Header Ads

ຊອງດອງໃນຍຸກເສດຖະກິດຝືດ...


ໄລຍະນີ້ຈະເອີ້ນວ່າລະດູການງານດອງຄົງຈະບໍ່ຜິດ ເຊິ່ງບາງຄົນທີ່ມີໝູ່ເພື່ອນທາງສັງຄົມຫຼາຍກໍ່ໄດ້ຊອງ ເຊີນໄປຮ່ວມງານຫຼາຍແນ່ ສຳລັບຜູ້ມີລາຍໄດ້ສູງແນ່ກໍ່ຄົງບໍ່ໄດ້ຄິດເຖິງຈຳນວນໂຕເລກເງິນໃສ່ຊອງ ແຕ່ຜູ້ມີລາຍໄດ້ໜ້ອຍ ກ່ອນຈົກຖົງຄົງຕ້ອງຄິດແລ້ວຄິດອີກ ເພາະຕ້ອງໄດ້ກຳນົດແບ່ງໃຊ້ຈ່າຍໃຫ້ກຸ້ມເດືອນ ປະເດັນງານດອງທີ່ສັງຄົມຄວນຄຳນຶງຮ່ວມກັນກໍ່ຄື ເຮົາຈະສ້າງຄ່ານິຍົມແບບໃດ ? ແຕ່ງດອງໃຫ້ເໝາະສົມ ບໍ່ມຸ່ງອວດລ້ຳລວຍ ແກ້ຜ້າເອົາໜ້າລອດ ຫຼື ແຕ່ງກັນແລ້ວກົ້ນໝໍ້ໜຶ້ງບໍ່ທັນດຳກໍ່ປະກັນແລ້ວ…?.










ປະເດັນທີ່ໜຶ່ງ ການໃສ່ຊອງດອງໃນຍຸກເສດຖະກິດຝືດນັ້ນ ກໍ່ບໍ່ຢາກໃຫ້ເຈົ້າພາບຄາດຫວັງໂຕເລກສູງເກີນໄປ ເພາະຖ້າຈິດໃຈໄປຫຼົງຢຶດຕິດວ່າຄວນໄດ້ເທົ່າໃດນັ້ນ ຜົນອອກມາບໍ່ໄປຕາມຄາດ ເຮັດໃຫ້ຜູ້ກ່ຽວເສຍໃຈ ຫຼື ເຜີໆ ບາງທີອາດຂາດຄວາມສຳພັນກັບແມ່ເກົ່າເພື່ອນແກ່ ເພາະໄປຫຼົງຕິດໃນຄ່າຂອງວັດຖຸ ເຊິ່ງປະເດັນນີ້ມັນສະທ້ອນວ່າ ເຈົ້າພາບຕ້ອງວາງແຜນໄລຍະຍາວເກັບເງິນຈ່າຍຄ່າສະຖານທີ່ ແລະ ອາຫານ ໂດຍບໍ່ຫວັງຄິດໄລ່ເອົາຈາກຊອງດອງມາທົດແທນຢ່າງດຽວ ຕໍ່ມາກໍ່ແມ່ນເລື່ອງຂອງອາຫານ ເຈົ້າພາບກໍ່ຄວນເອົາໃຈໃສ່ກັບຜູ້ໃຫ້ບໍລິການອາຫານ ຕ້ອງສະອາດ ເຊັ່ນ: ອາຫານບຸບເຟ້ ຍຳສະຫຼັດ ມີຮອດໂຕບົ້ງ ນີ້ຄືບົດຮຽນຜ່ານມາ!.










