ຮອງປະທານປະເທດ ສຳເລັດການເຄື່ອນໄຫວຢ້ຽມຢາມ ແລະ ຊຸກຍູ້ວຽກງານກະກຽມດຳເນີນກອງປະຊຸມໃຫຍ່ 3 ຂັ້ນຢູ່ແຂວງຄຳມ່ວນ

ທ່ານ ປອ ພັນຄຳ ວິພາວັນ ກົມການເມືອງສູນກາງພັກ, ຄະນະເລຂາທິການສູນກາງພັກ, ຜູ້ປະຈຳການ ຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ພ້ອມດ້ວຍຄະນະໄດ້ເດີນທາງເຄື່ອນໄຫວ ເຮັດວຽກຢູ່ແຂວງຄຳມ່ວນ ໃນລະຫວ່າງວັນທີ 19-20 ກຸມພາ 2019 ໂດຍເປັນກຽດຕ້ອນຮັບຂອງ ທ່ານ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງ ເຈົ້າແຂວງໆຄຳມ່ວນ, ມີບັນດາສະຫາຍໃນຄະນະບໍລິຫານງານ ພັກແຂວງ, ເລຂາພັກເມືອງ, ພະແນກການ, ຂະແໜງການຕ່າງໆອ້ອມຂ້າງແຂວງຂົ້າຮ່ວມ.

ໃນໂອກາດດັ່ງກ່າວ ທ່ານ ໂອໄດ ສຸດາພອນ ໄດ້ລາຍງານສະພາບຈຸດພິເສດ ແລະ ການພັດທະນາເສດຖະ ກິດ-ສັງຄົມພາຍໃນແຂວງໃຫ້ຊາບວ່າ: ໃນທົ່ວແຂວງຄຳມ່ວນ ແມ່ນມີສະຖຽນລະພາບທາງດ້ານການເມືອງ ແລະ ມີຄວາມສະຫງົບໂດຍພື້ນຖານ, ທາງດ້ານເສດຖະກິດແມ່ນມີການຂະຫຍາຍຕົວຢູ່ໃນລະດັບ 6,56%, ລວມຍອດ ຜະລິດຕະພັນພາຍໃນ (GDP) ບັນລຸ 7.437 ຕື້ກີບ, ສະເລ່ຍໃສ່ຫົວຄົນໄດ້ 17.883.473 ກີບຕໍ່ຄົນຕໍ່ປີ ຫຼືເທົ່າກັບ 2.121 ໂດລາສະຫະລັດ, ທຽບໃສ່ປີຜ່ານມາເພີ່ມຂຶ້ນ 23 ໂດລາ, ດ້ານການລົງທຶນຂອງລັດ ມີໂຄງການລົງທຶນຂອງລັດ ທັງໝົດ 310 ໂຄງການ, ລວມມູນຄ່າ 122,62 ຕື້ກີບ. ໃນນັ້ນທຶນພາຍໃນ 84,15 ຕື້ກີບ, ທຶນຕ່າງປະເທດ 38,47 ຕື້ກີບ, ສາມາດຈັດຕັ້ງປະຕິບັດໄດ້ 301 ໂຄງການ ລວມມູຄ່າ 121.902 ຕື້ກີບ ເທົ່າກັບ 99% ດ້ານວຽກງານການເງິນ ໄດ້ຮັບຕົວເລກສູ້ຊົນທັງໝົດ 709,56 ຕື້ກີບ, ໃນນັ້ນພູດຂອງສູນກາງ 387,42 ຕື້ກີບ, ພູດທ້ອງຖິ່ນ 322,14 ຕື້ກີບ, ສາມາດຈັດຕັ້ງປະຕິບັດໄດ້ 716,87 ຕື້ກີບ ເທົ່າກັບ 101,02% ຂອງແຜນການປີ ເຊິ່ງໃນນັ້ນພູດຂອງສູນກາງປະຕິບັດໄດ້ 383,80 ຕື້ກີບ ເທົ່າກັບ 99,06% ແລະ ພູດຂອງທ້ອງຖິ່ນປະຕິບັດໄດ້ 333,06 ຕື້ກີບ ເທົ່າກັບ 103,27% ຂອງແຜນການ. ສຳລັບການກະກຽມກອງປະຊຸມໃຫຍ່ 3 ຂັ້ນ ແມ່ນໄດ້ຈັດຕັ້ງເຊື່ອມຊຶມ ແລະ ຜັນຂະຫຍາຍເປັນ ຄຳສັ່ງແນະນຳ ແລະ ອອກເປັນມະຕິຕົກລົງຂອງຄະນະປະຈຳພັກແຂວງ ວ່າດ້ວຍການຫັນເອົາພະນັກງານລົງແຕ່ລະຮາກ ຖານ ຕິດພັນກັບວຽກງານຕິດຕາມ, ກວດກາ ແລະ ແກ້ໄຂ ກໍລະນີພົບເຫັນໃນບັ້ນດຳເນີນຊີວິດການເມືອງ ປັບປຸງປົວແປງພັກ ໃນທົ່ວອົງຄະນະພັກແຂວງ ເຊິ່ງໃນປະຈຸບັນແມ່ນໄດ້ສຳເລັດກອງປະຊຸມໃຫຍ່ຢູ່ໃນຂັ້ນຮາກຖານບ້ານ ແລະ ອົງການຈັດຕັ້ງມະຫາຊົນຂັ້ນເມືອງກໍ່ໄດ້ສຳເລັດກອງປະຊຸມໃຫຍ່ຂອງຕົນເປັນສ່ວນໃຫຍ່. ສຳລັບບັນດາຮາກຖານ ຂັ້ນເມືອງ, ພະແນກການ ແລະ ຂັ້ນແຂວງ ແມ່ນໄດ້ເລັ່ງໃສ່ວຽກງານຂະບວນການຕ່າງ ໃຫ້ເປັນຂະບວນການຟົດຟື້ນ.

