ອະນາຄົດທີ່ມືດມົນຂອງຄົນຮັກກາເຟ...


ການວິໄຈຫລ້າສຸດຈາກທີມນັກວິທະຍາສາດແຫ່ງສວນພຶກສາສາດດິວ ໃນນະຄອນຫລວງລອນດອນ ຂອງອັງກິດ ພົບຂໍ້ມູນທີ່ບົ່ງບອກວ່າ: ບັນດາຄົນທີ່ຮັກກາເຟອາດປະເຊີນກັບກາເຟທີ່ມີລົດຊາດບໍ່ແຊບ ແລະ ລາຄາແພງຂຶ້ນ ເນື່ອງຈາກບັນຫາໂລກຮ້ອນສົ່ງຜົນຕໍ່ຄຸນນະພາບ ແລະ ເຮັດໃຫ້ພື້ນທີ່ທີ່ເໝາະສົມຕໍ່ການປູກກາເຟຫຼຸດລົງ.










ການວິໄຈລະບຸວ່າ: ການຜະລິດກາເຟຢູ່ເອທິໂອປີ ເຊິ່ງເປັນແຫລ່ງກໍາເນີດກາເຟພັນອາຣາບິກາ ຄຸນນະພາບສູງຂອງໂລກ ແລະ ເປັນຜູ້ສົ່ງອອກກາເຟລາຍໃຫຍ່ທີ່ສຸດຂອງທະວີບອາຟຣິກາ ອາດໄດ້ຮັບຄວາມເສຍຫາຍໜັກ ພາຍໃນໄລຍະໜຶ່ງຮ້ອຍປີຂ້າງໜ້າ ຖ້າເຮົາບໍ່ດໍາເນີນການໃດໆ ໃນການແກ້ໄຂບັນຫາການປ່ຽນແປງສະພາບອາກາດ.
ຜົນການສຶກສາຜູ້ຊ່ຽວຊານຈາກສວນແຫ່ງດັ່ງກ່າວ ແລະ ທີມງານ ພົບວ່າ: ຖ້າອຸນຫະພູມໂລກເພີ່ມຂຶ້ນ 4 ອົງສາ ພາຍໃນໄລຍະທ້າຍສະຕະວັດນີ້ ຈະເຮັດໃຫ້ພື້ນທີ່ປູກກາເຟຄຸນນະພາບດີຂອງເອທິໂອປີຫຼຸດລົງ 60 ເປີເຊັນ ຈາກເນື້ອທີ່ໃນປະຈຸບັນ.
ທ່ານ ແອຮອນ ເດວີສ໌ ນັກວິໄຈອາວຸໂສຂອງສວນດັ່ງກ່າວບອກກັບບີບີຊີວ່າ: ຖ້າເຮົາເມີນເສີຍບໍ່ແກ້ໄຂບັນຫານີ້ ຜົນຜະລິດກາເຟຢູ່ເອທິໂອປີ ແລະ ທົ່ວໂລກຈະຫຼຸດລົງ, ລົດຊາດຂອງກາເຟອາດຫຼຸດລົງ ແລະ ມີລາຄາແພງຂຶ້ນ.










ການວິໄຈນີ້ສອດຄ່ອງກັບຄວາເຫັນຂອງທ່ານ ທິມ ຊິລລິງ ຜູ້ອໍານວຍການສະຖາບັນວິໄຈກາເຟໂລກ ທີ່ລະບຸວ່າ: ປະລິມານກາເຟຄຸນນະພາບສູງໃນຕະຫຼາດໂລກໄດ້ຮັບຜົນກະທົບຢ່າງໜັກຈາກບັນຫາການປ່ຽນແປງສະພາບອາກາດ, ບັນຫາເລື່ອງທີ່ດິນປູກ ແລະ ຄ່າແຮງງານ ລວມທັງຄວາມຕ້ອງການກາເຟທີ່ເພີ່ມຂຶ້ນທຸກປີ. ນອກຈາກນີ້ ແຫລ່ງປູກກາເຟໃນບາງພື້ນທີ່ຂອງໂລກກໍ່ໄດ້ຮັບຜົນກະທົບຈາກອຸນຫະພູມທີ່ສູງຂຶ້ນ ແລະ ສົ່ງຜົນເສຍຫາຍຕໍ່ຄຸນນະພາບຂອງກາເຟທີ່ຜະລິດໄດ້ ແລະ ທ່ານຍັງຊີ້ວ່າ: ປັດໄຈເຫຼົ່ານີ້ເຮັດໃຫ້ລາຄາກາເຟແພງຂຶ້ນຢ່າງບໍ່ຕ້ອງສົງໄສ ໂດຍສະເພາະກາເຟຄຸນນະພາບສູງ ເຊິ່ງມີທ່າອ່ຽງຈະໄດ້ຮັບຜົນກະທົບຫຼາຍທີ່ສຸດ.






ຂອບໃຈທີ່ມາ:mthai.com


Post a Comment

0 Comments