ສຳລັບອີກຫາງສຽງໜຶ່ງຝາກມາ ມີຄຳເຫັນວ່າ ບໍ່ຄວນຫຼົງຄິດໄປວ່າງານດອງເປັນບ່ອນອວດຖານະຄວາມລ້ຳລວຍ ເຊິ່ງສ່ວນຕົວເຂົ້າໃຈດີວ່າ ສັງຄົມເຮົາເວລາໄປດອງກໍ່ເຫັນນຳກັນເລື່ອງການແຕ່ງໂຕ ແລະ ເຄື່ອງປະດັບໃຫ້ພໍເໝາະພໍດີ ເຊິ່ງສັງເກດໄດ້ວ່າ ຄ່ານິຍົມແບບນີ້ເປັນທັງໃນເມືອງ ແລະ ຕ່າງແຂວງ…? ມີຂ່າວວ່າ ສຳລັບງານດອງຢູ່ປະເທດຈີນ ແມ່ນເພິ່ນໄດ້ກຳນົດຄວນໃສ່ຊອງທໍ່ໃດ ໂດຍເນັ້ນໃຫ້ປະຢັດ ແລະ ເໝາະສົມ ຄວາມຈິງສຳລັບບ້ານເຮົານັ້ນ ເຖິງແມ່ນວ່າຈະມີການຈັດງານດອງຢ່າງຫຼູຫຼາຍິ່ງໃຫຍ່ ຫຼາຍຄູ່ຢູ່ກັນໝັ້ນຍືນຍາວນານ ແຕ່ບ້ານເຮົາກໍ່ຍັງມີທ່າອ່ຽງອັດຕາການຢ່າຮ້າງຜົວເມຍສູງຢູ່ ຜູ້ຂຽນຄິດວ່າ: ເຈົ້າ­ພບຄວນເລືອກການວາງແຜນໄລຍະຍາວ ໂດຍສະເພາະແຜນການເງິນ ເພື່ອປ້ອງກັນບໍ່ໃຫ້ບັນຫາເກີດຂຶ້ນຫຼັງແຕ່ງດອງຕ້ອງຫາເງິນໃຊ້ໜີ້, ລູກສອງສາມຄົນແລ້ວຍັງໃຊ້ໜີ້ບໍ່ໝົດ… ເວົ້າເລື່ອງການສ້າງຄ່ານິຍົມ ສຳຄັນທັງຜູ້ມີກຳລັງເສດຖະກິດ ແລະ ຜູ້ມີລາຍໄດ້ໜ້ອຍ ກໍ່ຕ້ອງເລືອກເຮັດໃຫ້ມັນເໝາະສົມກັບກຳລັງຕົນເອງ ເຊິ່ງຝ່າຍຊາຍກໍ່ຫວັງວ່າຝ່າຍຍິງຢາກຈັດໃຫຍ່ ເພາະເກີດມາແຕ່ງດອງເທື່ອດຽວ ແບບວ່າຢາກໄດ້ໜ້າໄດ້ຕາ ເຊິ່ງຄວາມຈິງກໍ່ພໍມີທາງອອກຢູ່ແລ້ວ ເພາະຖານະຄົນເຮົາບໍ່ຄືກັນ ເຊັ່ນ: ເຫັນຊ້າງຂີ້ຢ່າຂີ້ຕາມຊ້າງ ເຮັດແບບສາມເຖົ້າສີ່ແກ່ ອາດພໍເປັນທາງອອກໃຫ້ຫຼາຍຄູ່.










ຜູ້ຂຽນເຫັນວ່າ: ການແຕ່ງດອງ ເຈົ້າພາບຕ້ອງຄຶດວາງແຜນໃຫ້ລະອຽດ ລວມເຖິງການຖ່າຍຮູບໜ້າງານ ກໍ່ໃຫ້ເໝາະສົມ ຖືກຮີດຄອງ ບໍ່ເຮັດຄືຜ່ານມາ ໃສ່ຊຸດງາມແຕ່ຢືນຖ່າຍໜ້າພະພຸດທະຮູບ ງານດອງຍຸກເສດຖະກິດຝືດ ເຈົ້າພາບກໍ່ຄວນເຂົ້າໃຈສະພາບການເງິນເຊັ່ນກັນ ສຳຄັນກໍ່ແມ່ນວິທີການຢູ່ຮ່ວມກັນຂອງຄູ່ຜົວເມຍບໍ່ໃຫ້ຜິດຮີດຄອງ, ຊື່ສັດ, ຈິງໃຈຕໍ່ກັນ ແລະ ບໍ່ເອົາຖານະມາອວດກັນ.
ຂອບໃຈທີ່ມາ: .blogspot.com


No comments

Powered by Blogger.