ຜົນສຳເລັດ ກອງປະຊຸມຄົບຄະນະບໍລິຫານງານພັກເມືອງທົ່ງມີໄຊຄັ້ງທີ 12ສະໄໝທີ III

ກອງປະຊຸມດັ່ງກ່າວນີ້ໄດ້ໄຂຂຶ້ນຢ່າງເປັນທາງການ ໃນວັນທີ່ 14  15 ກຸມພາ 2019 ຢູ່ທີ່ສະໂມສອນຂອງເມືອງທົ່ງມີໄຊ ແຂວງໄຊຍະບູລີ ໂດຍພາຍໃຕ້ການເປັນປະທານຂອງ ສະຫາຍ ອາລຸນສັກ ລິນທະວົງ ຮອງເລຂາຄະນະບໍລິຫານງານພັກເມືອງ ຮອງເຈົ້າເມືອງໆທົ່ງມີໄຊ ເປັນກຽດເຂົ້າຮ່ວມຂອງສະຫາຍ ົນຈັດຕະວາ ຄຳໝັ້ນ ວັນນະວົງ ກຳມະການປະຈຳພັກແຂວງ ຫົວໜ້າກອງບັນຊາການທະຫານ ແຂວງໄຊຍະບູລີ ມີບັນດາສະຫາຍ ຄະນະປະຈຳພັກເມືອງ, ກໍາມະການພັກເມືອງ, ເລຂາ, ຄະນະພັກຮາກຖານ ເລຂາໜ່ວຍພັກ, ຕະຫຼອດຮອດຫົວໜ້າຫ້ອງການ ອົງການກົມກອງອອ້ມຂ້າງເມືອງເຂົ້າຮ່ວມຢ່າງພ້ອມພຽງ. 



ເຊິ່ງກອງປະຊຸມໃນຄັ້ງນີ້ໄດ້ຄົ້ນຄວ້າພິຈາລະນາຮັບຮອງເອົາ ຮ່າງບົດສະຫຼຸບຕີລາຄາວຽກງານຮອບດ້ານໃນການຊີ້ນຳ-ນຳພາ ຂອງຄະນະບໍລິຫານງານພັກເມືອງສະໄໝທີ 3 ໃນ 1ປີ ຜ່ານມາ ແລະ ແຜນວຽກຈຸດສຸມປີ 2019, ຮັບຮອງເອົາໂຄງການດຳເນີນງານຂອງຄະນະບໍລິຫານງານພັກເມືອງປະຈຳປີ 2019, ຮັບຮອງເອົາບົດສຳຫຼວດການນຳພາບັນດາສະຫາຍຄະນະບໍລິຫານງານພັກເມືອງສະໄໝທີ3 ປະຈຳປີ 2018. 



ໃນໜື່ງປີຜ່ານມາໄດ້ເອົາໃຈໃສ່ຈັດຕັ້ງປະຕິບັດບັນດາແຜນງານ, ແຜນການ ແລະ ໂຄງການຕ່າງໆໃນການພັດທະນາເສດຖະກິດສັງຄົມຂອງເມືອງ ເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ, ມີຄວາມສະຫງົບປອດໄພໂດຍພື້ນຖານ, ການເມືອງປະຊາ ທິປະໄຕປະຊາຊົນໄດ້ຮັບການປັບປຸງດີຂຶ້ນ ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເປັນກ້າວໆ. ເສດຖະກິດຂອງເມືອງສືບຕໍ່ຂະຫຍາຍ ຕົວຢ່າງຕໍ່ເນື່ອງໃນລະດັບ 8,5ສ່ວນຮ້ອຍ



ເອົາໃຈໃສ່ສົງເສີມປະຊາຊົນຜະລິດເປັນສິນຄ້າເພື່ອສ້າງລາຍຮັບໃຫ້ແກ່ຄອບຄົວໃຫ້ຫຼາຍຂຶ້ນໂດຍເລັ່ງໃສ່ການປູກຝັງລ້ຽງສັດປະເພດຕ່າງໆເຊັ່ນ: ການປູກເຂົ້ານາປີໃນເນື້ອທີ່ 1.325 ເຮັກຕາ ຜົນຜະລິດໄດ້ 5.373ໂຕນ, ປູກສາລີແຂງເນື້ອທີ 110ເຮັກຕາ, ຜົນຜະລິດໄດ້ 450ໂຕນ, ປູກໝາກເດືອຍໃນເນື້ອທີ່ 896ເຮັກຕາ ຜົນຜະລິດໄດ້ 1.800ໂຕນ ແລະ ປູກພືດອື່ນໆອີກຈຳນວນໜຶ່ງ.



