ນະຄອນວຽງຈັນ ກວດສອບ ຫຼາຍໂຄງການ ມີເງິນຮົ່ວໄຫຼ ແລະ ພະນັກງານລັດສໍ້ລາດບັງຫຼວງ

ກອງປະ­ຊຸມສະ­ຫຼຸບຕີລາ­ຄາການ­ເຄື່ອນ­ໄຫວວຽກງານກວດ­ກາ ປະ­ຈຳປີ 2018 ຈັດຂຶ້ນວັນທີ 20 ກຸມ­ພາ 2019 ຢູ່ຫ້ອງວ່າ­ການປົກ­ຄອງນະ­ຄອນ­ຫຼວງວຽງຈັນ (ນວ) ໂດຍເປັນປະ­ທານຂອງທ່ານ ລາດຊະ­ນີວົງ ອະມາຣາທິທາ­ດາ ປະ­ທານກວດ­ກາພັກ ຫົວ­ໜ້າອົງ­ການກວດ­ກາລັດ ແລະ ຕ້ານການສໍ້ລາດບັງຫຼວງ ນວ ມີທ່ານ ສີຫຸນ ສິດ­ທິລືໄຊ ຮອງເຈົ້າຄອງ ນວ ທ່ານ ດາວບົວ­ລະ­ພາ ບາວົງເພັດ ຮອງປະ­ທານຄະ­ນະກວດ­ກາສູນກາງພັກ ພ້ອມດ້ວຍພາກ­ສ່ວນກ່ຽວ­ຂ້ອງເຂົ້າຮ່ວມ.

ປີ 2018 ທົ່ວ ນວ ມີໜ່ວຍພັກ 1.137 ໜ່ວຍ ມີສະ­ມາ­ຊິກພັກ 20.586 ສະ­ຫາຍ ສະ­ມາ­ຊິກພັກສຳ­ຮອງ 1.463 ສະ­ຫາຍ ໄດ້ກວດ­ກາປະເມີນຜົນການກໍ່­ສ້າງໜ່ວຍພັກປອດໃສ ເຂັ້ມ­ແຂງ ໜັກແໜ້ນ 216 ໜ່ວຍ ສະ­ມາ­ຊິກພັກທົ່ວ ນວ ຖືກປະ­ຕິ­ບັດວິ­ໄນ 89 ສະ­ຫາຍ ຍິງ 27 ສະ­ຫາຍ ສ່ວນວຽກງານກວດ­ກາລັດໄດ້ຕິດ­ຕາມ ກວດ­ກາໂຄງ­ການລົງ­ທຶນຂອງລັດເລີ່ມແຕ່ຫົວ­ທີ ສືບ­ຕໍ່ຈັດຕັ້ງປະ­ຕິ­ບັດດຳ­ລັດວ່າດ້ວຍການຕິດ­ຕາມກວດ­ກາ ໂຄງ­ການລົງ­ທຶນຂອງລັດເລີ່ມແຕ່ຫົວ­ທີ ໂດຍຄະ­ນະກວດ­ກາແຕ່ລະພະແນກ ແລະ ເມືອງໄດ້ກຳ­ນົດເປົ້າໝາຍຕິດ­ຕາມກວດ­ກາ 16 ເປົ້າໝາຍ ມູນຄ່າ 71,07 ຕື້ກີບ ອົງ­ການກວດ­ກາລັດ­ຖະ­ບານ ໄດ້ສົມ­ທົບກັບອົງ­ການກວດ­ກາ ນວ ແລະ ບັນ­ດາພະ­ແນກ­ການ ດຳ­ເນີນການກວດ­ກາໂຄງ­ການບໍ່ໄດ້ຜ່ານການປະເມີນ ແລະ ໂຄງ­ການປະເມີນໄດ້ປະ­ເພດ F ຕາມຜົນການກວດສອບຢູ່ ນວ 65 ໂຄງ­ການ ມູນຄ່າ 1.583,14 ຕື້ກີບ ຜ່ານການກວດ­ກາໂຄງ­ການປະເມີນຢູ່ກະ­ຊວງ 55 ໂຄງ­ການ ແລະ ໂຄງ­ການຢູ່ຂັ້ນ ນວ 10 ໂຄງ­ການ ໃນນີ້ ໄດ້ລາຍງານຕໍ່ກອງປະ­ຊຸມຄະ­ນະປະ­ຈຳພັກ ນວ 29 ໂຄງ­ການ ເຫັນດີໃຫ້ໂຈະໂຄງ­ການລົງ­ທຶນຂອງລັດ 11 ໂຄງ­ການ ແລະ ໃຫ້ຕັດມູນຄ່າໂຄງ­ການທີ່ກວດ­ກາພົບເຫັນ 6 ໂຄງ­ການອອກຈາກໂຄງ­ການລົງ­ທຶນຂອງລັດ ແລະ ຜ່ານການ­ຈັດ­ຕັ້ງປະ­ຕິ­ບັດສຳ­ເລັດ 5 ໂຄງ­ການ ພົບມູນຄ່າທີ່ຕ້ອງເກັບກູ້ຄືນໃຫ້ລັດ 18,4 ຕື້ກີບ.

