ອັນດັບ 1 ຂອງອຸບັດຕິເຫດ ຍ້ອນການລະເມີດກົດຈະລາຈອນ

ຕາມການລາຍງານຂອງ ປກສ ນະຄອນຫລວງ ບອກໃຫ້ຮູ້ວ່າ : ບັນຫາອຸບັດຕິເຫດຕາມທ້ອງຖະໜົນ ຢູ່ເມືອງຫາດຊາຍຟອງ ນະຄອນຫຼວງວຽງຈັນ ເຫັນວ່າຍັງເພີ່ມຂຶ້ນ ສາເຫດສ່ວນຫຼາຍແມ່ນຜູ້ຂັບຂີ່ລະເມີດກົດລະບຽບຈະລາຈອນ ເປັນຕົ້ນແມ່ນ ຂີ່ລົດໄວເກີນກໍານົດ, ດື່ມສິ່ງມຶນເມົາແລ້ວຂັບລົດ, ລ່ວງໄຟອໍານາດ; ເຊິ່ງສະແດງອອກໃນເດືອນ ມັງກອນ 2019 ທົ່ວເມືອງຫາດຊາຍຟອງ ນະຄອນຫຼວງວຽງຈັນ ມີອຸບັດຕິເຫດເກີດຂຶ້ນເຖິງ 15 ລາຍ, ມີຄົນໄດ້ຮັບບາດເຈັບທັງໝົດ 15 ຄົນ, ບາດເຈັບສາຫັດ 10 ຄົນ, ເສຍຊີວິດ 6 ຄົນ, ທຽບໃສເດືອນ ທັນວາ 2018 ເພີ່ມຂຶ້ນ 2 ລາຍ, ສາເຫດທີ່ພາໃຫ້ເກີດອຸບັດຕິເຫດສ່ວນຫຼາຍຍັງແມ່ນ ຜູ້ຂັບຂີ່ແລ່ນລົດໄວເກີນກໍານົດ ແລະ ດື່ມສິ່ງມຶນເມົາແລ້ວຂັບຂີ່ພາຫະນະ.

ພັຕ ບຸນໂຮມ ແສງອາລຸນ ຮອງຫົວໜ້າກອງຮ້ອຍຕໍາຫຼວດຈະລາຈອນ ເມືອງຫາດຊາຍຟອງ ໄດ້ໃຫ້ຮູ້ວ່າ: ໃນເດືອນ ມັງກອນ 2019 ມີອຸບັດຕິເກີດຂຶ້ນ 15 ລາຍ, ທຽບໃສ 1 ເດືອນຜ່ານມາແມ່ນເພີ່ມຂຶ້ນ 3 ລາຍ, ສາເຫດສ່ວນຫຼາຍຍັງແມ່ນ ການຂັບຂີ່ລົດໄວເກີນກໍານົດ, ດື່ມສິ່ງມຶນເມົາແລ້ວຂັບຂີ່ພາຫະນະ, ປ່ຽນທິດທາງລົດບໍ່ຮັບປະກັນ, ສະພາບເສັ້ນທາງບາງບ່ອນເປ່ເພ ແລະ ບາງເສັ້ນບໍ່ມີໄຟເຍືອງທາງ; ສໍາລັບເສັ້ນທາງທີ່ມັກເກີດອຸບັດຕິເຫດສ່ວນຫຼາຍແມ່ນ ເສັ້ນທາງທ່າເດື່ອ, ເສັ້ນທາງກໍາແພງເມືອງ ແລະ ເສັ້ນທາງໜອງໄຮ-ດົງຄໍາຊ້າງ ແລະ ເວລາທີ່ມັກເກີດອຸບັດຕິເຫດສ່ວນຫຼາຍແມ່ນ 17:00 ໂມງ-24:00 ໂມງ, ກຸ່ມຄົນທີ່ມີຄວາມສ່ຽງໃນການເກີດອຸບັດຕິເຫດແມ່ນ ໃນເກນອາຍຸສະເລ່ຍແຕ່ 18 ປີ – 40 ປີ, ສ່ວນພາຫະນະທີ່ມັກເກີດອຸບັດຕິເຫດແມ່ນ ລົດຈັກ, ຮອງມາແມ່ນລົດຍົນ. ຕໍ່ກັບບັນຫາດັ່ງກ່າວ ເຈົ້າໜ້າທີ່ກອງຮ້ອຍຈະລາຈອນ ປກສ ເມືອງຫາດຊາຍຟອງ ນວ ໄດ້ເອົາໃຈໃສ່ປະຕິບັດໜ້າທີ່ເປັນພິເສດ ເພື່ອປ້ອງກັນການເກີດອຸບັດຕິເຫດຕາມທ້ອງຖະໜົນ ໃນຊົ່ວໂມງເລັ່ງດ່ວນ ເລີ່ມແຕ່ 7:30 ໂມງ- 8:30 ໂມງ ເຊົ້າ ແລະ 16:00 ໂມງ-17:00 ໂມງແລງ ໂດຍໄດ້ວາງກໍາລັງລົງລະບາຍລົດຢູ່ຕາມເສັ້ນທາງ, ຈຸດສໍາຄັນຕ່າງໆ ເພື່ອອໍານວຍຄວາມສະດວກໃຫ້ຜູ້ໃຊ້ລົດໃຊ້ຖະໜົນສັນຈອນໄປ-ມາສະດວກ ແລະ ປອດໄພດີ. ນອກຈາກນີ້, ຍັງໄດ້ເອົາໃຈໃສ່ລົງໂຄສະນາເຜີຍແຜ່ກົດລະບຽບການສັນຈອນຕາມທ້ອງຖະໜົນ ເພື່ອເຮັດໃຫ້ອຸບັດຕິເຫດຫຼຸດໜ້ອຍຖອຍລົງ.

ສໍາລັບທິດທາງໃນຕໍ່ໜ້າກອງຮ້ອຍຕໍາຫຼວດຈະລາຈອນ ເມືອງຫາດຊາຍຟອງ ນວ ຈະເພີ່ມທະວີປະຕິບັດວຽກງານວິຊາສະເພາະ ຕາມທິດຊີ້ນໍາຂອງຂັ້ນເທິງໃຫ້ສໍາເລັດຜົນ ແລະ ເຮັດໜ້າທີ່ລະບາຍການສັນຈອນຕາມຈຸດສັບສົນ ໃນຂອບເຂດເມືອງຫາດຊາຍຟອງ ເພື່ອເຮັດໃຫ້ການສັນຈອນຂອງພາຫະນະຕາມທ້ອງຖະໜົນຫຼວງມີຄວາມສະດວກ; ພ້ອມທັງສືບຕໍ່ໂຄສະນາກົດລະບຽບຈະລາຈອນ ໃຫ້ນັກຂັບຂີ່ໄດ້ຮັບຮູ້ເຂົ້າໃຈຢ່າເລິກເຊິ່ງ ເພື່ອປ້ອງກັນບໍ່ໃຫ້ເກີດອຸບັດຕິເຫດ.



ຂໍ້ມູນ: ປກສ ນະຄອນຫລວງ

Post a Comment

0 Comments