ນອກນັ້ນຍັງໄດ້ລ້ຽງສັດປະເພດຕ່າງໆເຊັ່ນ: ຄວາຍ 6ພັນກວ່າໂຕ, ງົວ 4ພັນກວ່າໂຕ, ໝູ 8ພັນກວ່າໂຕ, ຊ້າງ 80ໂຕ ແລະ ສັດປີກ 126.364ໂຕ. ເຄື່ອນຍ້າຍສິນຄ້າສົ່ງອອກຕ່າງເມືອງໄດ້ທັງໝົດມູນຄ່າ 8ຕືກວ່າກີບ. ໃນ 1ປີຜ່ານມາໄດ້ເຊີດຊູຄວາມຮັບຜິດຊອບຂອງຕົນເຂົ້າໃນການເກັບງົບປະມານສາມາດຈັດເກັບລາຍຮັບພາຍໃນເມືອງໄດ້ທັງໝົດ 1.390ລ້ານກີບ, ທຽບໃສ່ແຜນການປີປະຕິບັດໄດ້ 95ສ່ວນຮ້ອຍ, ປະຕິບັດລາຍຈ່າຍໄດ້ 6.676ລ້ານກີບ. ທົ່ວເມືອງໄດ້ຊົມໃຊ້ໄຟຟ້າແລ້ວ 13ບ້ານ ກວມຮ້ອຍສ່ວນຮ້ອຍຂອງບ້ານທັງໝົດ, ຊົມໃຊ້ລະບົບນ້ຳປະປາແລ້ວຈຳນວນ 7ບ້ານ ເທົ່າກັບ 41ສ່ວນຮ້ອຍ ຂອງຈຳນວນຄອບຄົວທັງໝົດ,



ໄດ້ຊຸກຍູ້ສົ່ງເສີມການສ້າງໂຮງຮຽນຕົວແບບ, ໂຮງຮຽນປອດສິ່ງເສບຕິດ ຊັ້ນມັດທະຍົມສຶກສາ 3ແຫ່ງ, ປັບປຸງຄຸນນະພາບນ້ຳໃຈບໍລິການຮັບໃຊ້ຈັນຍາບັນຂອງພະນັກງານແພດຢູ່ໂຮງໝໍ ແລະ ສຸກສາລາສູງຂຶ້ນກວ່າເກົ່າ, ສ້າງຄອບຄົວ ແລະ ບ້ານວັດທະນະທຳ ໄດ້13ບ້ານ ເຊິ່ງມາຮອດປະຈຸບັນໄດ້ຮັບຮອງເປັນຄອບຄົວວັດທະນະທຳ ແລະ ແລ້ວ 1.916ຄອບຄົວ ເທົ່າກັບ 98,55 ສ່ວນຮ້ອຍຂອງຄອບຄົວທັງໝົດ, ຄຸ້ມຄອງແຮງງານຕາມຫົວໜ່ວຍແຮງງານຕ່າງໆ ທົ່ວເມືອງມີຫົວໜ່ວຍແຮງງານ 2ແຫ່ງ ມີແຮງງານທັງໝົດ 39ຄົນ, ຍິງ 15ຄົນ, ໃນນີ້ແຮງງານເປັນຄົນລາວ 28ຄົນ, ຍິງ 12ຄົນ, ຄະນະພັກແຕ່ລະຂັ້ນໄດ້ເອົາໃຈໃສ່ໃນການປັບປຸງກໍ່ສ້າງພັກ ທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນຢ່າງເປັນເຈົ້າການ ໂດຍຍຶດໝັ້ນ ແລະ ປະຕິບັດຢ່າງເຂັ້ມງວດຕາມ 5ຫຼັກການ 3ທິດນຳ ໃນການກໍ່້ສ້າງ ແລະ ປັບປຸງພັກ.



