ປະຫວັດຄວາມເປັນມາຂອງພະທາດຫລວງ...ທີ່ທ່ານອາດບໍ່ເຄີຍຮູ້!!!


ພະທາດໂລກະຈຸລະມະນີ ຫຼື ພະທາດຫຼວງ ແມ່ນສຸດຍອດແຫ່ງສິລະປະສະຖາປັດຕະຍະກໍາລາວ ທີ່ເປັ່ງກະກາຍສີຄໍາຮຸ່ງເຮືອງເຫຼືອງເຫຼື້ອມ, ເຊິ່ງຕັ້ງຢູ່ຢ່າງໂດດເດັ່ນ ແລະ ສະຫງ່າຜ່າເຜີຍໃນເຂດໃຈກາງນະຄອນຫຼວງວຽງຈັນ, ເປັນປູສະນິຍະສະຖານບູຮານທີ່ສັກສິດ, ເປັນສັນຍາລັກຂອງປະເທດລາວ, ເປັນພະທາດທີ່ບັນຈຸພະສາລີຣິກະທາດຂອງພະພຸດທະເຈົ້າ, ເຊິ່ງເຄີຍໄດ້ຈັດງານສະເຫຼີມສະຫຼອງຂຶ້ນ ໃນວັນເພັງເດືອນສິບສອງຂອງທຸກໆປີທີ່ສືບທອດກັນມາແຕ່ບູຮານນະການຈົນເຖິງປັດຈຸບັນ ແລະ ໄດ້ກາຍເປັນສູນລວມແຫ່ງຈິດວິນຍານ, ເປັນມິ່ງຂວັນອັນລໍ້າຄ່າຂອງປວງຊົນລາວທັງຊາດ ແລະ ເຮັດໃຫ້ຜູ້ຄົນທົ່ວທຸກສາລະທິດຕ່າງກໍ່ປາດຖະໜາໄດ້ມາຮ່ວມງານບຸນນະມັດສະການພະທາດຫຼວງວຽງຈັນ ດ້ວຍນໍ້າໃຈໄມຕີຈິດມິດຕະພາບ ແລະ ຄວາມສາມັກຄີ ຮັກແພງອົບອຸ່ນ.










ຕາມການບອກເລົ່າຂອງພະອາຈານ ດໍາລົງ ຮອງປະ ທານ ອພສ ຢູ່ວັດທາດຫຼວງເໜືອ ໃຫ້ຮູ້ວ່າ: ກ່ອນຈະສ້າງພະທາດຫຼວງນີ້ຂຶ້ນມາ ແມ່ນໄດ້ມີພະອໍລະຫັນ 5 ອົງ ມາຈາກປະເທດອິນເດຍ ໂດຍນໍາເອົາພະສາລີຣິກະທາດຂອງພະພຸດທະເຈົ້າມາພ້ອມ ເພື່ອປະດິດສະຖານໄວ້ຢູ່ເມືອງຈັນທະບູລີ, ເຊິ່ງແຕ່ກ່ອນມີແຕ່ບ້ານຮ່ອງແກໃນປັດຈຸບັນ.
ກ່ອນຈະສ້າງທາດ, ຈັນທະບູລີປະສິດທິສັກ ຫຼື ບູລີຈັນ ເຈົ້າເມືອງວຽງຈັນພ້ອມດ້ວຍພະອໍລະຫັນທັງ 5 ອົງ ໄດ້ພ້ອມກັນອະທິຖານວ່າ: ຖ້າຢາກໃຫ້ເອົາພະສາລີຣິກະທາດປະດິດສະຖານໄວ້ ທີ່ເມືອງນີ້ຂໍໃຫ້ພື້ນທີ່ດິນບໍລິເວນແຫ່ງນີ້ແຍກອອກຈາກກັນ, ພໍແຕ່ອະທິຖານສິ້ນສຸດລົງພື້ນທີ່ດິນກໍ່ໄດ້ ຍະອອກຈາກກັນທີ່ເລິກເຖິງ 5 ວາ ແລະ ກວ້າງ 5 ວາ, ຈາກນັ້ນ ພະອໍລະຫັນ ທັງ 5 ກໍ່ໄດ້ເອົາແຜ່ນເງິນ ລົງໄປປູເຕັມພື້ນ, ບູລີຈັນ ເຈົ້າເມືອງວຽງຈັນໄດ້ເອົາແຜ່ນຄໍາລົງວາງໃສ່ເຕັມພື້ນ, ນາງ ອິນທະສະຫວ່າງລົງຮອດເມຍເຈົ້າເມືອງວຽງຈັນໄດ້ ເອົາຮູບປັ້ນໂຕສິງທີ່ປັ້ນດ້ວຍຄໍາ ຕັ້ງຢອງໄວ້ເທິງແຜ່ນຄໍາ, ເຈົ້າເມືອງວຽງຈັນ ຈຶ່ງເອົາອູບແກ້ວຢອງເທິງ ໂຕສິງຄໍາ ແລະ ເອົາແຜ່ນ ຄໍາມາວາງເທິງອູບແກ້ວ ແລ້ວ ເອົາດອກໄມ້ທູບທຽນ ມາບູຊາໄວ້ແລ້ວເອົາຄໍາມາອັດຢອງເທິງອູບແກ້ວໄວ້ອີກ, ຈາກນັ້ນ ເສນາອາມາດຈຶ່ງເອົາແຜ່ນເງິນມາວາງປົກໄວ້ແລ້ວເອົາຫີນໝາກຄອມມາຖົມ ຈຶ່ງເລີ່ມສ້າງທາດເຈດີກວມເອົາໄວ້ ແລະ ສ້າງ ຂຶ້ນທໍາອິດເມື່ອປີ ພສ 236, ມີລວງກວ້າງ 10 ແມັດ ແລະ ສູງ 9 ແມັດເອີ້ນວ່າ: ອຸໂມງພະທາດຫຼວງ.