ໄດ້ສົມ­ທົບກັບພາກ­ສ່ວນກ່ຽວ­ຂ້ອງ ກວດ­ກາການລັກ­ລອບຕັດໄມ້ ການເຄື່ອນຍ້າຍໄມ້ທີ່ລະ­ເມີດຕໍ່ລະ­ບຽບກົດ­ໝາຍ 9 ກໍ­ລະ­ນີ ອາຍັດໄມ້ 157.970 ແມັດກ້ອນ ຂາຍ 10.648 ແມັດກ້ອນ ມູນຄ່າ 69,7 ລ້ານກີບ ຈັບກຸມຜູ້ກະ­ທຳຜິດໄດ້ຈຳ­ນວນໜຶ່ງ ຕິດ­ຕາມກວດ­ກາດັດ­ສົມໂຮງ­ງານເຟີນີເຈີໄມ້ 162 ໂຮງ­ງານ ຍຸບເລີກກິດ­ຈະ­ການ 32 ໂຮງ­ງານ ແລະ ກວດ­ກາຮ້ານຂາຍໄມ້ແປຮູບ 111 ຮ້ານ ອາຍັດໄມ້ 39,59 ແມັດກ້ອນ ຢຶດເຄື່ອງຈັກ 105 ລາຍ­ການ.

ສຳ­ລັບວຽກສະ­ກັດກັ້ນ ຕ້ານການສໍ້ລາດບັງຫຼວງ ຄະ­ນະພັກແຕ່ລະຂັ້ນໄດ້ເອົາ­ໃຈ­ໃສ່ຈັດຕັ້ງເຜີຍ­ແຜ່ ບົດແນະ­ນຳກ່ຽວກັບການດຳ­ເນີນຄະ­ດີສໍ້ລາດບັງຫຼວງ ແລະ ວ່າດ້ວຍການຍົກສູງປະສິດ­ທິຜົນຄຸ້ມຄອງສັງ­ຄົມດ້ວຍກົດ­ໝາຍ ພົບພະ­ນັກ­ງານ-ລັດ­ຖະ­ກອນຮັບຮູ້ ແລະ ເຂົ້າ­ໃຈຜົນຮ້າຍຂອງພະ­ຍາດອາດ­ຍາສິດ ແລະ ການສໍ້ລາດບັງຫຼວງ ເຮັດໃຫ້ປາ­ກົດ­ການຫຍໍ້­ທໍ້ພາຍໃນກົງ­ຈັກບໍ­ລິ­ຫານຫຼຸດລົງເທື່ອລະກ້າວ



ນອກນີ້ ຍັງໄດ້ລົງຕິດ­ຕາມກວດ­ກາ 21 ເປົ້າໝາຍ ພົບເຫັນການສໍ້ລາດບັງຫຼວງ 5 ກໍ­ລະ­ນີ ມູນຄ່າເສຍຫາຍ 2,19 ຕື້ກີບ ທີ່ດິນລັດ 3.866 ຕາແມັດ ກວດ­ກາການປະ­ຕິ­ບັດໜ້າ­ທີ່ຂອງພະ­ນັກ­ງານ 9 ກໍ­ລະ­ນີ ກວດ­ກາການອອກນິ­ຕິກຳຂອງອົງການ­ຈັດ­ຕັ້ງລັດ 6 ກໍ­ລະ­ນີ ແລະ ກວດ­ກາການສະ­ເໜີແກ້ໄຂຂໍ້ຂັດແຍ່ງທີ່ດິນຂອງອົງ­ການບໍ­ລິ­ຫານລັດ 1 ກໍ­ລະ­ນີ ເຊິ່ງຜ່ານການກວດ­ກາເປົ້າໝາຍຕ່າງໆ ແມ່ນມີຄວາມຈິງຕາມການສະ­ເໜີຂອງປະ­ຊາ­ຊົນເປັນສ່ວນໃຫຍ່ ປັດ­ຈຸ­ບັນໄດ້ມີບົດລາຍງານ ແລະ ນຳສົ່ງໃຫ້ພາກ­ສ່ວນກ່ຽວ­ຂ້ອງຄົ້ນ­ຄວ້າແກ້ໄຂ.

ສຳ­ລັບວຽກງານແຈ້ງຊັບສິນຮອບ 2 ມີພະ­ນັກ­ງານ-ລັດ­ຖະ­ກອນທີ່ຕ້ອງແຈ້ງຊັບສິນ ແລະ ລາຍຮັບ 12.212 ຄົນ ແລະ ໄດ້ຮັບຄຳຮ້ອງຄຳສະ­ເໜີຂອງປະ­ຊາ­ຊົນພົນ­ລະ­ເມືອງຈຳ­ນວນ 124 ສະ­ບັບ.



ຂອບໃຈຂໍ້ມູນຈາກ: ນສພ ວຽງຈັນໃຫ່ມ

Post a Comment

0 Comments