ໂອກາດດັ່ງກ່າວ ທ່ານ ປອ ພັນຄຳ ວິພາວັນ ກໍ່ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳຕໍ່ຄະນະພັກ, ອຳນາດການປົກຄອງຂອງແຂວງຄຳມ່ວນ. ເຊິ່ງທ່ານໄດ້ຍ້ອງຍໍຊົມເຊີຍ ແລະ ເຊີດຊູບັນດາຜົນສຳເລັດທີ່ ອົງຄະນະພັກແຂວງຍາດມາໄດ້ໃນໄລຍະຜ່ານມາ. ພ້ອມທັງຊີ້ນຳໃຫ້ອົງຄະນະພັກແຂວງຄຳມ່ວນ ຕໍ່ກັບການກະກຽມການ ດຳເນີນກອງປະຊຸມໃຫຍ່ 3 ຂັ້ນ ແມ່ນຕ້ອງໄດ້ກຳແໜ້ນຄວາມສຳຄັນ ແລະ ທັດຊະນະຊີ້ນຳຂອງກົມການເມືອງ ສູນກາງພັກ ຕໍ່ກັບການດຳເນີນກອງປະຊຸມໃຫຍ່ຄັ້ງທີ XI ຂອງສູນກາງພັກ ບົນພື້ນຖານນຳເອົາເນື້ອໃນຈິດໃຈດັ່ງກ່າວ ໄປສົມທົບກັບການກະກຽມດຳເນີນກອງປະຊຸມ 3 ຂັ້ນຂອງຄະນະພັກຕົນ, ສ້າງຂະບວນການເຄື່ອນໄຫວວຽກງານການ ເມືອງຢ່າງກ້ວາງຂວາງ, ຟົດຟື້ນ ແລະ ເລິກເຊິ່ງໃນທົ່ວພັກ, ທົ່ວສັງຄົມ ເພື່ອເປັນໂອກາດນຳພາເສີມຂະຫຍາຍປະຊາ ທິປະໄຕ, ສ້າງ, ປັບປຸງຄວາມເຂັ້ມແຂງຂອງລະບອບ ປະຊາທິປະໄຕປະຊາຊົນ, ມີການສົມທົບແໜ້ນ ເພື່ອສ້າງຄວາມ ເປັນເອກະພາບບັນດາທິດທາງຕົ້ນຕໍ, ຄາດໝາຍທີ່ສຳຄັນໃນການພັດທະນາເສດຖະກິດ-ສັງຄົມ ກໍ່ຄືວຽກພັກ-ພະນັກງານ ເຮັດແນວໃດໃຫ້ ມະຕິຂອງອົງຄະນະພັກຂັ້ນແຂວງ, ຂັ້ນເມືອງໃຫ້ສອດຄ່ອງກັນ ເພື່ອຜັນຂະຫຍາຍທິດທາງຢຸດທະສາດ ລວມຂອງພັກ ແລະ ເຮັດໃຫ້ການກະກຽມກອງປະຊຸມ 3 ຂັ້ນ ຕິດພັນກັບການປັບປຸງປົວແປງພາຍໃນພັກ ເພື່ອຍົກສູງ ມານະຈິດການ ປະຕິວັດໃນຖັນແຖວສະມາຊິກພັກ, ພະນັກງານໃຫ້ສູງຂຶ້ນ,



ພ້ອມທັງຮັບປະກັນຄວາມສະຫງົບ, ຄວາມ ເປັນລະບຽບຮຽບຮ້ອຍໃນສັງຄົມ ນັບທັງການປ້ອງກັນບັ້ນດຳເນີນກອງປະຊຸມໃຫຍ່ແຕ່ລະຂັ້ນ ແລະ ການເຄື່ອນໄຫວ ແກ້ໄຂປະກົດການຫຍໍ້ທໍ້ໃນສັງຄົມ ເພື່ອຮັບປະກັນເຮັດໃຫ້ການດຳເນີນກອງປະຊຸມ 3 ຂັ້ນ ໄດ້ບັນລຸຕາມຄາດໝາຍທີ່ວາງໄວ້. ໃນໂອກາດເຄື່ອນໄຫວຢ້ຽມຢາມແຂວງຄຳມ່ວນ ທ່ານຮອງປະທານປະເທດ ພ້ອມຄະນະການນຳຂອງແຂວງ ຍັງໄດ້ຢ້ຽມຊົມການຜະລິດເຂົ້ານາໄຮ່ໃຫຍ່ ຢູ່ເມືອງໜອງບົກ ແລະ ໂຮງງານຜະລິດ-ປຸງແຕ່ງເກືອກາລີ ບໍລິສັດ ຊີໂນ-ອາກຣີ ໂປຕາສ ຕັ້ງຢູ່ບ້ານດົງໃຕ້ ເມືອງທ່າແຂກ ເພື່ອຊຸກຍູ້ໃຫ້ຫົວໜ່ວຍທຸລະກິດໄດ້ມີຄວາມເຂັ້ມແຂງ ແລະ ປະກອບສ່ວນສ້າງສາພັດທະນາປະເທດຊາດ.


ຂ່າວສານແຂວງຄຳມ່ວນ

Post a Comment

0 Comments