ປະຈຸບັນທົ່ວເມືອງ ມີ3ຄະນະພັກຮາກຖານ ແລະ 57ໜ່ວຍພັກ, ມີສະມາຊິກພັກທັງໝົດ 691ສະຫາຍ, ຍິງ 194ສະຫາຍ, ສໍາຮອງ 36ສະຫາຍ, ຍິງ 17ສະຫາຍ, ພວມລົງດຳເນີນກອງປະຊຸມໃຫຍ່ໜ່ວຍພັກຮາກຖານບ້ານໄດ້ສຳເລັດ 10ບ້ານ, ທົ່ວເມືອງ ມີພະນັກງານລັດຖະກອນທັງໝົດ 426ທ່ານ, ຍິງ 183ທ່ານ, ພະນັກງານອາສາສະໝັກ 144ທ່ານ, ຍິິງ 87ທ່ານ, ອົງການຈັດຕັ້ງມະຫາຊົນແຕ່ລະຂັ້ນກໍ່ໄດ້ເອົາໃຈໃສ່ຊີ້ນຳ-ນຳພາ, ປຸກລະດົມຂົນຂວາຍ ແລະ ເປີດຂະບວນການແຂ່ງຂັນ 4ບຸກ ໄດ້ປະເພດແຂງ 51ໜ່ວຍ ເທົ່າກັບຮ້ອຍສ່ວນຮ້ອຍ, ປະເມີນຂໍ້ແຂ່ງຂັນ 3ດີໄດ້ທັງໝົດ 15ຮາກຖານ, 25ໜ່ວຍ ແລະ 4ຈຸ, ຜ່ານການປະເມີນໄດ້ໜ່ວຍ 3ດີປະເພດ1 ກວມເອົາຮ້ອຍສ່ວນຮ້ອຍ. ປະເມີນຂໍ້ແຂ່ງ 5ເປັນເຈົ້າຂອງສະຫະພັນກຳມະບານ ທັງໝົດ 24ຮາກຖານ ແລະ 4ໜ່ວຍຮ່ວມຊີວິດເອກະລາດ ຜ່ານການປະເມີນໄດ້ປະເພດແຂງ ກວມເອົາຮ້ອຍສ່ວນຮ້ອຍ, ພ້ອມທັງຈັດຕັ້ງປະຕິບັດ ຂະບວນການ ແລະ ບ້ານສາມັກຄີປອງດອງ  ອັນພົ້ນເດ່ນ ກໍ່ໄດ້ປະກາດບ້ານສາມັກຄີປອງດອງແລ້ວຈຳນວນ 6ບ້ານ ເທົ່າກັບ 46ສ່ວນຮ້ອຍ. 



ນອກຈາກນີ້ບັນດາສະຫາຍຜູ້ແທນກອງປະຊຸມຍັງໄດ້ພ້ອມປະກອບຄຳເຫັນ ຕີລາຄາຄືນຜົນສຳເລັດການຈັດຕັ້ງປະຕິບັດວຽກງານ ໃນແຕ່ລະຂົງເຂດເພື່ອ ຊອກໃຫ້ເຫັນໄດ້ດ້ານດີ, ດ້ານຕັ້ງໜ້າເພື່ອຊຸກຍູ້ສົ່ງເສີມ, ຊອກໃຫ້ເຫັນໄດ້ດ້ານອອ່ນ, ຂໍ້ຄົງຄ້າງເພື່ອພ້ອມກັນຊອກຫາວິທີທາງແກ້ໄຂໃນຕໍ່ໜ້າໃຫ້ດີຂຶ້ນເປັນກ້າວໆ. ຈາກນັ້ນໃນຕອນທ້າຍກໍ່ຍັງໄດ້ຮັບຟັງຄຳໂອ້ລົມຈາກທ່ານ ພົນຈັດຕະວາ ຄຳໝັ້ນ ວັນນະວົງ ກຳມະການປະຈຳພັກແຂວງ ຫົວໜ້າກອງບັນຊາການທະຫານແຂວງໄຊຍະບູລີນຳອີກ.


 


ຂ່າວ: ມິກລະຄອນ ຄຳມຸນທາ


 


 

Post a Comment

0 Comments