ໄຂ້ຍຸງລາຍເອົາໄປແລ້ວ 3 ຊີວິດ...


ໃນນະຄອນຫຼວງວຽງຈັນ ມີໜອງນໍ້າທີ່ບໍ່ໄຫລ ແລະສົ່ງກິ່ນຢູ່ຫຼາຍແຫ່ງ ຊຶ່ງບ່ອນທີ່ ຍຸງມັກໄຂ່ໃສ່
ໃນຕົ້ນປີນີ້ ຢູ່ນະຄອນຫລວງວຽງຈັນ ມີຜູ້ເສັຽຊີວິດຈາກພຍາດໄຂ້ຍຸງລາຍ ແລ້ວ 3 ຄົນ ເຫດການນີ້ ທາງຜະແນກສາທາລະນະສຸຂ ນະຄອນ ຫລວງວຽງຈັນ ບໍ່ໄດ້ຄາດຄິດມາກ່ອນ ວ່າຈະເກີດຂຶ້ນຕັ້ງຕົ້ນປີ. ດັ່ງເຈົ້າໜ້າທີ່ຜແນກສາທາລະນະສຸຂ ກ່າວເມື່ອຕົ້ນ ເດືອນນີ້ວ່າ:









“ສະພາບປະຈຸບັນນີ້ ພະຍາດໄຂ້ເລືອດອອກ ເປັນບັນຫາໃໝ່ ໃນນະຄອນຫລວງວຽງຈັນ ຊຶ່ງເປັນເຫດການຜິດປົກກະຕິ ຊຶ່ງບໍ່ເຄີຍມີມາໃນ ຮອບ 20 - 30 ປີ.”





ທ່ານໄດ້ກ່າວຕື່ມວ່າ ພຽງແຕ່ອາທິດທໍາອິດຂອງປີນີ້ ຕາມການລາຍງານ ໃນນະຄອນຫຼວງວຽງຈັນ ໄດ້ມີຜູ້ເສັຽຊິວິດຈາກພະຍາດໄຂ້ຍຸງລາຍ ໄປແລ້ວເຖິງ 3 ກໍລະນີ ພ້ອມນີ້ຍັງພົບຜູ້ຕິດເຊື້ອອີກ 30 ຄົນ ເວົ້າລວມແລ້ວ ເປັນເຫດການທີ່ຜິດປົກຕິໃນຮອບ 30 ປີ ທີ່ບໍ່ເຄີຍເກີດ ເຫດການແບບນີ້ ມາກ່ອນ.





ໃນຂະນະດຽວກັນ ພະຍາດໄຂ້ຍຸງລາຍ ໃນແຕ່ລະປີຍັງລະບາດຢູ່ປະເທດລາວຢ່າງຕໍ່ເນື່ອງ ແລະມີອັດຕາສູງ ຖ້າທຽບໃສ່ຂົງເຂດອາຊຽນ, ດັ່ງ ດຣ. ພູທອນ ເມືອງປາກ ຮອງຣັຖມົນຕຣີ ກະຊວງສາທາລະນະສຸກ ໄດ້ກ່າວໃນກອງປະຊຸມ ການຕ້ານ ແລະ ຄວບຄຸມພະຍາດໄຂ້ຍຸງລາຍ ເມື່ອຕົ້ນປີ ນີ້ວ່າ:









"ພະຍາດໄຂ້ຍຸງລາຍ ໄດ້ສ້າງບັນຫາໃຫ້ຫຼາຍປະເທດ ມາເປັນເວລາຫຼາຍປີ ໂດຍສະເພາະຢູ່ໃນ ສປປລາວ ຖ້າທຽບໃສ່ຫຼາຍປະເທດ ໃນ ຂົງເຂດອາຊຽນ ເຫັນວ່າຍັງມີອັດຕາການເສັຍຊີວິດສູງຢູ່."





ເນື່ອງຈາກສະພາບແວດລ້ອມ ແລະ ການປ່ຽນແປງຂອງດິນຟ້າອາກາດ, ສະພາບແວດລ້ອມຊຸມຊົນ ທີ່ມີການພັດທະນາ ແລະແອອັດ, ການ ດື້ຕໍ່ຢາ ຂອງໜອນນ້ຳ ລະບົບລາຍງານ ແລະຄວາມພ້ອມໃຈ ໃນທຸກຂົງເຂດທັງພາກລັດ ເອກກະຊົນ ແລະປະຊາຊົນ ຍັງເຮັດບໍ່ໄດ້ດີ ເທົ່າທີ່ຄວນ.





ໃນປີທີ່ຜ່ານ ກະຊວງສາທາລະນະສຸກ ໄດ້ລາຍງານວ່າ ຢູ່ສປປລາວ ມີຜູ້ຕິດເຊື້ອໄຂ້ຍຸງລາຍ ເຖິງ 6 ພັນຄົນ ແລະເສັຍຊີວິດເຖິງ 19 ຄົນ ໃນນີ້ ແຂວງອັດຕະປື ມີອັດຕາຕິດເຊື້ອຫຼາຍກວ່າໝູ່ ຮອງລົງມາ ແມ່ນນະຄອນຫລວງວຽງຈັນ, ຈຳປາສັກ ແລະ ແຂວງສະຫວັນນະເຂດ.









ສາເຫດຂອງການຕິດເຊື້ອໄຂ້ຍຸງລາຍ ຍັງສູງ ຍ້ອນຄວາມແອອັດ ໃນເຂດຕົວເມືອງເພີ່ມຂຶ້ນ, ເຂດຊານເມືອງ ມີປະລິມານ ຂີ້ເຫຍື້ອເພີ່ມຂຶ້ນ ແລະຂະບວນການອະນາມັຍ ຍັງເຮັດບໍ່ທັນໄດ້ດີ.





ສ່ວນກໍລະນີທີ່ເສັຍຊີວິດ ສ່ວນໃຫຍ່ແມ່ນຍ້ອນອາການຂອງພະຍາດໄຂ້ຍຸງລາຍ ເບື້ອງຕົ້ນ ອາການຄ້າຍຄືໄຂ້ຫວັດ ຫຼາຍຄົນເລີຍ ຍັງຖືເບົາ ບໍ່ໄປຫາໝໍ.
ຂອບໃຈທີ່ມາ: www.rfa.org


Post a Comment

0 Comments