເປັນການສ້າງຄຸນຄວາມດີ ການເຮັດບຸນກຸສົນສົ່ງທ້າຍປີເກົ່າ ຕ້ອນຮັບປີໃໝ່.

ວັດຖຸປະສົງ ແລະ ເປົ້າໝາຍ

ວັດຖຸປະສົງຂອງການເຮັດບຸນສູດມົນສົ່ງທ້າຍປີເກົ່າ ຕ້ອນຮັບປີໃໝ່ ມີຢ່າງຫຼວງຫຼາຍ ແຕ່ຈະຄັດສັນມາໂດຍຫຍໍ້ ໃຫ້ເຫັນເປັນຂໍ້ໆ ໄປ ຄື:

1. ເພື່ອໃຫ້ໄດ້ທຳຄຸນງາມຄວາມດີ ເນື່ອງໃນໂອກາດສົ່ງທ້າຍປີເກົ່າ ຕ້ອນຮັບປີໃໝ່.
2. ເພື່ອຈະລົດຄວາມສ່ຽງຈາກອະບາຍຍະມຸກ ອຸບັດເຫດ ແລະ ຄວາມຊົ່ວຮ້າຍ ຂອງຊາວໜຸ່ມເຍົາວະຊົນທັງຫຼາຍ.
3. ເພື່ອເປັນການເຮັດບຸນໃຫຍ່ໃຫ້ກັບຊີວິດ ທັງທາງກາຍ ທາງຈິດໃຈ ແລະ ປັນຍາ.
4. ເພື່ອໃຫ້ການສະຫຼອງປີໃໝ່ ທີ່ຊົງຄຸນຄ່າ ຄວາມໝາຍ ແລະ ປັນຍາອັນປະເສີດ.
5. ເພື່ອເປັນການສ້າງບັນຍາກາດ ໃນການຮຽນຮູ້ ສຶກສາທັມມະຄຳສັ່ງສອນຂອງພຣະພຸດທະເຈົ້າ.
6. ເພື່ອເລີ່ມຕົ້ນຊີວິດ ດ້ວຍສິ່ງທີ່ເປັນມຸງຄຸນ ອັນຈະສົ່ງຜົນໃຫ້ໄດ້ພົບສິ່ງທີ່ເປັນມຸງຄຸນຕະຫຼອດທັງປີ.

ເປົ້າໝາຍຫຼັກຂອງການຈັດງານບຸນສູດມົນສົ່ງທ້າຍປີເກົ່າ ຕ້ອນຮັບປີໃໝ່ ແມ່ນມຸ້ງໄປທີ່ລູກຫຼານ ຊາວໜຸ່ມ ເຍົາວະຊົນ ຢາກໃຫ້ລູກຫຼານ ຊາວໜຸ່ມ ເຍົາວະຊົນ ໄດ້ເຂົ້າມາຮ່ວມກິດຈະກັມອັນເປັນບຸນ ກຸສົນນີ້ໃຫ້ຫຼາຍໆ ເພື່ອຈະໄດ້ຮັບທາງເລືອກທີ່ດີ ທີ່ຈະເລີ່ມຕົ້ນຊີວິດດ້ວຍຄວາມດີ ຄວາມຮູ້ ແລະ ປັນຍາ ເພາະເຍົາວະຊົນເປັນຄວາມຫວັງຂອງປະເທດຊາດ ເມື່ອເຍົາວະຊົນໄດ້ເຝິກຝົນອົບຮົມດີແລ້ວ ໄດ້ສ້າງອຸປະນິດໄສແຫ່ງສີລທັມ ແຫ່ງຄຸນງາມຄວາມດີແລ້ວ ຊາດບ້ານເມືອງກໍຈະມີຄວາມຫວັງເຕັມຮ້ອຍ ທີ່ຈະກ້າວໄປສູ່ຄວາມຈະເຣີນຮຸ່ງເຮືອງສີວິໄລສົມບູນ ແລະກ້າວໄປສູ່ຄວາມດີງາມຍິ່ງໆ ຂຶ້ນໄປ ສ່ວນເປົ້າໝາຍຮອງລົງມາ ກໍເພື່ອໃຫ້ຊາວພຸດທະບໍຣິສັດ ສາທຸຊົນທັງຫຼາຍ ໄດ້ມີໂອກາດ ຮ່ວມກັນສ້າງຄຸນງາມຄວາມດີ ເຝິກຝົນອົບຮົມຈິດໃຈດ້ວຍສີລທັມ.

ທ່ານໃດຕ້ອງການຮັບຊາບລາຍລະອຽດ ສາມາດສອບຖາມໄດ້ທີ່ ຫ້ອງການບໍລິຫານງານ ສູນກາງ ອພສ

ໂທລະສັບ: 020-55777352, 020-55997678

ສາທຸ ສາທຸ ສາທຸບຸນ

Post a Comment

0 Comments