ຕົກມາຮອດໄລຍະໜຶ່ງ, ພະຍາມະຫາໂສກ ກໍ່ໄດ້ນໍາເອົາພະສາລີຣິກະທາດຂອງພະພຸດທະເຈົ້າມາປະດິດສະຖານໄວ້ຕື່ມອີກ ແລະ ກໍ່ໄດ້ມາສ້າງພະເຈດີຕື່ມເປັນຄັ້ງທີສອງ. ມາຮອດສະໄໝ ເຈົ້າໄຊຍະເຊດຖາທິຣາດ ໄດ້ສະເດັດມາຈາກເມືອງຊຽງດົງ-ຊຽງທອງ (ຫຼວງພະ ບາງ) ໄດ້ມາສ້າງພະຣາຊະວັງ ຫໍພະແກ້ວ, ຈາກນັ້ນໄດ້ ສ້າງພະເຈດີໃໝ່ທີ່ໃຫຍ່ກວ່າເກົ່າກວມເອົາພະເຈດີເກົ່າ ເອີ້ນວ່າ: ມະຫາເຈດີໃຫຍ່ ອົງປະເສີດເໝືອນພະເກດແກ້ວຈຸລະມະນີໃນເມືອງມະນຸດ. ຫຼັງຈາກສ້າງສໍາເລັດແລ້ວເພິ່ນກໍ່ໄດ້ພາກັນສະເຫຼີມສະຫຼອງກັນ 7 ມື້ເຈັດຄືນໃນວັນເພັງເດືອນສິບສອງ.










ນັບຈາກນັ້ນມາເພິ່ນຈຶ່ງໄດ້ມີການຈັດພິທີສະເຫຼີມສະຫຼອງບຸນນະມັດສະການ ພະທາດຫຼວງຂຶ້ນໃນວັນເພັງເດືອນສິບສອງຂອງທຸກໆປີ ສືບທອດກັນມາຈົນຮອດປັດຈຸບັນ, ເຊິ່ງມັນໄດ້ສະແດງໃຫ້ເຫັນເຖິງຄວາມເຫຼື້ອມໃສໃຈສັດທາຂອງຊາວພຸດທັງຫຼາຍທີ່ມາຮ່ວມເຮັດບຸນກຸສົນອັນເປັນປາງບຸນໃຫຍ່ ເພື່ອອຸທິດສ່ວນບຸນກຸສົນເຖິງດວງວິນຍານຂອງບັນພະບູລຸດ, ນັກບວດ, ພະອໍລະຫັນ ໃນແຕ່ລະຍຸກແຕ່ລະສະໄໝ ທີ່ມີຄຸນງາມຄວາມດີໄດ້ສ້າງພະທາດຫຼວງນີ້ຂຶ້ນມາເພື່ອ ເປັນສີລິມົງຄຸນຄູ່ບ້ານຄູ່ເມືອງ ອັນໄດ້ຕິດພັນກັບຮີດຄອງປະເພນີ ແລະ ວັດທະນະທໍາອັນດີງາມຂອງຊາດລາວເຮົາຕະຫຼອດມາ.
ທີ່ມາ: ຊາຍພະເນຈອນ.


Post a Comment

0 Comments