ເມືອງຄອບ ວາງສີວາຈາລຶກ ກໍ່ສ້າງ ພະພຸດທະຮູບ ຣັດຕະນະມິ່ງເມືອງ ປາງສະມາທິ

ເພື່ອສ້າງໃຫ້ເປັນສະຖານທີ່ສັກຄະລະບູຊາຂອງຊາວພຸດ ກໍ່ຄືປະຊາຊົນຊາວເມືອງຄອບ, ພ້ອມທັງສ້າງເປັນສະຖານທີ່ທ່ອງທ່ຽວທາງວັດທະນະທໍາ ແລະ ທໍາມະຊາດ, ທັງເປັນສະຖານທີ່ຊົມວິວທິວທັດຕົວເມືອງຄອບ, ໃນວັນທີ 19 ກຸມພາ 2019 ນີ້ ທີ່ເທິງພູຜາບ່ອງ ເມືອງຄອບ, ແຂວງ ໄຊຍະບູລີ ໄດ້ຈັດພິທີ ວາງສີລາຈາລຶກ ການກໍ່ສ້າງພະພຸດທະຮູບ ຣັດຕະນະມິ່ງເມືອງປາງສະມາທິ.




ໃຫ້ກຽດເຂົ້າຮ່ວມພິທີ ມີທ່ານ ພົງສະຫວັນ ສິດທະວົງ, ເຈົ້າແຂວງ ແຂວງໄຊຍະບູລີ, ມີບັນດາການນໍາຂອງແຂວງ, ການນໍາຂອງເມືອງ, ນັກທຸລະກິດ, ຕະຫຼອດເຖິງປະຊາຊົນຊາວເມືອງ ຄອບ ແລະ ແຂກຈາກ ປະເທດໄທເຂົ້າຮ່ວມຢ່າງຫຼວງຫຼາຍ.




ໃນພິທີ, ທ່ານ ພົມ ມິ່ງບຸບຜາ, ເຈົ້າເມືອງ-ເມືອງ ຄອບ ໄດ້ກ່າວວ່າ: ການສ້າງພະພຸດທະຮູບ ຣັດຕະນະມິ່ງເມືອງ ປາງສະມາທິ ເທິງພູຜາບ່ອງ ແມ່ນເພື່ອສ້າງໃຫ້ເປັນສະຖານທີ່ສັກຄະລະບູຊາຂອງຊາວພຸດ ກໍ່ຄື ປະຊາຊົນຊາວເມືອງ ຄອບ, ສ້າງເປັນສະຖານທີ່ທ່ອງທ່ຽວທາງວັດທະນະທໍາ ແລະ ທໍາມະຊາດ, ທັງເປັນສະຖານທີ່ຊົມວິວທິວທັດຕົວເມືອງຄອບຕື່ມອີກ.
ການກໍ່ສ້າງພະພຸດທະຮູບດັ່ງກ່າວ ແມ່ນໄດ້ຮັບການຮ່ວມແຮງຮ່ວມໃຈຂອງອໍານາດການປົກຄອງ, ພໍ່ແມ່ປະຊາຊົນພາຍໃນເມືອງຄອບ ແລະ ນັກທຸລະກິດທີ່ຮ່ວມເປັນເຈົ້າສັດທາຫຼັກ ໂດຍສະເພາະແມ່ນ ທ່ານ ຈໍານຽນ ບຸນທະວີ, ທ່ານ ນາງ ເກດມະນີ ຫານຊະນະ ແລະ ທ່ານ ຄໍາຟອງ ພັນປະດິດ, ເຊິ່ງ ນັກທຸລະກິດທັງ 3 ທ່ານ ແມ່ນໄດ້ຮ່ວມກັນກໍ່ສ້າງເສັ້ນທາງເຂົ້າຫາສະຖານທີ່ກໍ່ສ້າງພະ, ພ້ອມທັງຕິດຕັ້ງລະບົບນໍ້າ ແລະ ໄຟຟ້າ ເພື່ອອໍານວຍຄວາມສະດວກໃນການກໍ່ສ້າງ.




ການກໍ່ສ້າງພະພຸດທະຮູບ ຣັດຕະນະມິ່ງເມືອງ ປາງສະມາທິ ນີ້ ມີມູນຄ່າການກໍ່ສ້າງທັງໝົດ 1,46 ຕື້ກີບ, ໂດຍທຶນດັ່ງກ່າວແມ່ນໄດ້ມາຈາກການລະດົມຈິດໃຈສັດທາຂອງອໍານາດການປົກຄອງເມືອງ, ປະຊາຊົນບັນດາເຜົ່າ ແລະ ນັກທຸລະກິດຜູ້ປະກອບການ, ພະພຸດທະຮູບອົງດັ່ງກ່າວ ມີລວງສູງ 14,5 ແມັດ, ກວ້າງ 8 ແມັດ.
ໃນພິທີດັ່ງກ່າວ, ພາຍຫຼັງທີ່ທ່ານ ເຈົ້າແຂວງ, ພ້ອມການນໍາຂັ້ນແຂວງ, ແລະ ຂັ້ນເມືອງ ໄດ້ຈູດທູບບູຊາສະຖານທີ່ກໍ່ສ້າງນັ້ນແລ້ວ ກໍ່ໄດ້ຮ່ວມໃສ່ບາດພະສົງສໍາມະເນນ ແລະ ເຂົ້າວາງ ແທ່ງສີລາຈາລຶກ ກໍ່ສ້າງພະພຸດທະຮູບຢ່າງເປັນທາງການ.




ຂ່າວຍັງໃຫ້ຮູ້ຕື່ມອີກວ່າ ໃນວັນດຽວກັນ ທ່ານ ພົງສະຫວັນ ສິດທະວົງ, ເຈົ້າແຂວງ ແຂວງໄຊຍະບູລີ, ຍັງໄດ້ມອບພາຫະນະ ລົດສິ້ງ ມູນຄ່າ 31 ລ້ານກີບ ໃຫ້ກອງຮ້ອຍຊາຍແດນ 151 ເພື່ອປະກອບເຂົ້າໃນການປະຕິບັດໜ້າທີ່ວຽກງານວິຊາສະເພາະ.
ກ່າວຮັບລົດດັ່ງກ່າວ ແມ່ນ ທ່ານ ພັຕ ຄໍາຕຸ່ນ ສົມມະນີ, ຫົວໜ້າຄະນະການທະຫານ ກອງຮ້ອຍຊາຍແດນ 151 ໂດຍມີ ທ່ານ ສໍາລານ ແປງສະຫວ່າ, ເຈົ້າເມືອງ-ເມືອງ ຊຽງຮ່ອນ ແລະ ພະນັກງານຫຼັກແຫຼ່ງຂອງເມືອງເຂົ້າຮ່ວມ.

ນັກຂ່າວ: ຫ້ອງວ່າການແຂວງ ໄຊຍະບູລີ
ໂດຍ: ອຸ່ນເຮືອນ ໂພທິລັກ

Post a Comment

0 Comments